تابيعاتى قولايلى, كوكونىس داقىلدارى ەرتە پىسەتىن, تۇركىستان ءوڭىرىنىڭ ديقاندارى قازىر قىرىققاباتتىڭ العاشقى ءونىمىن جيناۋدا. ال جىلىجايلاردا قىزاناق پەن قيار دا ءپىسىپ تۇر. الايدا ديقاندار ونىمدەرىن قايدا وتكىزەتىندەرىن بىلمەي دال, ەلدەگى توتەنشە جاعدايعا بايلانىستى ەكسپورتقا شىعارا المايدى.
وڭىردە وندىرىلگەن 310 مىڭ توننا دايىن ءونىمنىڭ ىشكى نارىققا قاجەتى 60 مىڭ توننا. ال قالعان 250 مىڭ توننا كوكونىستى شەتەلگە ەكسپورتتاۋ جوسپارلانعان بولاتىن. شەتەلدەرمەن قاتىناستىڭ توقتاتىلعانى ازداي, ەلدەگى مەيرامحانا مەن ءدامحانالاردان دا سۇرانىس ازايعان. ديقاندار امالسىز ءونىمدى دۇكەندەر مەن بازارلارعا ارزان باعامەن وتكىزۋگە ءماجبۇر. بۇل نەسيەسى بار شارۋالاردى شىعىنعا باتىرۋدا. دەگەنمەن وبلىس اكىمى ومىرزاق شوكەەۆتىڭ دەر كەزىندە ۇكىمەتكە ماسەلەنى جەتكىزۋى ناتيجەسىندە شەكتەۋ الىنىپ, ونىمدەردىڭ كۆوتا ارقىلى وتكىزىلەتىنى كوڭىلگە دەمەۋ.
سونداي-اق وبلىستىق اۋىل شارۋاشىلىعى باسقارماسى باسشىسىنىڭ ورىنباسارى تۇرعانبەك وسپانوۆ بەرىلگەن نەسيەلەردى 1 جىلعا موراتوري رەتىندە سوزدىرۋعا رۇقسات الىنىپ جاتقانىن ايتادى.
«قازىر جەر جىرتۋ جۇمىستارى تولىق اياقتالىپ, تۇقىم سەبۋ ناۋقانى جالعاسۋدا. بيىل وڭىردەگى اۋىل شارۋاشىلىعى داقىلدارىنىڭ ەگىس كولەمىن 825 مىڭ گەكتارعا ورنالاستىرۋ جوسپارلانعان. قالاي بولعاندا دا ەلدەگى توتەنشە جاعداي مەن قاۋىپتى ىندەت اۋىل شارۋاشىلىعى ءونىمىن وندىرۋشىلەرگە وڭاي ءتيىپ تۇرعان جوق», دەيدى ت.وسپانوۆ.
بۇگىندە شارۋالار قاۋىپسىزدىك شارالارىن بارىنشا ساقتاپ, ەكى ءونىم الۋ ماقساتىندا تەر توگۋدە. ياعني كوكتەمگى دالا جۇمىستارى باسەڭدەگەن جوق.