ەلوردامىزداعى «ەسىل تولقىندارى» ارداگەرلەر ءانسامبلى وسىدان تۋرا ءبىر جىل بۇرىن نۇر-سۇلتان قالاسىنداعى ەسىل اۋداندىق اكىمدىگىنىڭ جانىنان قۇرىلعان بولاتىن. تاياۋدا باس قالاداعى دوستىق ۇيىندە ءبىر جىلدىق ەسەپتى كونتسەرت بەردى.
ءانسامبلدىڭ قۇرامىندا كەشە جالىنداپ ەڭبەك ەتكەن, ال بۇگىن زەينەتكەرلىك دەمالىستا جۇرگەن ارداقتى اعالار مەن اق جاۋلىقتى اجەلەر بار. الدى 70-تەن اسىپ, كەيىنگىلەرى الپىستىڭ ار جاق, بەر جاعىندا اياڭداپ جۇرگەن اياۋلى جاندار دەسەك قاتەلەسپەيمىز. ولاردىڭ باسقا ونەرپازداردان ەرەكشەلىگى سول ءبىر ساعاتتىق قويىلىمداعى اندەردىڭ ءبارى جاندى داۋىستا ورىندالدى. كونتسەرتتىك باعدارلامانىڭ باس جاعىنداعى اباي اندەرىنەن دايىندالعان كومپوزيتسيا سالماقتىلىعىن اڭعارتتى. بىرنەشە داۋىستا ورىندالعان حاكىم اباي اندەرى كورەرمەننىڭ كوڭىل كوكجيەگىنە جىلىلىق ۇيالاتتى. بۇل ءنومىردى ۇلى ابايدىڭ 175 جىلدىق تويىنا ارنالعان دەسەك تە ارتىق ەمەس. بۇدان سوڭ ۇمىتىلىپ بارا جاتقان, بۇگىنگى جاس تولقىن بىردە ەستىپ, بىردە ەستىپ تە كورمەگەن حالقىمىزدىڭ قازىنالى اندەرىنەن, رەترو اندەردەن سىزىلتقان نۇرساۋلە الداجۇمانوۆا, ەسبول قوشاەۆ, المابەك بەردىعاليەۆ, التىنبەك بەيسەنباەۆ, جىبەك قايىربەكوۆا, حاميتبەك ماحمۇت ۇلى, سارتاي نۇراقىشەۆ, فاريدا نۇرديلدين سەكىلدى ارداگەر اعا-اپالاردىڭ ادەمى دە, تازا داۋىستارىن ەستىگەن كورەرمەن دۇركىرەتە قول سوعىپ, رياسىز ريزاشىلىقتارىن ءبىلدىردى. باعدارلامانىڭ سوڭعى بولىمىندەگى ءبىرجان مەن سارا ليبرەتتاسىنان ءۇزىندى ءساتتى شىقتى. جارقىلداعان ساحنالىق كوستيۋمدەر, اسەم ءان, تازا ءۇن, جاندى داۋىس كورەرمەننىڭ كوڭىلىن تەبىرەنتتى.
كونتسەرت سوڭىندا ءسوز العان ەسىل اۋدانى اكىمنىڭ ورىنباسارى دارمەنيار قىدىربەك ۇلى مەن استانا قالاسى ارداگەرلەر كەڭەسىنىڭ جاۋاپتى قىزمەتكەرى سالتانات مەڭلىباەۆانىڭ, ەسىل اۋدانى ارداگەرلەر كەڭەسىنىڭ ءتورايىمى رىستى تۇرعىنبەكقىزىنىڭ قۇتتىقتاۋىنان كەيىن اكىمدىك اتىنان تابىستاعان ىقىلاس گ ۇلى شىنايى ريزاشىلىقتىڭ بەلگىسىندەي ۇلكەندەرگە جاسالعان قۇرمەت دەپ باعالادىق.
جالپى كونتسەرتتىڭ جيناقى وتۋىنە, ورىندالعان اندەردىڭ انشىلەردىڭ داۋىسىنا ساي تاڭدالۋىنا جوعارى ءبىلىمدى مۋزىكا مامانى, دوتسەنت, انسامبل جەتەكشىسى فانيدا نۇرباەۆا مەن بەساسپاپ ونەرپاز, انسامبل مۇشەسى قارلىعاش قۇسپانوۆا, مۋزىكامەن سۇيەمەلدەۋشى, بايانيست مەيرام ەلۋباەۆ كوپ ەڭبەك سىڭىرگەن.
جىل ىشىندە ۇيىمشىل ونەر ۇجىمى قالاداعى كوپتەگەن مادەني-كوپشىلىك شارالارعا قاتىسىپ, حالىقتىڭ ىستىق ىقىلاسىنا بولەنگەنىن دە ايتقان ورىندى.
ايگەرىم سەيسەنبينا,
ءانسامبلدىڭ ءانشىسى