ەلباسىنىڭ تاپسىرماسى بويىنشا «كەدەرگىسىز كەلەشەك», «باقىتتى وتباسى» جانە «ارداگەرلەردى ارداقتايىق» پارتيالىق جوبالارى اياسىندا كارانتين جاريالانعان نۇر-سۇلتان جانە الماتى قالالارىنداعى جالعىز باستى قارتتارعا, مۇگەدەكتەر مەن تۇرمىسى تومەن كوپبالالى وتباسىلارعا اتاۋلى كومەك كورسەتۋ ءۇشىن 150 ملن تەڭگە باعىتتالدى. بۇل تۋرالى «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك Instagram پاراقشاسىندا جازدى.
باۋىرجان بايبەكتىڭ ايتۋىنشا, بۇل قاراجاتقا مەديتسينالىق ماسكالار, انتيسەپتيكالىق قۇرالدار مەن ءبىرىنشى كەزەكتە قاجەتتى تاۋارلار ساتىپ الىنىپ, ولاردى پارتيالىقتار مەن «Jas Otan» ۆولونتەرلارى حالىقتىڭ تۇرمىسى تومەن الەۋمەتتىك توبىنا ۇلەستىرىپ بەرەتىن بولادى. سونىمەن قاتار پارتيانىڭ ورتالىق اپپاراتى مەن فيليالدارىنىڭ قىزمەتكەرلەرى وسى قاجەتتىلىكتەرگە وزدەرىنىڭ ءبىر كۇندىك جالاقىلارىن اۋدارۋ تۋرالى شەشىم قابىلدادى.⠀قازىر نۇر-سۇلتان جانە الماتى قالالارىنىڭ اكىمدىكتەرىمەن بىرگە كوروناۆيرۋستىڭ تارالۋىنا جول بەرمەۋ ماقساتىندا قۇرىلعان جەدەل شتابتارعا كەز كەلگەن كومەك كورسەتۋ ءۇشىن ۆولونتەر-ەرىكتىلەردىڭ ىقشام توپتارى جاساقتالۋدا.