الماتىدا كوروناۆيرۋس جۇقتىرعان تۇرعىنداردىڭ 97 پايىزى سىرتتان جۇقتىرىپ كەلگەن. بۇل تۋرالى بۇگىنگى ونلاين-بريفينگتە قالالىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايزات مولداقاسىموۆا حاباردار ەتتى.
الماتى قالاسىنىڭ باس سانيتار دارىگەرىنىڭ ايتۋىنشا, كوروناۆيرۋسقا شالدىققانداردىڭ 3 پايىزى عانا ۆيرۋستى قازاقستاندا جۇقتىرعان. «وسى ۋاقىت ارالىعىندا 13 ناۋرىزدان باستاپ ىندەتتى ءورشۋى 3 رەت بايقالدى.
5-ءشى كۇنى – تاۋلىگىنە 9 ادام, 15-ءشى كۇنى – 16 ادام, 18-ءشى كۇنى – 10 ادام تىركەلگەن. تالداۋ ناتيجەلەرىنە سايكەس 73 ادامنىڭ 97 پايىزى ۆيرۋستى سىرتتان جۇقتىرىپ كەلگەنى انىقتالدى. باسقا ەلدەن كەلگەن 26 ادام كەلەسى كۇنى-اق 45 ادامعا جۇقتىرعان. الماتىدا جۇقتىرعان 2 ناۋقاستىڭ بايلانىستا بولعان ادامدارى ساناۋلى عانا», – دەيدى باس سانيتار.
قالالىق باس سانيتار دارىگەرى ينفەكتسيا كوبىنە قاي ەلدەردەن كەلگەنىن بىلاي جىكتەدى: «اۋىرعانداردىڭ 40% – ماسكەۋدەن, 23% – بەرلين-الماتى رەيسىنەن, 20% – سانكت-پەتەربۋرگ–الماتى رەيسىنەن, 17% – مينسك–الماتى رەيسىمەن كەلگەندەر».
ايزات مولداقاسىموۆا ايتۋىنشا, اۋىرعاندار جاس ەرەكشەلىگىنە قاراي توپتاستىرىلعان. ولاردىڭ كوپشىلىگى – 30-39 جاس ارالىعىندا, ودان كەيىنگىلەرى – 20-29 جاس ارالىعىندا, ءۇشىنشى توپقا 50-59 جاستاعى ادامدار كىرەدى. الماتىدا كوروناۆيرۋس جۇقتىرعانداردىڭ 62,5% – ايەلدەر, 37,5% – ەرلەر.
الماتى