الماتى قالاسى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ 12 سىنىپ وقۋشىسى ءسۇلتانالى نۇرمان ۇلى گارۆارد ۋنيۆەرسيتەتىنە وقۋعا ءتۇستى. سونداي-اق زياتكەر ريچموند ۋنيۆەرسيتەتى, دارتمۋد كوللەدجى جانە كورەيانىڭ الدىڭعى قاتارلى عىلىمي زەرتتەۋ جانە تەحنولوگيا ۋنيۆەرسيتەتىنەن شاقىرتۋ الىپ وتىر.
جوو-عا ءتۇسۋ تۋرالى وتىنىمدەرىندە نەگىزگى قىزىقتىراتىن سالالارى رەتىندە ءسۇلتانالى ماتەماتيكا مەن كينوتانۋ ونەرىن اتاپ كورسەتكەن. تۇلەك «European Mathematical Cup» كىشى ليگاسىنىڭ 2 ورىن (2016), ماتەماتيكادان وتكەن «ماتەماتيكا بەز گرانيتس» وليمپياداسىنىڭ كۇزگى حالىقارالىق تۋرىنىڭ 1 ورىن (2016) جانە اعىلشىن تىلىنەن «دارىن» رەسپۋبليكالىق عىلىمي-پراكتيكالىق ورتالىعى ۇيىمداستىرعان رەسپۋبليكالىق وليمپيادانىڭ 2 ورىن يەگەرى. سونداي-اق ءسۇلتانالى مەكتەپتىڭ درامالىق ۇيىرمەسىنە قاتىسىپ, مەكتەپ كينوكلۋبىنىڭ نەگىزىن قالاعان. ۇيىرمە توبىمەن بىرگە فرانتسيادا وتكەن «European Festival of Arts and Siences» فەستيۆالىندە ونەر كورسەتكەن. ءتورت جىل قاتارىنان فرانتسۋز ءتىلىن وقيدى, سونىڭ ارقاسىندا فرانتسيانىڭ وڭتۇستىگىندە ورنالاسقان «Centre International de Valbonne» جازعى مەكتەبىنە جولداما العان.
«ماتەماتيكادان جانە اعىلشىن تىلىنەن حالىقارالىق جانە رەسپۋبليكالىق وليمپيادالاردىڭ جۇلدەگەرىمىن. ودان بولەك, كينەماتوگرافيانى قاتتى جاقسى كورەمىن. ءوزىم تۇسىرگەن «Admission» قىسقا مەتراجدى انيماتسيالىق ءفيلمىن ەرەك ماقتان تۇتام. ونى مەكتەپتەگى وقۋىمنان تىس اينالىساتىن جۇمىسىم رەتىندە كورسەتكەن بولاتىنمىن. ازداپ شيكى بولعانىنا قاراماستان, ارمانىمداعى وقۋعا تۇسۋگە ەداۋىر اسەر ەتتى دەپ ويلايمىن. جازدا «قازاقفيلم» كينوستۋدياسىندا ستسەناريست ەرلان تولەۋتايدىڭ مەنتورلىعىندا بولىپ, 3D انيماتسيانى مەڭگەرگەن بولاتىنمىن», - دەدى زياتكەرلىك مەكتەپ تۇلەگى.
ايتا كەتەيىك, وتكەن جىلى الماتى قالاسى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ ەكى بىردەي تۇلەگى سەليمجان چالىشكان مەن اقنازار قاجىمۇرات زياتكەرلەر اراسىندا العاش رەت گارۆارد ۋنيۆەرسيتەتىنىڭ گرانت يەگەرلەرى اتانعان بولاتىن.