ءبىلىم جانە عىلىم مينيسترلىگى IV توقساندا قاشىقتان وقىتۋدىڭ بىرنەشە جولىن ۇسىنىپ وتىر. اتاپ ايتساق, راديو جانە تەلەارنالار ارقىلى وتكىزىلەتىن ساباقتار, ءبىلىم بەرۋ ينتەرنەت رەسۋرستارىن پايدالانۋ, شاعىن جيناقتى مەكتەپتەردەگى ءداستۇرلى وقىتۋ فورماتى جانە تاعى ءبىر باعىت – «قازپوشتا» ارقىلى.
ءبىلىم جانە عىلىم ۆيتسە-ءمينيسترى رۇستەم بيعاري مەن «قازپوشتا» اق باسقارما توراعاسى ساكەن سارسەنوۆ وسى باعىتتاعى ىنتىماقتاستىق تەتىكتەرىن تالقىلادى.
ەلىمىزدەگى كەيبىر ەلدى مەكەندەردە مەكتەپ تە, ينتەرنەت تە جوق. سوندىقتان وندا تۇراتىن مەكتەپ جاسىنداعى بالالار كورشى اۋىلدارعا كولىكپەن ارنايى جەتكىزىلىپ وتىراتىن. ەندى پاندەميا كەزەڭىندە وقۋ ماتەريالدارىن مۇعالىمدەردەن وقۋشىلارعا, وقۋشىلاردان مۇعالىمدەرگە كەرى جىبەرۋ جۇمىستارىن ۇيىمداستىرۋ قاجەت. ەلىمىزدە مۇنداي وقۋشىلاردىڭ سانى 20 مىڭنان اسادى.
اتالعان مىندەتتەردى جۇزەگە اسىرۋ ماقساتىندا تاراپتار ىنتىماقتاستىق تۋرالى مەموراندۋمعا قول قويدى. وسىعان سايكەس وقۋشىلارعا ارنالعان وقۋ ماتەريالدارى «قازپوشتا» اق پوشتا بولىمشەلەرى ارقىلى جەتكىزىلەتىن بولادى. اتا-انالارعا پوشتا بايلانىسى قىزمەتى ءۇشىن تولەم جاساۋدىڭ قاجەتى جوق.
قاشىقتان ءبىلىم بەرۋ تەحنولوگيالارىن قولدانۋ ارقىلى وقۋعا مۇمكىندىگى جوق وقۋشىلار تۋرالى دەرەكتەردى وبلىستىق جانە رەسپۋبليكالىق ماڭىزى بار قالالاردىڭ ءبىلىم باسقارمالارى وكىلدەرى ۇسىنادى.
ايتا كەتكەن ءجون, شالعاي ەلدى مەكەندەردە ءومىر سۇرەتىن وقۋشىلارعا ارنالعان وقۋ ماتەريالدارى سانيتارلىق قاۋىپسىزدىكتىڭ بارلىق نورمالارىن ساقتاي وتىرىپ, جەتكىزىلەتىن بولادى.