فرانتسيا پرەزيدەنتى ەممانۋەل ماكرون قىتايدىڭ كوروناۆيرۋسقا قاتىستى اقپاراتتى اشىق ايتپاۋى مۇمكىن ەكەنىن مالىمدەدى. بۇل تۋرالى Financial Times گازەتىنە بەرگەن سۇحباتىندا ايتتى.
ە.ماكرون اتالعان باسىلىمنىڭ كەزەكتى سۇراعىنا جاۋاپ بەرگەندە قىتايدىڭ كوروناۆيرۋسپەن كۇرەسى ءساتتى وتكەنىنە سەنۋ اڭعالدىق ەكەنىن جەتكىزدى. Financial Times ءتىلشىسى «قىتايدىڭ ىندەتپەن كۇرەسۋگە قاتاڭ ءتارتىپ ۇستانۋى باتىس دەموكراتياسىنىڭ السىزدىگىن بىلدىرمەي مە؟» دەپ سۇراعان. ماكرون اشىق قوعام مەن شىندىق ايتىلمايتىن قوعامدى سالىستىرماۋ كەرەكتىگىن ايتتى.
«وسى ەرەكشەلىكتەردى ەسكەرىپ, قىتايدىڭ ىندەتپەن كۇرەستە بىزگە قاراعاندا ءساتتى ارەكەت ەتكەنىنە سەنۋ اڭعالدىق. بىزگە بەلگىسىز. وندا بىزگە بەيمالىم جاعدايلار بولعانى انىق», دەدى فرانتسيا پرەزيدەنتى.
ە.ماكروننىڭ قىتايعا تيىسە كەتۋى بەكەر ەمەس. فرانتسياداعى قىتاي ەلشىلىگىنىڭ سايتىندا باتىس ەلدەرى قاريا كىسىلەرگە كومەكتەسپەي, ولۋگە قالدىرىپ كەتتى دەگەن ماقالا جاريالانعان-دى.
اتالعان جازبا ۇلكەن داۋ تۋعىزدى. وسىعان بايلانىستى, فرانتسيانىڭ سىرتقى ىستەر مينيسترلىگى قىتاي ەلشىسىن شاقىرىپ الىپ, ءبىراز «ساباق» بەرىپ جىبەرگەنگە ۇقسايدى. كوپ ۇزاماي قىتاي ۇكىمەتىنىڭ وكىلى چجاو ليتسزيان بەيجىڭ تاراپى فرانتسيانىڭ پاندەميامەن كۇرەستەگى ءىس-قيمىلدارىنا شاك كەلتىرمەيتىنىن مالىمدەدى.
ايتا كەتەرلىگى, قازىرگى تاڭدا فرانتسيادا كوروناۆيرۋسپەن اۋىرعاندار سانى 150 مىڭعا جاقىنداپ, 20 مىڭعا جۋىق ادام قازا تاپتى.