الماتىدا اقشا ايىرباستاۋ نۇكتەلەرى كەشكى ساعات 16:00-گە دەيىن عانا جۇمىس ىستەيدى. بۇل تۋرالى قالا اكىمدىگىنىڭ ءباسپاسوز قىزمەتى حابارلادى. اقشا ايىرباستاۋ ورىندارىنىڭ جۇمىس ۋاقىتى مەگاپوليستە كوروناۆيرۋستىڭ تارالۋىن بولدىرماۋ ماقساتىندا شەكتەلىپ وتىر.
«COVID-19 ينفەكتسياسىنىڭ تارالۋىنا جول بەرمەۋ ماقساتىندا الماتى قالاسى اۋماعىندا كارانتين جانە توتەنشە جاعداي كەزەڭىندە الماتى قالاسى بويىنشا كوروناۆيرۋستىق ينفەكتسيانىڭ تارالۋىنىڭ الدىن الۋ جونىندەگى جەدەل شتاب توتەنشە جاعداي رەجيمىنىڭ ارەكەت ەتۋ ۋاقىتىندا قالادا ۋاكىلەتتى بانكتەردىڭ (ولاردىڭ جۇمىس كەستەسىنە سايكەس) جانە قولما-قول شەتەل ۆاليۋتاسىمەن ايىرباستاۋ وپەراتسيالارىن جۇزەگە اسىرۋعا قۇقىعى بار ۋاكىلەتتى ۇيىمداردىڭ ايىرباستاۋ پۋنكتتەرىنىڭ جۇمىسىن نۇر-سۇلتان قالاسىنىڭ ۋاقىتى بويىنشا ساعات 10:00-دەن 16:00-گە دەيىن ۋاقىتشا شەكتەۋگە شەشىم قابىلدادى», دەلىنگەن حابارلامادا.