تۇڭعىش پرەزيدەنت – ەلباسىنىڭ «Egemen Qazaqstan» گازەتىندە جاريالانعان ماقالاسى تاعى دا حالقىمىزدى جىگەرلەندىرە ءتۇستى. ەلباسىنىڭ ءاربىر ءسوزى شىن جاناشىرلىق پەن وتانى مەن ەلىنە دەگەن ىستىق ىقىلاسقا تولى.
كوروناۆيرۋس پاندەمياسىنىڭ سالدارىنان الەم وزگەرىپ, ادامزاتتىق قۇندىلىقتارعا قاتىستى ويى وزگەردى. دوستىق, بىرلىك پەن جاناشىرلىق سياقتى قاسيەتتەر ادامي قاتىناستىڭ باستى كىلتىنە اينالدى. البەتتە, دوستىق پەن بىرلىك – بۇعان دەيىن دە دارىپتەلىپ كەلگەن اسىل قاسيەتتەر. بۇل رەتتە ەلباسىنىڭ حاكىم ابايدىڭ وسيەتىن ايتىپ وتكەنى تەبىرەنتتى. وسى ورايدا الىشەر ءناۋايدىڭ دە دوستىق تۋرالى ولەڭدەرى ەسىمە ءتۇستى.
ەلباسى ءوز ماقالاسىندا ادامي قاسيەتتەر تاربيەلەۋدىڭ ماڭىزى تۋرالى تاعى ءبىر رەت ءسوز قوزعادى. وعان قوسا جاستارعا ۇندەۋى ونىڭ جاس ۇرپاقتىڭ تاعدىرىنا ەرەكشە الاڭدايتىنىن كورسەتتى. بۇگىنگى جاعدايلار مەن زامان تالابىنا جاستاردىڭ بەيىمدەلۋى قيىنعا سوعاتىنىن ءتۇسىنىپ, ەلباسى ء«بىرىڭدى, قازاق, ءبىرىڭ دوس, كورمەسەڭ – ءىستىڭ ءبارى بوس» دەگەن اباي اتامىزدىڭ وسيەتىن ەشقاشان ەستەن شىعارماۋعا شاقىردى.
دانا حالقىنا العىس بىلدىرە كەلە, ءاربىر قازاقستاندىقتىڭ جۇرەگىن تەبىرەنتىپ, قازاقستان حالقىن قالاي قادىرلەيتىنىن ايتتى. «قازاقستان رەسپۋبليكاسىنىڭ ەڭ قىمبات قازىناسى – ادام جانە ونىڭ ءومىرى. سوندىقتان ارقايسىمىز ءوزىمىزدىڭ, جاقىندارىمىزدىڭ ءومىرى مەن دەنساۋلىعىنا ۇلكەن جاۋاپكەرشىلىكپەن قاراۋىمىز كەرەك», دەدى.
وسى ايتىلعانداردى قورىتا كەلە, مەن ەلباسىنىڭ ويىمەن تولىقتاي كەلىسەتىنىمدى جەتكىزگىم كەلەدى. ءبىز – ءبىر ەلمىز, ال حالقىمىزدىڭ بىرلىگى مەن ىنتىماعى جاراسقان. ەندىگى كەزەكتە كەزدەسىپ وتىرعان قيىندىقتى بىرلەسىپ, اسقان جاۋاپكەرشىلىك تانىتىپ جەڭۋىمىز كەرەك. بىرلىگىمىز بەن بىرتۇتاستىعىمىزعا نۇقسان كەلتىرمەۋىمىز كەرەك. ماڭگىلىك ەل ماقساتىنا ۇمتىلۋىمىز قاجەت.
شەرزود پۋلاتوۆ,
قازاقستان حالقى اسسامبلەياسى توراعاسىنىڭ ورىنباسارى