استانا قالاسىندا ەلىمىز كيكبوكسينگىنىڭ 20 جىلدىق مەرەكەسىنە ورايلاستىرىلىپ ۇيىمداستىرىلعان ەل كۋبوگى ءوز مارەسىنە جەتتى. 25-28 ناۋرىز ارالىعىندا ءوتىپ, قازاقستاننىڭ 13 وبلىسى مەن استانا, الماتى قالالارىنىڭ 200-دەن استام ۇزدىك كيكبوكسشىلارى قاتىسقان بۇل سىندا ەل جارىستارىنىڭ بىرنەشە دۇركىن چەمپيوندارى, الەم چەمپيوناتتارىنىڭ, ازيا ويىندارىنىڭ ءجۇلدەگەرلەرى مەن جەڭىمپازدارى بولدى.
اقتىق كەزەڭدەر فۋلل-كونتاكت بولىمىندە ەرلەر اراسىندا 11, ايەلدەر اراسىندا 5 سالماق دارەجەسىندە وتسە, لوۋ-كيك بولىمىندەگى جەڭىمپازدار 12 سالماقتا انىقتالدى.
ايەلدەر اراسىنداعى جارىستاردا قاراعاندى جانە اقمولا وبلىستارىنىڭ سپورتشىلارىنا تەڭ كەلگەن كيكبوكسشىلار تابىلمادى. وتكەن جىلعى ەل چەمپيونى, ۆەتنامدا وتكەن جابىق عيماراتتارداعى ازيا ويىندارىنىڭ قولا جۇلدەگەرى اقمولالىق ءسانيا ءسۇلەيمەنوۆا 48 كيلو سالماقتا اتاعىن بۇل جولى دا ساقتاپ قالدى. ونىڭ جەرلەسى مارجان ءالىموۆا اقتىق كەزەڭدە 52 كيلو سالماق دارەجەسىندە شىعىسقازاقستاندىق سپورتشى, تاي ەلىندە وتكەن ازيا ويىندارىنىڭ جۇلدەگەرى جادىرا قۋانىشەۆانى جەڭىپ شىقتى. 56 كيلودا يرينا زەنينا جەڭىمپاز اتانسا, 65-تە اياليتا ساحوۆا جەڭىمپاز اتاندى. ەكەۋى دە قاراعاندى وبلىسىنىڭ وكىلى.
65 كيلودان اسا سالماق دارەجەسىندە اقتىق كەزەڭنىڭ جەڭىمپازى رەتىندە وڭتۇستىك قازاقستان وبلىسىنىڭ وكىلى ءاليا قامباروۆا تانىلدى.
ەرلەر اراسىنداعى فۋلل-كونتاكت بولىمىندەگى اقتىق كەزەڭنىڭ سايىستارى العاشقى سالماق دارەجەسىنەن باستاپ اسا تارتىستى ءوتتى. ماسەلەن, 54 كيلودا فينالدا 2007 جىلعى الەم چەمپيونى, قوستانايلىق ديدار كۇنباتىروۆ پەن 2009 جىلعى قازاقستان كۋبوگىنىڭ جەڭىمپازى, اقتوبە وبلىسىنىڭ سپورتشىسى ەركەبۇلان وماروۆ كەزدەستى. بۇل جەكپە-جەكتە ءبىر داۋىس ەرەكشەلىگىمەن جەڭىسكە ديدار جەتتى. 57 كيلودا شىعىسقازاقستاندىق الەمجان قۇدايبەرگەنوۆ سقو وكىلى 2007 جىلعى الەم چەمپيونى ءامىر ءتىناليندى جەڭدى.
لوۋ-كيك بولىمىندە 57 كيلو سالماق ءدارەجەسىندە الەمجاننىڭ اعاسى, ازيا ويىندارىنىڭ ەكى دۇركىن جەڭىمپازى (ماكاو-2007, تايلاند-2009) باۋىرجان قۇدايبەرگەنوۆ تە اسا تارتىستى جەكپە-جەكتە 2008 جىلعى جاستار اراسىنداعى الەم چەمپيونى ەرزات سەتەرباەۆتان باسىم ءتۇستى.
67 كيلو سالماقتاعى سايىستى ەلوردا جانكۇيەرلەرى اسىعا كۇتكەن ەدى. استانالىق اسەت تايعانوۆ پاۆلودارلىق ەرسايىن قاسامباەۆپەن كەزدەستى. وتكەن جىلعى ەل چەمپيوناتىنىڭ اقتىق كەزەڭىندە كەزدەسكەندە دە جەڭىس ەرسايىننىڭ ۇلەسىنە تيگەن-ءدى. بۇل جولى دا ەرسايىننىڭ اسىعى الشىسىنان ءتۇستى.
71 كيلو سالماقتا دا باس جۇلدە پاۆلودار وبلىسىنىڭ ۇلەسىنە ءتيدى. سايان جاقىپوۆ فينالدا قوستانايلىق سپورتشى ەرىك بەرجانوۆتان ايلاسىن اسىردى.
بۇل جىلعى جارىسقا قاتىسۋشىلاردىڭ ءبارى الدىن-الا جارنالاردى جينادى. جينالعان 500 000 تەڭگە قاراجات – الماتى وبلىسىنىڭ قىزىلاعاش اۋىلىنداعى توتەنشە جاعدايدان زارداپ شەككەندەرگە قارجىلاي كومەك كورسەتۋ ءۇشىن اۋدارىلماق نيەتتە ەكەن.
ءابدىراحمان قىدىربەك, استانا.