ءۇشىنشى مەگاپوليستەگى وقۋ ورىندارىنىڭ ءبىرىنىڭ ستۋدەنتى, كامەلەت جاسىنا تولماعان قىزدى جەڭگەتايلىق جاساپ جۇرگەن جەكسۇرىن جىنىستىق قىزمەت كورسەتۋ ءۇشىن بىرنەشە رەت ۇسىنعانى انىقتالىپ وتىر.
جەڭگەتايلىق كەلىسسوزدەر تەلەفون ارقىلى جۇرگىزىلىپ, كليەنتتەرگە قىزدىڭ سۋرەتى مەسسەندجەرمەن كورسەتىلگەن. تەرگەۋ بارىسىندا, سونداي-اق كۇدىكتىنىڭ ارام نيەتتەگىلەردەن ءىرى كولەمدە اقشا سۇراۋ ءۇشىن قىزدىڭ پاك, تازا ەكەنىن ايتىپ, كەلىسۋدەن كەيىن كەزدەسۋدى ۇيىمداستىرىپ وتىرعانى بەلگىلى بولدى.
كۇدىكتىنى قۇرىقتاۋعا وبلىستىق پوليتسيا دەپارتامەنتىنىڭ كريمينالدىق پوليتسيا باسقارماسىنا ءبىر ايەل كامەلەتكە تولماعان قىزدى جىنىستىق قىزمەت كورسەتۋ ءۇشىن بەلگىلى سوماعا ساتاتىنى تۋرالى كەلىپ تۇسكەن حابارلامانىڭ سەپتىگى تيگەن. سول كۇنى جەدەل-ىزدەستىرۋ ءىس-شاراسى بارىسىندا, تۇركىستان وبلىسى پد كپب جانە سايرام اۋدانى پوليتسيا ءبولىمىنىڭ قىزمەتكەرلەرى اقسۋكەنت اۋىلىنداعى قوناقۇيلەردىڭ بىرىندە كامەلەتكە تولماعان قىزدى ساتۋ كەزىندە شىمكەنت قالاسىنىڭ تۇرعىنىن ۇستادى. اتالعان جايت قر قىلمىستىق كودەكسىنىڭ 309-بابىنىڭ 2-بولىگى (جەزوكشەلىكپەن اينالىسۋعا ارنالعان پريتوندار ۇيىمداستىرۋ نەمەسە ۇستاۋ جانە جەڭگەتايلىق) بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە تىركەلگەن.
پوليتسيا قىزمەتكەرلەرى كۇدىكتىدەن ايعاقتى زات رەتىندە ميلليون تەڭگەنى تاركىلەدى. قازىرگى ۋاقىتتا اتالعان جايت بويىنشا سوتقا دەيىنگى تەرگەۋ امالدارى جۇرگىزىلۋدە. كۇدىكتى قاماۋعا الىندى. تۇركىستان وبلىسى پد-ءنىڭ پوليتسەيلەرى ءىستىڭ تولىق ءمان-جايىن جانە كۇدىكتىنىڭ باسقا دا وسىعان ۇقساس قىلمىستارعا قاتىستىلىعىن انىقتاۋدا.