30 ناۋرىزدا قازاقستان رەسپۋبليكاسىنىڭ يسلام كونفەرەنتسياسى ۇيىمىنداعى (يكۇ) تۇراقتى وكىلدىگى ءوز جۇمىسىن باستادى. بۇل قادام قۇرامىنا ەۋروپا, ازيا, افريكا جانە امەريكانىڭ 57 مەملەكەتى كىرەتىن بەدەلدى حالىقارالىق ۇيىممەن ءبىزدىڭ ەلدىڭ قارىم-قاتىناسىن نىعايتۋعا باعىتتالعان.
وكىلدىكتىڭ اشىلۋى كەلەر جىلعى قازاقستاننىڭ يكۇ-عا توراعالىعى اياسىندا ەرەكشە مانگە يە. سونىمەن قاتار, بۇل شەشىم استانانىڭ مۇسىلمان الەمى مەملەكەتتەرىمەن ىنتىماقتاستىقتى ودان ءارى كەڭەيتۋگە ناقتى بەل بۋعاندىعىن اڭعارتادى. اتالعان ەلدەر قازاقستاننىڭ حالىقارالىق ارەناداعى باستامالارىن قولداپ, ءبىزدىڭ ەل اۋماعىنداعى الەۋمەتتىك-ەكونوميكالىق جانە ينفراقۇرىلىمدىق جوبالاردى جۇزەگە اسىرۋدا ايتارلىقتاي قولعابىس ەتۋدە. قازاقستاننىڭ يكۇ-داعى وكىلدىگىنىڭ باسشىسى بولىپ باقىت باتىرشاەۆ تاعايىندالدى.
سول كۇنى تۇراقتى وكىلدىكتىڭ باسشىسى يكۇ باس حاتشىسى, پروفەسسور ەكمەللەدين يحسانوعلۋمەن كەزدەسۋ وتكىزدى. كەزدەسۋ بارىسىندا قازاقستاندىق ديپلومات ارىپتەسىنە ەقىۇ-نىڭ ءىس باسىنداعى توراعاسى, قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى ق.ساۋداباەۆتىڭ جولداۋىن تابىستادى.
اڭگىمە بارىسىندا ەكمەللەدين يحسانوعلۋ استانانىڭ حالىقارالىق ارەناداعى زور بەدەلىن اتاي وتىرىپ, قازاقستاننىڭ اتالعان ۇيىمداعى اتقارىپ جاتقان جۇمىسىنا جوعارى باعا بەردى. سونداي-اق, 2011 جىلى قازاقستاننىڭ يكۇ-عا توراعالىعى كەزىندە ۇيىمعا جاڭا سەرپىلىس بەرەتىندىگىنە سەنىمىن ءبىلدىردى. سونىمەن قوسا, يكۇ باس حاتشىسى قازاقستان مەن تۇركيا سىرتقى ساياسي ۆەدومستۆولارى باسشىلارىنىڭ 2010 جىلدىڭ 7-9 ماۋسىمىندا ىستامبۇلدا وتەتىن ازياداعى ءوزارا ىقپالداستىق جانە سەنىم شارالارى جونىندەگى كەڭەستىڭ 3-ءشى سامميتىنە شاقىرۋىن قۋانا قابىلدادى.
قازاقستاندىق تۇراقتى وكىلدىكتىڭ اشىلۋى ساۋد ارابياسى كورولدىگىنىڭ جيددا قالاسىنداعى يكۇ شتاب-پاتەرىندە 29-31 ناۋرىزدا وتكەن ەكونوميكالىق, مادەنيەت جانە الەۋمەتتىك ءماسەلەلەر جونىندەگى يسلام كوميسسياسىنىڭ 33-ءشى سەسسياسىنا تۇسپا-تۇس كەلدى. يكۇ باس حاتشىسى سەسسيانىڭ اشىلۋىندا سويلەگەن سوزىندە ۇيىمنىڭ دامۋىنا قاتىستى بىرقاتار ماڭىزدى ماسەلەلەرىنە توقتالا كەلە, قازاقستان ديپلوماتياسىنىڭ ارقاسىندا يكۇ مەن ەقىۇ اراسىنداعى جاقسارىپ كەلە جاتقان ىنتىماقتاستىقتى قوشتادى. اتاپ ايتقاندا, يكۇ باس حاتشىسى 29-30 ماۋسىمدا استانا قالاسىندا وتەتىن ۇستانىمدىلىق پەن كەمسىتپەۋ تۋرالى ەقىۇ كونفەرەنتسياسىنىڭ ماڭىزىن اتاپ ءوتتى. وسى كونفەرەنتسيا شەڭبەرىندە ەكى ۇيىمنىڭ يسلاموفوبياعا قارسى ءىس-شارالار جونىندەگى بىرلەسكەن سەمينارىن وتكىزۋ جوسپارلانۋدا.
قاتىسۋشى مەملەكەتتەر ىنتىماقتاستىعى جونىندە كەڭ اۋقىمدى ماسەلەلەر تالقىلانعان كوميتەت سەسسياسىنىڭ جۇمىسىنا قازاقستاندىق دەلەگاتسيا بەلسەندى قاتىستى. سەسسيانىڭ قابىلداعان قۇجاتتارىندا يكۇ-نىڭ قازاقستاننىڭ مادەنيەتارالىق جانە وركەنيەتارالىق ۇنقاتىسۋى ءجونىندە, 7-ءشى الەمدىك يسلامدىق ەكونوميكالىق فورۋمدى 2011 جىلى استانا قالاسىندا وتكىزۋ جونىندە, سەمەي يادرولىق پوليگونىنان جانە ارال تەڭىزىنىڭ اپاتتى كەبۋىنىڭ سالدارىنان جاپا شەككەن ايماقتاردى ەكولوگيالىق جانە الەۋمەتتىك وڭالتۋعا حالىقارالىق قوعامداستىقتىڭ نازارىن اۋدارتۋ جونىندەگى جانە ت.ب. باستامالارى قولداۋ تاپتى.
“ەگەمەن-اقپارات”.