بيىل قازاق ادەبيەتىنىڭ كلاسسيگى, اكادەميك-جازۋشى ءسابيت مۇقانوۆتىڭ تۋعانىنا 110 جىل تولماق. وسىعان وراي الماتىداعى اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە “اسا كورنەكتى جازۋشى, عالىم, مەملەكەت جانە قوعام قايراتكەرى ءسابيت مۇقانوۆتىڭ شىعارماشىلىعى جانە قازاق ادەبيەتىن وقىتۋ مەن زەرتتەۋدىڭ ماسەلەلەرى” اتتى حالىقارالىق عىلىمي-تاجىريبەلىك كونفەرەنتسيا بولىپ ءوتتى.
كونفەرەنتسيانىڭ پلەنارلىق ماجىلىسىندە ءسابيت مۇقانوۆتىڭ ءومىرى مەن شىعارماشىلىعى حاقىندا, كەشەگى كەڭەستىك كەزەڭ مەن بۇگىنگى تاۋەلسىزدىك داۋىرىندەگى ونىڭ شىعارمالارىنا دەگەن كوزقاراستار جونىندە, حالىق جۇرەگىنەن بەرىك ورىن العان تۋىندىلارىنىڭ كوركەمدىك قىرلارى تۋرالى, ۇرپاق يگىلىگىنە اينالاتىن رۋحاني قازىنانىڭ ماڭىزى مەن ءمانى, جازۋشىلىق شەبەرلىكتىڭ قۇپيالارى جايىندا بەلگىلى ادەبيەت زەرتتەۋشىلەرى سەرىك قيراباەۆ, تۇرسىنبەك كاكىشەۆ, تەمىرحان تەبەگەنوۆ, توكەن جۇماجانوۆ, سەرىك ماقپىر ۇلى, تاريحشى مامبەت قويگەلدى, تۇركيالىق عالىم شابان ايدوعدى, س.مۇقانوۆ پەن ع.مۇسىرەپوۆتىڭ مەملەكەتتىك ادەبي-مەموريالدىق مۋزەي كەشەنىنىڭ ديرەكتورى ءادىلعازى قايىربەكوۆ جانە تاعى باسقالار عىلىمي وي-تۇجىرىمدارىن ورتاعا سالىپ, پىكىر ءبولىستى. “س.مۇقانوۆتىڭ كوركەمدىك الەمى”, “اكادەميك س.مۇقانوۆ – كورنەكتى سىنشى, ادەبيەت زەرتتەۋشىسى”, ء“سابيت مۇقانوۆ شىعارماشىلىعىن, كەڭەس جانە قازىرگى ءداۋىر شىعارمالارىن ورتا جانە جوعارى مەكتەپتەردە وقىتۋ ماسەلەلەرى” دەگەن تاقىرىپتار بويىنشا سەكتسيالىق ماجىلىستەردە ەلۋگە جۋىق باياندامالار قامتىلعان. كونفەرەنتسيا ماتەريالدارى الداعى ۋاقىتتا جەكە جيناق بولىپ جارىق كورمەك.
راشيدا وتاروۆا.