كوروناۆيرۋس ينفەكتسياسىن جۇقتىرماۋدىڭ باستى جولدارىنىڭ ءبىرى – ساقتانۋ شارالارىن مۇقيات ساقتاۋ ەكەندىگى بەلگىلى. وسى ورايدا, اقتوبەلىك كاسىپكەر حايدار ءىلياسوۆ ەلىمىزدە تۇڭعىش رەت زالالسىزداندىرۋ تۋننەلىن جاساپ شىعاردى. ونىڭ پايداسى مەن ەرەكشەلىگى نەدە؟
بۇگىندە ەلىمىزدىڭ بارلىق قالالارىندا زالالسىزداندىرۋ جۇمىستارى جۇرگىزىلىپ كەلەدى. ءجون-اق. مۇنداي جاعدايدا پاندەميانىڭ تارالۋ قاۋپى تۋننەل دەيدى. جاڭاشىل جان ويلاپ تاپقان قۇرالدىڭ اتقاراتىن قىزمەتى بۇدان دا اسىپ تۇسەدى. ياعني, ارنايى قۇراستىرىلعان تۋننەلدىڭ ىشىمەن ءجۇرىپ وتكەندەر بويىنا دەزينفەكتسيالىق سۇيىقتىقتى ءسىڭىرىپ, زالالسىزدانىپ شىعادى. سودان سوڭ قاۋىپتى ۆيرۋستان ساقتانۋ يممۋنيتەتى پايدا بولادى ەكەن.
– ماعان بۇل وي ەلىمىزدە كوروناۆيرۋس ينفەكتسياسى باستالعان كەزدە كەلىپ ەدى. وسىنداي قيىن كەزەڭدە ەل-جۇرتىما ءبىر پايدامدى تيگىزبەك ويمەن كۇنىنە ءجۇز ويلانىپ, مىڭ تولعانىپ وسى زالالسىزداندىرۋ تۋننەلىن جاساپ شىعارۋعا تىرىستىم. وعان وتاندىق ونىمدەر پايدالانىلدى. قازىرگى كەزدە ەل تۇرعىندارىنا اۋاداي قاجەت قۇرالدىڭ سىناقتان ويداعىداي وتكەنى مەن ءۇشىن ءبىر مەرەي, – دەيدى بۇل جونىندە گازەت تىلشىسىنە ەلىمىزدە بالاماسى جوق جاڭا جابدىقتىڭ يەسى حايدار ءىلياسوۆ.
ايرىقشا تۋننەلدىڭ ىشىمەن ءجۇرىپ ءوتىپ, ونىڭ جاراقتاندىرىلۋىنا وڭ باعا بەرگەن اقتوبە وبلىسىنىڭ اكىمى وڭداسىن ورازالين مۇنداي تۋننەلدى اقتوبە قالاسىنداعى وزگە ورىندارعا دا ورناتۋ كەرەكتىگىنە توقتالدى.
سوعان سايكەس جوبا يەسى ونى تاياۋ كۇندەردە وبلىس ورتالىعىنداعى ساۋدا ۇيلەرى مەن اۋرۋحانا عيماراتتارىنىڭ جانىنا ورناتۋدى ويلاستىرۋدا. ونىڭ العا قويعان ماقساتى – كەم دەگەندە ءجۇز زالالسىزداندىرۋ تۋننەلىن شۇعىل قۇراستىرۋ بولىپ وتىر. بۇل رەتتە ول ءوز ءونىمىنىڭ كەم-كەتىگىن كۇننەن-كۇنگە جەتىلدىرە ءتۇسۋدى ءجون كورەدى. كاسىپكەردىڭ ايتۋىنشا, قازىردىڭ وزىندە وعان وبلىس اۋداندارىنان جانە اتىراۋ مەن الماتى وبلىستارىنان تاپسىرىستار ءتۇسىپتى.
حايدار ءىلياسوۆ وزىنىڭ زالالسىزداندىرۋ قۇرىلعىسىن تۋركيا ماماندىرىنىڭ تاجىريبەسىنە سۋيەنە وتىرىپ جاساعان.
اقتوبە