... بۇل كۇندەرى جەر-دۇنيەنى جايلاعان ىندەت ءبىزدى دە اينالىپ وتپەدى. اۋىر كۇندەر تۋدى. ەلدىڭ, حالىقتىڭ سابىر-شىدامى سىنالار شاقتى باستان كەشىرىپ جاتىرمىز.
مەملەكەت باسشىسى قاسىم-جومارت كەمەل ۇلىنىڭ حالقىنا جولداعان ءسوزى ءار ادامنىڭ جۇرەك-جادىنا دەمەۋ بولارلىق ۇلكەن مانگە تولى بولدى. ەل الەۋەتىن ساقتاپ, ءاربىر ازاماتتىڭ جاعدايىنا قامقورلىقپەن قاراۋدىڭ مۇمكىندىكتەرىن جاريا ەتتى, حالىقتى ابىرجىماي بىرلىكتە بولۋعا شاقىردى, قامسىز قالماۋدىڭ ۇكىمەتتىك شارالارىن بەلگىلەدى. مۇنىڭ ءبارى اينالىپ كەلگەندە ونىڭ تۋعان حالقىنا دەگەن ىزگى نيەتىن, ءوزىنىڭ كومەك قولىن سوزعانىن بىلدىرسە كەرەك.
الەمدىك دەڭگەيدى جايلاعان ء«تاجدى» دەرتتىڭ زاردابىن ەل كولەمىندە مەيلىنشە شەكتەۋدىڭ مەملەكەتتىك تۇرعىداعى تاعى ءبىر شاراسى رەتىندە ۇلكەن قالالار وقشاۋلاندى. كوڭىلى كۇپتى حالىقتىڭ كوڭىلى بۇل دەرتتىڭ قانشالىقتى قاۋىپتى ەكەنىن وسىدان دا ءبىلىپ جاتقانى ءسوزسىز...
مەملەكەت باسشىسىنىڭ ەلگە دەگەن قامقورلىقپەن جاساعان ماڭىزدى مالىمدەمەسى ەل بىرلىگىن ساقتاۋعا, قيىندىققا مويىماۋعا كۇش-جىگەر بەردى. ەلباسى ايتقانداي, ارعى-بەرگى كەزەڭدەردەگى قازاق تاعدىرىندا بولعان ەل مەن ەر سىنالار اۋىرتپالىقتاردى قوسپاعاندا, تاۋەلسىزدىكتىڭ العاشقى جىلدارىنداعى قيىنشىلىقتارعا مويىماعان حالقىمىز بۇل سىناقتان دا امان-ەسەن وتەرى انىق!
حالىقتىڭ الەۋمەتتىك جاعىنان از قامتىلعان توپتارىنا, اسىرەسە زەينەتكەرلەر مەن جاردەماقى الۋشىلارعا ۇستەمە كومەك بەرۋ ۇرەيمەن وتىرعان ۇركەردەي جۇرتىمىزعا دەمەۋ بولدى.
الەۋمەتتىك-رۋحاني ءومىرىمىزدىڭ نەگىزىن, وركەندەۋىمىزدىڭ ەكونوميكالىق تىرەگىن شايقالتپاي, بىرلىگىمىزدى, تاباندىلىعىمىزدى اسا قاجەت ەتەتىن سىناقتى كۇندەردەن امان-ەسەن وتۋگە بارشامىز ءبىر كىسىدەي اتسالىسايىق, اعايىن! ەل تىنىشتىعىنا, ەلدىڭ بۇتىندىگىنە مۇددەلى قازاق ەلىنىڭ ءاربىر سانالى ازاماتى وسىنى ەلىن, حالقىن سۇيگەن جۇرەگىمەن سەزىنسە ەكەن دەگەن تىلەگىم بار! بولاشاعىمىز باياندى بولعاي!..
ءمادي ايىمبەتوۆ,
جازۋشى, «قۇرمەت» وردەنىنىڭ يەگەرى