الەمگە تاراعان كوروناۆيرۋس ىندەتى ادامزاتقا قاۋىپ-قاتەر ءتوندىرىپ وتىر. قازىر پاندەمياعا بايلانىستى ەلىمىزدە جاريالانعان توتەنشە جاعداي مەن كارانتين كەزەڭىندە مەملەكەت بارشا قازاقستاندىقتاردىڭ دەنساۋلىعىن ساقتاپ, قاۋىپتى ىندەتتىڭ الدىن الۋ ءۇشىن بارلىق ساقتىق شارالارىن قولعا الدى.
ەلىمىزدىڭ ەڭ ۇلكەن بايلىعى – ادام ءومىرى مەن دەنساۋلىعى, ۇلت قاۋىپسىزدىگى. ءبىز بارشامىز وسى قۇندىلىقتاردى قورعاپ, ساقتاۋىمىز كەرەك. قازاقستان حالقى وسىنداي سىن ساعاتتا وزىنە ءتان توزىمدىلىگى, زور سەنىمى مەن اۋىزبىرشىلىگى ارقىلى بۇل قاتەردى مىندەتتى تۇردە جەڭىپ شىعادى دەپ سەنەمىز.
وسىنداي قيىن-قىستاۋ كەزەڭدە ەلىمىزدىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ دەر كەزىندە حالىققا ۇندەۋ جاريالاۋى بارشامىزعا دەگەن ۇلكەن قامقورلىقتىڭ, جاناشىرلىقتىڭ بەلگىسى دەپ بىلەمىز. ەلباسىنىڭ «بىرلەسە بىلگەن ەل ءبارىن جەڭەدى» اتتى ماقالاسى قاتەرلى كەزەڭدى باستان وتكەرىپ وتىرعان قازاقستاندىقتارعا ەرەكشە دەمەۋ بولىپ, جىگەرلەندىردى.
ءار ۋاقىتتا حالقىنىڭ قامىن ويلايتىن ەلباسى بۇل ماقالاسىندا: «مەملەكەت بۇل قيىندىقتان شىعۋ ءۇشىن قولدان كەلگەننىڭ ءبارىن جاسايدى جانە ءتيىستى شارانىڭ بارلىعىن اتقارادى. بىردە-ءبىر ادام, ەلىمىزدىڭ ەشبىر ازاماتى قامقورلىقسىز قالمايدى» دەپ اتاپ ءوتتى.
دۇنيە ءجۇزىن قۇرساۋلاپ بارا جاتقان پاندەميا دامىعان ەلدەردىڭ وزىندە ەكونوميكالىق داعدارىس تۋعىزىپ, تىعىرىقتان شىعۋدىڭ جاڭا شەشىمدەرىن قاراستىرۋعا ماجبۇرلەۋدە. ەلباسى جۇرگىزگەن جۇيەلى رەفورمالار ناتيجەسىندە اۋىل شارۋاشىلىعى دامىپ, قازاقستان ءوزىن ەت-ءسۇت جانە تاعى باسقا دا ازىق-تۇلىك ونىمدەرىمەن ەمىن-ەركىن قامتاماسىز ەتىپ قانا قويماي, الەمدەگى استىق ەكسپورتتاۋشى العاشقى التى مەملەكەتتىڭ قاتارىنا قوسىلدى.
بۇل رەفورمالار جونىندە ەلباسى ءوز ماقالاسىندا «بولاشاق ءۇشىن, الدا كۇتىپ تۇرعان وسىنداي الماعايىپ زاماندار سىناعىن ەركىن ەڭسەرۋ ءۇشىن كوپ قارجى-قاراجات سالىپ, زور جاۋاپكەرشىلىكپەن اتقارىلعان بۇل رەفورمالاردىڭ دۇرىس بولعانىن ءومىردىڭ ءوزى دالەلدەدى» دەپ اتاپ ءوتتى.
ءار مەملەكەتتىڭ جارقىن بولاشاعى, وركەنيەتتىلىگى بىلىمىنە, عىلىمىنا, ونەرى مەن مادەنيەتىنە, جاڭارعان وندىرىسىنە تىكەلەي بايلانىستى. ءبىزدىڭ عالىمدارىمىز دا وسى قيىن ۋاقىتتا حالىققا جان-جاقتى كومەك كورسەتۋدە. ەلباسى ايتقانداي, عىلىم-ءبىلىمىنىڭ جەتىستىگىن ورتاق ماقسات جولىنا بىرلەسە جۇمىلىپ, ىنتىماقتاسا ارەكەت ەتۋدە.
قازاقستان پرەزيدەنتى قاسىم-جومارت كەمەل ۇلى ەلدەگى توتەنشە جاعدايعا تىكەلەي باسشىلىق جاساپ, بارلىق مۇمكىندىكتەردى قاراستىرىپ وتىر. ەل پرەزيدەنتى جاقىندا عانا ۇلتتىق بيوتەحنولوگيا ورتالىعىندا بولىپ, وتاندىق عالىمداردىڭ كوروناۆيرۋستىق ينفەكتسياعا قارسى ۆاكتسينا قۇرۋ بويىنشا باستالعان جۇمىستار تۋرالى اقپارات الدى. بۇل جۇمىسقا ۇلتتىق بيوتەحنولوگيا ورتالىعى, قازاق ۇلتتىق اگرارلىق ۋنيۆەرسيتەتى, جامبىل وبلىسى, قورداي اۋدانىنداعى بيولوگيالىق قاۋىپسىزدىك عىلىمي-زەرتتەۋ ينستيتۋتىنىڭ عالىمدارى تىكەلەي اتسالىسۋدا. پرەزيدەنت بيولوگ عالىمداردىڭ ەڭبەگىن جوعارى باعالاپ, وتاندىق عىلىمنىڭ دامۋىنا جان-جاقتى قولداۋ كورسەتۋ كەرەكتىگىن ايرىقشا اتاپ ءوتتى.
ساقتىق شارالارىن بۇلجىتپاي ورىنداۋ – بارشامىزدىڭ مىندەتىمىز. بۇگىندە ۋنيۆەرسيتەتىمىزدىڭ ۇستاز-عالىمدارىنان قۇرالعان ۆولونتەرلەردىڭ كۇشىمەن جاتىن ورىندارى ازىرلەنىپ, №10 «اق قايىڭ» ستۋدەنتتىك ۇيىنە قالانىڭ 210 مەديتسينا قىزمەتكەرى ورنالاستىرىلدى. ۋنيۆەرسيتەت ستۋدەنتتەرى اعىمداعى جىلدىڭ 16 ناۋرىزىنان باستاپ قاشىقتان وقىتۋ جۇيەسىنە كوشىرىلدى. كارانتين رەجىمى كەزەڭىندە وقۋ ورنىنىڭ عالىمدارى, وقىتۋشىلارى كەستە بويىنشا قاشىقتان ساباق بەرۋدە. ءبىزدىڭ بىلىكتى دە ءبىلىمدى ۇستاز-عالىمدارىمىز جاڭا تەحنولوگيالاردىڭ مۇمكىندىگىن پايدالانا وتىرىپ, قازاقستاندىق جانە شەتەلدىك جوعارى وقۋ ورىندارىمەن, عىلىمي ورتالىقتارمەن بايلانىستارىن ۇزبەي, قاشىقتان ءبىلىم بەرۋگە, عىلىمي جۇمىستاردى جۇرگىزۋگە جانە اۋىلشارۋاشىلىق تاۋار وندىرۋشىلەرىنە اقپاراتتىق كەڭەس بەرۋگە تولىعىمەن مۇمكىندىك الىپ وتىر.
بيىل 30 ناۋرىزدا «ۇلتتىق اگرارلىق عىلىمي-ءبىلىم بەرۋ ورتالىعى» كەاق باسقارما توراعاسى تولەۋتاي راحىمبەكوۆ تىكەلەي ەفيردە اۋىل شارۋاشىلىعى تاۋار وندىرۋشىلەر ءۇشىن ونلاين-كەڭەس وتكىزىپ, ەنشىلەس ۇيىمدارداعى كوكتەمگى ەگىس جۇمىستارىنىڭ بارىسى تۋرالى جان-جاقتى ايتىپ بەرگەن. ەندى وسى ورتالىقتىڭ عالىمدارى اپتاسىنا ءۇش رەت تىكەلەي ەفيرگە شىعىپ, ونلاين رەجىمىندە فەرمەرلەرگە كەڭەس بەرۋدە.
6 ناۋرىز كۇنى قازاق ۇلتتىق اگرارلىق ۋنيۆەرسيتەتىنىڭ 34 ساراپشى عالىمى ونلاين-كەڭەس بەردى. وعان ءبىر كۇندە 2 مىڭعا جۋىق اۋىل كاسىپكەرلەرى مەن اگرارلىق سالا ەڭبەككەرلەرى تىكەلەي بايلانىسقا قوسىلىپ, وزدەرىنە قاجەتتى اقپاراتتار مەن پايدالى كەڭەس الدى. ۋنيۆەرسيتەت عالىمدارى وقۋ-تاجىريبە شارۋاشىلىعىندا كوكتەمگى ەگىس جۇمىستارىن باستاپ كەتتى. ۋنيۆەرسيتەتتە «سيتۋاتسيالىق ورتالىق» جۇمىسى جۇيەلى جولعا قويىلعان, وقۋ ورنى سايتىندا «اگرودامۋ» پاراقشاسى بار. وندا فەرمەرلەر وزدەرىن قىزىقتىراتىن تاقىرىپتارعا بايلانىستى سۇراقتارىن جىبەرە الادى. ءبىزدىڭ عالىمدار ولارعا مىندەتتى تۇردە جاۋاپ بەرەدى.
مەن ءوزىمنىڭ جانە اگرارلىق سالادا قىزمەت اتقارىپ جۇرگەن عالىمداردىڭ اتىنان, وسىنداي قيىندىقتان شىعۋ ءۇشىن قولدان كەلگەننىڭ ءبارىن جاسايمىز جانە ءتيىستى شارانىڭ بارلىعىن ءوز ۋاقىتىندا ءتيىمدى اتقارامىز دەپ بىلەمىن. بۇگىنگىدەي قاتەرلى كەزەڭدە ارقايسىمىزدىڭ جاۋاپكەرشىلىگىمىز ارتىپ وتىر. رۋحى بيىك قازاق ەلى ءوزىنىڭ اۋىزبىرشىلىگىنىڭ, ۇستامدىلىعى مەن توزىمدىلىگىنىڭ ارقاسىندا وسى ءبىر اۋىر سىناق كەزەڭىن امان-ەسەن وتەتىنىنە تولىق سەنىمدىمىن.
تىلەكتەس ەسپولوۆ,
قازاق ۇلتتىق اگرارلىق ۋنيۆەرسيتەتىنىڭ رەكتورى, ۇعا اكادەميگى