اقتاۋدا 2019 جىلدان بەرى «ماەك» سۋ جيناعىشىنان «قۇرىق» پارومدى كەشەنىنە دەيىنگى اۆتوموبيل جولىن قايتا جاڭارتۋ جۇمىستارى جۇرگىزىلىپ جاتىر. بۇگىنگى تاڭدا جوبانىڭ 5 كەزەڭىنىڭ ۇشەۋى اياقتالۋعا جاقىن, دەپ حابارلادى يدم ءباسپاسوز قىزمەتى.
وسىلايشا, جوبانىڭ العاشقى كەزەڭىندە جولدىڭ 15,6 شاقىرىمىندا اسفالت توسەمىنىڭ نەگىزگى جانە تومەنگى قاباتتارى توسەلدى. جالپى ۇزىندىعى 27 شاقىرىمدى قۇرايتىن جول ۋچاسكەسى 4 جولاقتى بولماق. سونداي-اق, اتالمىش نىساندا جاياۋ جۇرگىنشىلەر وتپەلى مەن ۆەلوجولدار سالىنىپ, جارىقتاندىرۋ باعاندارى ورناتىلۋدا. ۋچاسكەدەگى جۇمىستارعا تەحنيكانىڭ 80 بىرلىگى مەن 200-گە تارتا جۇمىسشى جۇمىلدىرىلعان. قايتا جاڭارتۋ جۇمىستارى مەن قۇرىلىس ماتەريالدارىنىڭ ساپاسىن «جول اكتيۆتەرى ساپاسىنىڭ ۇلتتىق ورتالىعى» ساراپتامادان وتكىزۋدە. مەردىگەر – «اقجول قۇرىلىس». بۇدان بولەك, كومپانيا سۋ توگەتىن «شورا» ارناسى ارقىلى وتەتىن ۇزىندىعى 70 مەتردەن اساتىن كوپىردى سالىپ جاتىر.
سونىمەن قاتار جولشىلار جوبانىڭ 4-ءشى كەزەڭى اسياىنداعى جۇمىستاردى بەلسەندى تۇردە جۇرگىزۋدە. ۇزىندىعى 4,6 شاقىرىمدى قۇرايتىن ومىرزاق ەلدى مەكەنىنەن اقتاۋ قالاسىنداعى جاعاجايعا دەيىنگى 4 جولاقتى اۆتوموبيل جولىن «التىنقۇرىق» جشس سالۋدا. بۇگىنگى تاڭدا نىساننىڭ 4,2 شاقىرىمىندا جولدىڭ نەگىزگى تومەنگى قاباتتارىن توسەۋ جۇمىستارى تولىقتاي اياقتالعان. جول ۋچاسكەسىندە تەحنيكانىڭ 50 بىرلىگى مەن 100-گە جۋىق ادام جۇمىس ىستەۋدە.
«ماەك – قازاتومونەركاسىپ» جشس سۋ جيناعىشىنان «قۇرىق» تەڭىز پورتىنا دەيىنگى اۆتوموبيل جولىن قايتا جاڭارتۋ جوباسىنىڭ 3-ءشى كەزەڭى اياسىنداعى نىساندار بيىل پايدالانۋعا بەرىلەدى.
بۇدان بولەك, كەلەسى جىلى جوبانىڭ 2-ءشى جانە 5-ءشى كەزەڭى اياسىنداعى جۇمىستار جۇرگىزىلەدى دەپ جوسپارلانۋدا. جول وڭىردەگى كۋرورتتىق ايماقتىڭ ءىرى نىساندارى ورنالاسقان كاسپي كولىنىڭ جاعاسىنىڭ بويىمەن وتەدى. قايتا جاڭارتۋ جۇمىستارىنان وتكەن جول ءوڭىردىڭ تۋريستىك الەۋەتىنىڭ ارتۋىنا, ونىڭ ەكونوميكالىق تۇرعىدا دامۋىنا سەرپىن بەرمەك.