وڭتۇستىك قازاقستان وبلىسىنداعى تۇركىستان قالاسى-تەگى ءبىر, تاريحى ورتاق تۇركى ەلدەرىنىڭ ءتۇپ قازىعى. تۇركىستان ءيسى مۇسىلمان ەلدەرى ءۇشىن عانا ەمەس, دۇنيەجۇزى حالقى ءۇشىن دە قاسيەتتى مەكەنگە اينالعان شاھار. جىل سايىن بۇل جەرگە الەمنىڭ جانە ەلىمىزدىڭ ءار ايماعىنان 700 مىڭنان اسا ادام كەلەدى ەكەن. بۇل تۋرالى «24 kz» حابارلادى.
كەلۋشىلەردىڭ باسىمدىعىنا وراي, جەرگىلىكتى بيلىك بىرنەشە جوبالاردى ىسكە اسىرۋدى كوزدەپ وتىر. قازىرگى كەزەڭدە ق. ا. ياسساۋي كەسەنەسى ماڭىندا بيزنەستىڭ الەۋمەتتىك جاۋاپكەرشىلىگى شەڭبەرى اياسىندا 200 ورىنعا لايىقتالعان تۋريستىك ورتالىق سالىنۋدا. ول جەردەن قوناق ءۇي, تاماقتاناتىن ورىن, اۆتوتۇراق ورىن الادى. كەلەسى ءبىر عيماراتقا «قولونەر شەبەرلەرىنىڭ ورتالىعى» دەگەن اتاۋ بەرىلمەك. وسى اتالعان ەكى نىساننىڭ قۇرىلىسىنا وبلىستىق بيۋدجەتتەن 700 ملن. تەڭگەگە جۋىق قاراجات بولىنگەن. ازىرگە ءتۋريزمدى دامىتۋعا باعىتتالعان جۇمىستاردىڭ العاشقى نوبايى وسىنداي.
"نەگىزگى كەسەنەگە كەلەتىن ۇلكەن داڭعىل جول بار. سول داڭعىل جولدان تروللەيبۋس جۇرگىزۋدى قولعا الماقپىز. وسى 3-4 شاقىرىمدى قامتىپ وتسەك, ول قالانىڭ زامان تالابىنا ساي بولۋىنا, ونىڭ ەكولوگياسىنا, قالانىڭ كەلبەتىنە دە وڭ ۇلەسىن قوسادى", - دەيدى تۇركىستان قالاسىنىڭ اكىمى باقىتجان اشىربەكوۆ.
الداعى ۋاقىتتا «ازىرەت سۇلتان» قورىق-مۇراجايىن اشۋ, قالا تاريحىنان سىر شەرتەتىن ءتۇرلى كىتاپتاردى شىعارۋ جوسپاردا تۇر. باستىسى, ەجەلگى ساۋران قالاشىعى اشىق اسپان استىنداعى مۋزەيگە اينالادى جانە ۇكاش اتا مەن گاۋھار انا كەسەنەسى سەكىلدى نىساندارعا جول توسەلىپ, ينفراقۇرىلىم جۇرگىزىلۋدە. مۇنان وزگە, 3 تۋريستىك ورتالىق اشىلادى.
دانيار تۇيمەباي.