مەملەكەت باسشىسى نۇرسۇلتان نازارباەۆ قازاقستان رەسپۋبليكاسى پارلامەنتى ءماجىلىسىنىڭ ءتوراعاسى ورال مۇحامەدجانوۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
و.مۇحامەدجانوۆ پرەزيدەنتتى قازاقستان رەسپۋبليكاسى پارلامەنتىنىڭ ءتورتىنشى سەسسياسىنىڭ اشىلۋىندا ەلباسىنىڭ سويلەگەن سوزىندە جانە “جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا مۇمكىندىكتەرى” اتتى قازاقستان حالقىنا جولداۋىندا بەلگىلەنگەن مىندەتتەردى ورىنداۋ ءجونىندەگى پالاتا دەپۋتاتتارىنىڭ, “نۇر وتان” حدپ فراكتسياسىنىڭ جۇمىسى تۋرالى حاباردار ەتتى.
اڭگىمەلەسۋ بارىسىندا سونداي-اق, ەلىمىزدىڭ جەدەل يندۋستريالىق-يننوۆاتسيالىق دامۋ باعدارلاماسىنىڭ قۇقىقتىق بازاسىن زاڭنامالىق تۇرعىدا قامتاماسىز ەتۋ ءجونىندەگى پارلامەنتشىلەردىڭ قىزمەتى تۋرالى اڭگىمە بولدى.
– پرەزيدەنت دەپۋتاتتىق كورپۋستىڭ جۇمىسىن جوعارى باعالادى جانە بىرقاتار ماڭىزدى زاڭ جوبالارىن جەدەل جانە ساپالى ءازىرلەۋدى قامتاماسىز ەتۋ جونىندە ءبىرقاتار ناقتى مىندەتتەر قويدى, – دەدى ءماجىلىس توراعاسى جۋرناليستەرگە ارنالعان بريفينگتە.
* * *
مەملەكەت باسشىسى نۇرسۇلتان نازارباەۆ ادىلەت ءمينيسترى راشيد تۇسىپبەكوۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
مينيستر پرەزيدەنتتى ۆەدومستۆونىڭ اعىمداعى قىزمەتى, “جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا ءمۇمكىندىكتەرى” اتتى پرەزيدەنتتىڭ قازاقستان حالقىنا جولداۋىندا العا قويىلعان مىندەتتەردى, سونداي-اق قازاقستان رەسپۋبليكاسىنىڭ 2020 جىلعا دەيىنگى دامۋىنىڭ ستراتەگيالىق جوسپارىن ورىنداۋ تۋرالى حاباردار ەتتى. اتاپ ايتقاندا, زاڭنامالىق قىزمەتتى جەتىلدىرۋ ءجونىندە قابىلدانعان شارالار, تۇرعىندارعا مەملەكەتتىك قىزمەت كورسەتۋ ساپاسىن ارتتىرۋ, ەلىمىزدىڭ قىلمىستىق-اتقارۋ جۇيەسىندەگى ىستەردىڭ جاعدايى تۋرالى باياندادى.