تۇركىستان وبلىسىندا سوڭعى مالىمەتكە سايكەس كوروناۆيرۋس دەرتىن جۇقتىرعاندار سانى – 49. وڭىردە ەڭ العاشقى كوروناۆيرۋس دەرەگى 31 ناۋرىزدا تىركەلگەن.
جەتىساي اۋدانىنىڭ 1971 جىلى تۋعان تۇرعىنى 21 ناۋرىز كۇنى نۇر-سۇلتان قالاسىنان پاۆلودار-قىزىلوردا باعىتىنداعى پوەزبەن كەلگەن. ارى قاراي جەكە كولىكپەن جەتىساي قالاسىنا جولعا شىققان. ول 28 اداممەن جاقىن بايلانىستا بولىپ, ۆيرۋس تاراتقان.
وڭىردەگى جەدەل شتاب ءباسپاسوز قىزمەتى انىقتالعان ەكىنشى وشاقتى 4 ساۋىردە قايتىس بولعان 64 جاستاعى جەتىساي اۋدانىنىڭ تۇرعىنىمەن بايلانىستىرىپ وتىر. ول 14 ناۋرىز كۇنى الماتى قالاسىنان كەلگەنىن جاسىرعان. 7 اداممەن جاقىن بايلانىستا بولعان. ونىڭ ىشىندە 15 ءساۋىر كۇنى شىمكەنت قالاسىندا قايتىس بولعان 1954 جىلعى ازامات تا بار.
ىندەتتىڭ ءۇشىنشى جانە ءتورتىنشى وشاعى شىمكەنت قالاسىنىڭ تۇرعىنىمەن جاقىن بايلانىستا بولعان سايرام مەن ورداباسى اۋداندارىنان انىقتالدى. بۇل اۋدانداردان شىققان ءتورت ناۋقاس شىمكەنت قالاسىنىڭ ازاماتىمەن جاقىن بايلانىستا بولىپ, ۆيرۋس جۇقتىرعان.
بەسىنشى وشاق رەتىندە 31 ناۋرىز كۇنى اقتاۋ قالاسىنان ارىسقا كەلگەن 1995 جىلى تۋعان ازامات ەسەپتەلەدى. ول ءوز وتباسىنىڭ 6 ادامى جانە بايدىبەك اۋدانىنىڭ تۇرعىنىمەن جاقىن بايلانىستا بولعان.
ىندەت وشاقتارىندا ءتيىستى جۇمىستار اتقارىلىپ, باقىلاۋعا الىنعان.