تۇركىستان وبلىسىنىڭ ءار اۋىل وكرۋگىنەن اۋىل شارۋاشىلىعى سالاسىندا الدىڭعى قاتارلى تەحنولوگيالاردى قولدانا وتىرىپ, جىلىنا بىرنەشە رەت ءونىم الاتىن تاۋار وندىرۋشىلەر ءتىزىمى بەكىتىلگەن.
مىسالى, سايرام اۋدانىندا بۇگىندە 100-دەن استام شارۋاشىلىق 145,8 گەكتارعا كارتوپ, قىرىققابات, ءسابىز, پياز, سارىمساق, نوحات, قيار مەن ءتاتتى بۇرىش ەككەن. اۋداندا 100-دەن استام شاعىن جانە ءىرى جىلىجاي جۇمىس ىستەيدى. ياعني, ەلىمىزدە جاريالانعان توتەنشە جاعداي ديقاندار جۇمىسىنا كەدەرگى كەلتىرگەن جوق.
سايرام اۋدانىنا جۇمىس ساپارىمەن كەلگەن وبلىس اكىمى ومىرزاق شوكەەۆ ديقانداردىڭ تىنىس-تىرشىلىگىمەن تانىستى. وبلىس باسشىسىمەن جۇزدەسكەن شارۋا قوجالىقتارى مەن جىلىجايلاردىڭ يەلەرى ءوز ماسەلەسىن ورتاعا سالدى. ومىرزاق ەستاي ۇلى ديقانداردى وتپەلى كەزەڭنىڭ قيىندىقتارىنا توتەپ بەرىپ, الاڭداماۋعا شاقىردى. كەرىسىنشە, جۇمىستى كۇشەيتۋدى تاپسىردى.
- شارۋالار نازاردان تىس قالمايدى. ەلدەگى توتەنشە جاعدايعا بايلانىستى اۋىل شارۋاشىلىعى سالاسىنىڭ اقساۋىنا جول بەرىلمەيدى. كەرىسىنشە, قايتا جۇمىستى كۇشەيتۋ قاجەت. مەملەكەت تاراپىنان قولداۋ كورسەتىلەدى. قوسىمشا قاجەتتىلىكتەر تۋىنداپ جاتسا, قاراستىرىلادى, - دەدى وبلىس اكىمى.
اۋىل شارۋاشىلىعى ونىمدەرىمەن تولىق قامتاماسىز ەتۋ ماقساتىندا شارۋا قوجالىق يەلەرى ەگىستىك جەردەن ەكى-ءۇش رەت ءونىم الۋدى توقتاتپايمىز دەپ وتىر. اۋدانداعى بىرنەشە شارۋا قوجالىقتاردىڭ جۇمىسىمەن تانىسقان وبلىس اكىمى قولكەنت اۋىل وكرۋگىندەگى ينجەنەرلىك - كوممۋنيكاتسيالىق جۇيەلەرىنىڭ قۇرىلىسى نىسانىندا بولدى. مەكەمە اۋىز سۋ, ەلەكتر جەلىسى, سۋ قۇبىرى جوبالارىن ىسكە اسىرادى. سونداي-اق ومىرزاق شوكەەۆ اۋدانداعى قۇراماجەم شىعاراتىن زاۋىتتىڭ ۇجىمىمەن كەزدەستى. وسىعان دەيىن وزبەكستان, اۋعانستان, يران ەلدەرىنە ەكسپورت جاسايتىن ءوندىرىس ورنى جوسپارعا سايكەس جۇمىس ىستەۋدە.
تۇركىستان وبلىسى