بۇۇ-عا شاعىمداندى
تاجىكستان كورشى وزبەكستان مەملەكەتى وزدەرىنە ارنالعان جۇكتەردى ءوز اۋماعىنان وتكىزبەي وتىرعانى جونىندە بىرىككەن ۇلتتار ۇيىمىنا شاعىم جاسادى. بۇل كورشىلەس ەكى ەل اراسىندا ىنتىماق كەتكەنىن اڭعارتادى. بۇل ەكى جاققا دا ءتيىمسىز: تاجىكتەر قاجەتتى جۇكتەرىن الا الماسا, وزبەكتەرگە ءوز جەرىندە ارتىق پويىز ۆاگوندارىن قاڭتارىپ قويعان دا قوسالقى اۋىرتپالىق. اسىرەسە, تاجىكتەر مىناداي الا-ساپىران مەزگىلدە ەكى ايدان بەرى وتىن ونىمدەرىن الا الماي وتىر.
اراب وداعى كەرەك
يەمەن پرەزيدەنتى ا.سالەح اراب ەلدەرى باسشىلارىنا ءوز ايماعىندا ەۋرووداق سياقتى اراب وداعىن قۇرۋ جونىندە ۇسىنىس جاسادى. ارينە, ەلدەردىڭ وداققا بىرىككەنى, ەكونوميكاسىنىڭ كىرىككەنى جاقسى. بىراق, ەۋرووداق سياقتى ۇيىمنىڭ وعان مۇشە بولاتىن ەلدەرگە قوياتىن ۇلكەن تالابى, ۇستانىمى بار. وعان كەز كەلگەن ەل كىرە المايدى. اسىرەسە ءوز ەلىندە تۇراقتىلىق جوق, حالقى ءبىر-بىرىمەن اتىسىپ-تارتىسىپ جاتاتىن يەمەن سياقتى ەلدەر مۇشەلىككە كىرىپ جاتار بولسا, مۇنداي وداقتىڭ بولاشاعى ب ۇلىڭعىر.
قىتاي – بەلورۋسسياعا
قىتاي حالىق رەسپۋبليكاسى توراعاسىنىڭ ورىنباسارى سي ءتسزينپيننىڭ بەلورۋسسياعا ساپارى كەزىندە اسپاناستى ەلى بەلارۋستەرگە ءبىر ميلليارد دوللار كولەمىندە نەسيە بەرەتىنى جاريالاندى. سونداي-اق, قىتاي وكىلى 8,8 ميلليون دوللار اقشانى جاي تەگىن بەرەتىنىن مالىمدەدى. جالپى, قىتاي سوڭعى ۋاقىتتا كسرو كۇيرەگەننەن كەيىن پايدا بولعان تاۋەلسىز ەلدەردىڭ بارىنە دەرلىك جەڭىل نەسيە بەرىپ كەلەدى. بۇل ەكى جاققا دا ءتيىمدى.
بيلىكتەگىلەر جەڭىلدى
فرانتسيادا ايماقتىق سايلاۋدىڭ ەكىنشى تۋرىندا بيلىكتەگى حالىق قوزعالىسىن قولداۋ وداعى پارتياسى ويسىراي جەڭىلىس تاپتى. ولار بار-جوعى 35,53 پايىز داۋىسقا يە بولدى. سوتسياليستەرگە, ەكولوگتارعا, تاعى باسقا سونداي سولشىل پارتيالارعا سايلاۋشىلاردىڭ 54,12 پايىزى داۋىس بەرىپتى. ءسويتىپ, سولشىلدار ەلدەگى 22 ايماقتىڭ 21-ىندە باسىمدىققا يە بولىپتى. بۇل – پرەزيدەنت ساركوزي مەن پرەمەر-مينيستر فيوننىڭ بەدەلىنىڭ مىقتاپ تۇسكەنى.
وپپوزيتسيانىڭ تالاپتارى
اۋعانستاندا قازىرگى بيلىكتەگى حاميد كارزايدىڭ ۇكىمەتىنە تەك تاليبتەر عانا ەمەس, باسقا دا كوپتەگەن پارتيالار وپپوزيتسيادا. سونىڭ ءبىرى – سوناۋ كەڭەس-اۋعان سوعىسىنان بەرى كەلە جاتقان گۇلبەددين حەكماتياردىڭ يسلام پارتياسى. اۋعانستان پرەزيدەنتى جاقىندا سول پارتيانىڭ وكىلى حەلالمەن كەزدەستى. ولار كەزدەسۋگە 15 پۋنكتتەن تۇراتىن تالاپتارىن اكەلىپتى. سونىڭ ءبىرى – بيىلعى شىلدەدەن باستاپ شەتەل اسكەرلەرى اۋعانستاننان شىعارىلۋى كەرەك.
لاڭكەستەر قورقىتادى
اقپارات قۇرالدارى ارقىلى الەمدەگى №1 لاڭكەس سانالاتىن ۋساما بەن لادەن اقش ۇكىمەتىنە ەسكەرتۋ جاسادى: ەگەر اقش 2001 جىلى 11 قىركۇيەكتەگى لاڭكەستىك ارەكەتكە قاتىستى دەگەن ادامدارعا قاتاڭ جازا قولداناتىن بولسا, وعان جاۋاپ رەتىندە اقش-قا جاڭا سوققى بەرىلەدى. ۆاشينگتون ودان سەسكەنە قويماس, دەگەنمەن سوندا لاڭكەستەردىڭ جاۋابى قانداي بولماق؟
مەكتەپتەر اشىلمايدى
گەرمانيا فەدەراتيۆتىك رەسپۋبليكاسىندا 3 ميلليونداي تۇرىك تۇرادى. جاقىندا تۇركيانىڭ پرەمەر-ءمينيسترى تايىپ ەردوعاننىڭ گەرمانيا كانتسلەرى انگەلا مەركەلدىڭ تۇركياعا ساپارى الدىندا نەمىس ەلىندە تۇرىك تىلىندەگى مەكتەپتەر اشۋ جونىندەگى ۇسىنىسى نەمىس ساياساتشىلارى اراسىندا سىن پىكىرلەر تۋدىردى. ولاردىڭ ويىنشا, بۇل تۇرىك يمميگرانتتارىنىڭ نەمىس قوعامىنا كىرىگۋىنە تەرىس اسەرىن تيگىزەتىن كورىنەدى.
ىشكىش تاياق جەيدى
سۋداندا پرەزيدەنت ومار ءال-ءباشيردىڭ جارلىعى بويىنشا, ىشىمدىك جاساعان, ساتقان, سونداي-اق ونى ىشكەن كەز كەلگەن ادام جازالانادى. جازالانعاندا, كادىمگى كوك شىبىقپەن دۇرە سوعىلادى. اسىرەسە بۇل ايەل ادامدارعا قاتتىراق تيەدى. بۇل ەلدە مۇسىلماندارمەن بىرگە, باسقا دا ءدىن وكىلدەرى دە تۇرادى. بىراق شاريعات زاڭى بويىنشا بۇل ەلدە ىشىمدىك ساتىلماۋعا ءتيىس. ال قولدان ىشىمدىك جاساۋ جانە ونى پايدالانۋ – ەلدىڭ وڭتۇستىگىندەگى ءبىراز حالىقتىڭ ۇلتتىق ءداستۇرى.
ازىرلەگەن ماماديار جاقىپ.