“جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا مۇمكىندىكتەرى” جولداۋىندا ەل پرەزيدەنتى ن.نازارباەۆ داعدارىستان كەيىنگى كەزەڭدەرگە, سونداي-اق, تۇتاستاي العاندا, الداعى ونجىلدىققا ارنالعان دامۋدىڭ جاڭا اۋقىمدى مىندەتتەرىن بەلگىلەپ بەردى.
بۇل مىندەتتەردىڭ ماڭىزى وراسان زور. بىرىنشىدەن, ەكونوميكانى جەدەل ءارتاراپتاندىرۋدىڭ ناقتى مەحانيزمدەرى ارقىلى جاڭعىرتۋ – وسى ماقساتقا جەتۋدىڭ توتە جولى. ولاردىڭ ءبىرى – جولداۋدا جاڭا ەكونوميكانىڭ قوزعاۋشى كۇشى رەتىندە تانىلعان كاسىپكەرلىككە ارقا سۇيەۋ. مۇندا نەگىزگى ەكپىن وڭىرلىك ينۆەستيتسيالىق ساياساتتى كۇشەيتۋ ارقىلى بەكەمدەلگەن ايماقتارداعى كاسىپكەرلىكتى دامىتۋعا تۇسىرىلەتىن بولادى.
ەكىنشىدەن, بۇل, مەنىڭ ويىمشا, ەلدىڭ باستى بايلىعى رەتىندە ناقتى ادامعا باعدار جاساۋ.
مۇنداي كوزقاراس كەزدەيسوقتىق ەمەس. سوڭعى جىلدارى ادام كاپيتالى فاكتورىن تولىعىراق جۇزەگە اسىرۋ قاجەتتىگىن بارىنشا مولىنان سەزىنە باستادىق. ويتكەنى, مۇنسىز ەڭبەك ونىمدىلىگىن ارتتىرۋ مۇمكىن ەمەس. مىنە, ءدال سوندىقتان مەملەكەت باسشىسى “ەلدەگى مودەرنيزاتسيالاۋ ستراتەگياسىنىڭ تابىستىلىعى, ءبىرىنشى كەزەكتە, قازاقستاندىقتاردىڭ ءبىلىم-بىلىگىنە, الەۋمەتتىك جانە دەنساۋلىق جاعدايىنا تاۋەلدى” ەكەنىن ەرەكشە اتاپ كورسەتتى.
جولداۋدا مەملەكەت باسشىسى ادام كاپيتالى ساپاسىن جوعارىلاتۋعا باعىتتالعان ناقتى مىندەتتەردى العا قويدى:
- 2020 جىلعا قاراي قالالىق تا, سول سياقتى اۋىلدىق جەرلەردەگى دە بالالاردىڭ ءبارى مەكتەپ جاسىنا دەيىنگى تاربيەمەن جانە وقىتۋمەن قامتىلاتىن بولادى;
- بالالاردى مەكتەپ جاسىنا دەيىنگى ءبىلىم بەرۋمەن جانە ءتاربيەمەن قامتاماسىز ەتۋدى ارتتىرۋعا باعىتتالعان “بالاپان” ارنايى باعدارلاماسىن ازىرلەپ, 2010 جىلدىڭ ءبىرىنشى جارتىسىندا جۇزەگە اسىرۋعا كىرىسۋ جونىندە مىندەت قويىلدى;
- دەنساۋلىق ساقتاۋ نىساندارىن سالۋ جانە جابدىقتاۋ, كادرلاردى دايارلاۋ, سالاماتتى ءومىر سالتىن قالىپتاستىرۋ جونىندەگى مەملەكەتتىك شارالار كەشەنى 2020 جىلعا قاراي انا مەن بالا ءولىمىن ەكى ەسە تومەندەتىپ, جالپى ءولىمدى 30 پايىزعا, ال تۋبەركۋلەزبەن اۋرۋدى 20 پايىزعا قىسقارتاتىن بولادى. سونىمەن بىرگە, ءومىر ءسۇرۋدىڭ كۇتىلگەن ۇزاقتىعى 22 جاسقا دەيىن ۇلعاياتىن بولادى;
- حالىقتى ەڭبەكپەن قامتاماسىز ەتۋ مەملەكەتتىك الەۋمەتتىك ساياساتتىڭ باستى باسىمدىعى بولىپ تابىلادى. سوندىقتان مەملەكەت باسشىسى 2020 جىلعا قاراي جۇمىسسىزدىق دەڭگەيى 5 پايىزدان, ال تابىستارى ەڭ تومەنگى ءومىر ءسۇرۋ دەڭگەيىندەگى حالىقتىڭ ۇلەسى 8 پايىزدان اسپاۋى جونىندە مىندەت قويدى;
- الەۋمەتتىك قىزمەتتەر تەك مۇقتاج ازاماتتارعا عانا كورسەتىلىپ, ولار قازىرگى زامانعى ستاندارتتار مەن قازاقستانداعى ءومىر دەڭگەيىنە سايكەس كەلۋگە ءتيىس. 2015 جىلعا قاراي بازالىق زەينەتاقىلىق تولەمدەر مولشەرى ەڭ تومەنگى ءومىر ءسۇرۋ دەڭگەيىنىڭ 60 پايىزىنا دەيىن, ال مەملەكەتتىك الەۋمەتتىك جاردەماقىلار 2010 جىلعا قاراعاندا 1,2 ەسە ارتتىرىلۋى ءتيىس;
- مەملەكەت باسشىسى 2010 جىلى “جول كارتاسى—2009” جوسپارى بويىنشا باستالعان تۇرعىن ءۇي-كوممۋنالدىق سەكتور نىساندارىن قايتا قالپىنا كەلتىرۋدى جالعاستىرۋ, ال 2011 جىلى تۇرعىن ءۇي-كوممۋنالدىق شارۋاشىلىقتى كەڭ اۋقىمدى مودەرنيزاتسيالاۋدىڭ 2020 جىلعا دەيىنگى جوسپارىن ازىرلەۋ جونىندە مىندەت قويدى. بۇل جاعدايدا تۇرعىن ءۇي-كوممۋنالدىق شارۋاشىلىق ينفراقۇرىلىمدارىن مودەرنيزاتسيالاۋ ەكسپلۋاتاتسيالىق شىعىندارىنىڭ ۇلەسىن تومەندەتۋمەن جانە رەسۋرس ساقتاۋشى تەحنولوگيالاردى ەنگىزۋمەن قوسا ءجۇرۋى ءتيىس. اۋىلدىق جەرلەردى قۇبىر سۋىمەن قامتاماسىز ەتۋ جۇمىسى جالعاساتىن بولادى.
وسىناۋ وزەكتى مىندەتتەردى شەشۋ وڭىرلەر اراسىنداعى, ەڭ باستىسى, قالا مەن اۋىل تۇرعىندارى اراسىنداعى حالىقتىڭ تۇرمىس دەڭگەيىندەگى الشاقتىق پروبلەماسىن ءبىرىزدىلىكپەن شەشۋگە جاعداي جاسايدى.
ناتيجەسىندە, ءاربىر قازاقستاندىق ءومىر ساپاسىنىڭ ارتقانىن سەزىنىپ, ءوزى تاراپىنان ەكونوميكا سالالارىنداعى ونىمدىلىكتى ارتتىرۋعا ۇلەس قوساتىن بولادى.
سوندىقتان, ەكونوميكانى سەرپىندى ءارتاراپتاندىرۋ باعدارلاماسىنداعى باستى باسىم باعىتتاردىڭ ءبىرى بولىپ تابىلاتىن ەلدىڭ ادامي كاپيتالىن دامىتۋ قازاقستان رەسپۋبليكاسىنىڭ ەكونوميكالىق ءوسىمى ءۇشىن ايتارلىقتاي مۋلتيپليكاتيۆتى تيىمدىلىك اكەلۋگە ءتيىس.