ناۋرىزدىڭ سوڭىنا دەيىن بارلىق ساقتىق شارالارى قاتاڭ ساقتالىپ, ىندەتتەن امان كەلگەن تۇركىستان وبلىسىن كوروناۆيرۋس اينالىپ وتپەدى. ايدىڭ سوڭىندا جەتىساي اۋدانى تۇرعىنىنىڭ ىندەت جۇقتىرعانى جاريا ەتىلدى. ال ءساۋىردىڭ العاشقى كۇنى اتالمىش اۋداننان تاعى 4 ادامنان اۋرۋ انىقتالدى.
ىندەتتى جەتىسايعا «جەتكىزگەن» ازاماتشا 21 ناۋرىز كۇنى نۇر-سۇلتان قالاسىنان پاۆلودار-قىزىلوردا باعىتىنداعى پوەزبەن شىعىپ, قاراعاندى قالاسىنا توقتاعان. التى ساعات ۆوكزالدا وتىرعان ول, ارى قاراي پەتروپاۆل-قىزىلوردا باعىتىنداعى پوەزبەن شىمكەنت قالاسىنا كەلگەن. ءسويتىپ جەكە كولىكپەن جەتىساي قالاسىنا جەتكەن. ناۋرىزدىڭ 27-ىنەن قىزۋى كوتەرىلىپ اۋىرعان ول اۋرۋحاناعا 30-ىنا قارالعان. العاشقىدا ناۋقاسپەن قارىم-قاتىناستا بولعان 16 ادام انىقتالعان-دى. كەيىن بۇل سان وسە تۇسكەن. ناۋقاسپەن بايلانىستا بولعان ادامداردى تەكسەرۋ بارىسىندا, وتباسىنىڭ 3 مۇشەسىنىڭ ساراپتاماسى وڭ ناتيجە بەردى. ال COVID-19 ساراپتاماسى وڭ قورىتىندى بەرگەن بەسىنشى جاعداي الماتى قالاسىنا ىسساپارمەن بارىپ كەلگەن ازاماتتان انىقتالدى. تۇركىستان وبلىسى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى نۇربەك نىشانوۆ قازىرگى تاڭدا ناۋقاستار تولىق دارىگەرلەردىڭ باقىلاۋىنا الىنعانىن, جاعدايلارى قاناعاتتانارلىق دارەجەدە ەكەنىن حابارلادى. قارىم-قاتىناستا بولعان بارلىق ادامعا ستاتسيونارلىق وقشاۋلاۋ شارالارى جۇرگىزىلگەن. ءتيىستى حاتتاماعا سايكەس, ەمدىك شارالار جاسالىنۋدا.
تۇركىستان وبلىسىنىڭ اكىمى ومىرزاق شوكەەۆ وڭىردە ورىن العان جاعدايعا بايلانىستى تۇرعىندارعا ۇندەۋ جولدادى. ەپيدەميولوگ ماماندار تاراپىنان تىركەلگەن اۋرۋ وشاقتارىندا زالالسىزداندىرۋ, بايلانىستا بولعانداردى تابۋ جانە وقشاۋلاۋ بويىنشا ەپيدەمياعا قارسى ءىس-شارالار ۇيىمداستىرىلعان. ينفەكتسيا تابىلعان جەتىساي اۋدانىنداعى ابدىحالىق اۋىلى مەن اۋدان ورتالىعىنداعى شاعىناۋداندا كارانتين جاريالاندى. وبلىس اكىمى حالىققا ۇندەۋىندە جەتىساي اۋدانىنا دەزينفەكتسيا, دەنساۋلىق ساقتاۋ, الەۋمەتتىك قورعاۋ سالاسىنان ارنايى مامانداردان قۇرىلعان ءموبيلدى توپ جىبەرىلگەنىن ءمالىم ەتتى. قوسىمشا كومەك رەتىندە مەديتسينالىق جابدىقتار مەن كولىكتەر دايىندالعان. وبلىستىڭ وزگە اۋداندارىنان ينفەكتسيونيست جانە رەانيموتولوگتاردان قۇرالعان 6 بريگادا جەتىسايعا اتتانعان. وبلىستىڭ باس ينفەكتسيونيست دارىگەرى اۋداندا وسى شارالارعا باسشىلىق ەتەدى. سونداي-اق وبلىس اكىمى اۋدان اكىمىنە جانە ءتيىستى ورگاندارعا ەلدى مەكەندەر شەكاراسىنا بلوك-بەكەتتەر قويۋدى تاپسىرعانىن مالىمدەدى. توتەنشە جاعداي رەجيمىن بۇزعان ازاماتتار زاڭ اياسىندا جاۋاپقا تارتىلاتىنىن ەسكەرتتى. «اۋداندا ينفەكتسيا وشاعى مەن قوعامدىق ورىنداردا اۋقىمدى دەزينفەكتسيا جۇمىستارى جۇرگىزىلەدى. بۇل وڭىردە ىندەتتىڭ تارالۋ قارقىنى وتە جوعارى. وسى رەتتە وبلىس تۇرعىندارىن توتەنشە جاعدايعا بايلانىستى قابىلدانعان شارالارعا تۇسىنىستىكپەن قاراپ, ءتيىستى تارتىپتىك شارالاردى ساقتاۋعا, دارىگەرلەردىڭ نۇسقاۋلىقتارىن بۇلجىتپاي ورىنداۋعا شاقىرامىن», دەدى وبلىس اكىمى ۇندەۋىندە. سونداي-اق ومىرزاق شوكەەۆ تۇرعىنداردى الەۋمەتتىك جەلىلەردى شارلاعان ءارتۇرلى اقپاراتتارعا سەنبەي, مەملەكەتتىك ورگاندار تاراتقان رەسمي مالىمەتتەرگە عانا ءمان بەرۋگە شاقىردى. بۇگىندە ينفەكتسيا وشاعىندا ءتيىستى دەپارتامەنت, باسقارما ماماندارىمەن جانە وبلىستىق ينفەكتسيونيست دارىگەرمەن ەپيدەميولوگيالىق زەردەلەۋ جۇمىستارى جانە ىندەتكە قارسى شارالار كەشەنى جۇرگىزىلۋدە.
ايتا كەتەلىك, وبلىستا Covid-19 كوروناۆيرۋستىق ينفەكتسيادان قولايسىز ەلدەردەن كەلگەن 495 ادام مونيتورينگتىك باقىلاۋعا الىنعان. ونىڭ 9-ى 1 «ا» ساناتىنداعى, ال 486 ادام 1 «ب» ساناتىنداعى ەلدەردەن كەلگەن.
تۇركىستان وبلىسى