بۇگىنگى تاڭدا ساقتىق شارالارىن كۇشەيتۋ ماقساتىندا تۇركىستان وبلىسىنىڭ شەكارالىق جەرلەرىنە 35 بلوك-پوست قويىلعان. تاۋلىك بويى جۇمىس ىستەيتىن بلوك-پوستتاردان ارى-بەرى وتەتىن مىڭداعان كولىك تىركەلىپ جانە ونداعى جولاۋشىلاردىڭ تەكسەرىلەتىنى ءمالىم. كەيدە كولىكتىڭ كوپتىگىنەن كەزەك كۇتىپ قالاتىن جايتتەردىڭ دە كەزدەسەتىنى زاڭدى. بۇل ورايدا كوپشىلىك جۇرگىزۋشىلەر مەن جولاۋشىلاردىڭ تۇسىنىستىكپەن قاراۋى دا مادەنيەتتىلىكتىڭ, ادەپتىلىكتىڭ ءبىر كورىنىسى دەر ەدىك. الايدا...
كەنتاۋ-تۇركىستان باعىتىنداعى باقىلاۋ-وتكىزۋ بەكەتىنە بارعان تۇركىستان وبلىسى اكىمىنىڭ ورىنباسارى ساكەن قالقامانوۆ كەلەڭسىز كورىنىستىڭ كۋاگەرى بولىپتى.
«كولىكتەر زاڭدى تالاپقا باعىنباي, 2-3 قاتارعا تۇرىپ, بەكەتتەن كەزەكسىز وتۋگە ارەكەت جاساۋدا. بۇل ءوز كەزەگىندە كەپتەلىس تۋدىرىپ, ازاماتتاردىڭ ۋاقىتتارىن الۋدا. پوليتسيا قىزمەتكەرلەرى زاڭعا باعىنباعان ادامدارعا ايىپپۇل سالىپ, كولوننانىڭ سوڭىنا كەزەككە قايتا جىبەرۋدە. ءتىپتى «الەم حالىقتارى جازۋشىلارى وداعىنىڭ» مۇشەسىمىن دەگەن ازاماتشا كەزەكتەن تىس وتكىزۋىن تالاپ ەتىپ شۋ شىعاردى. زاڭ بارىنە ورتاق بولعاندىقتان, ول ازاماتشانىڭ كولىگى دە كەزەك سوڭىنا جىبەرىلدى. ەگەر ءبىز پوليتسيا تالاپتارىنا باعىنباي, زاڭدى ساقتاماساق, ءبىر-ءبىرىمىزدى سىيلاماساق, كەزەكتە ۇزاق تۇراتىنىمىز انىق. بارلىق ازاماتتارعا ايتارىم, قالاارالىق قوزعالىستى توقتاتىپ, ۇيدە وتىرىڭىزدار دەگىم كەلەدى. سەنبى-جەكسەنبى كۇندەرى «شۇعىل» جۇمىستاردىڭ بارلىعىن توقتاتۋ قاجەت. اكىمدىك پەن تج شتابى ايتقان ەرەجەلەردى ساقتاۋدى وتىنەمىن!», دەيدى ساكەن قالقامانوۆ الەۋمەتتىك جەلىدەگى جازباسىندا.
تۇركىستان وبلىسى