تۇركىستان وبلىسى بويىنشا مەكتەپ وقۋشىلارىنىڭ 5 ساۋىرگە دەيىنگى دەمالىستارى اياقتالعان سوڭ, قاجەت بولعان جاعدايدا قاشىقتىقتان وقىتۋ ءۇشىن دايىندىق جۇمىستارى جۇرگىزىلۋدە. مەكتەپكە دەيىنگى ءبىلىم بەرۋ مەكەمەلەرى شتاتتىق نەگىزدە جۇمىس ىستەۋدە. بالاباقشاعا بالانى جىبەرۋ-جىبەرمەۋ اتا-انا ەركىنە قالدىرىلعان. ينتەرنات اكىمشىلىكتەرىنە دە ارنايى مىندەتتەر جۇكتەلگەن. بالالار ۇيىنە كىرۋ-شىعۋ قاتاڭ باقىلاناتىن بولادى.
بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە ادامي الەۋەتتى دامىتۋ باسقارماسىنىڭ باسشىسى راحىمبەك جولاەۆ مالىمدەدى. سونىمەن قاتار, بريفينگتە وبلىستىق قوعامدىق دەنساۋلىق باسقارماسى باسشىسىنىڭ مەندەتىن اتقارۋشى سالتانات جامالوۆا وبلىس بويىنشا كوروناۆيرۋستىق ينفەكتسيامەن اۋىرعان ناۋقاستار تىركەلگەن جاعدايدا ولاردى جاتقىزۋ ءۇشىن ينفەكتسيالىق ستاتسيونارلاردا 100 توسەك -ورىن دايىندالعاندىعىن جەتكىزدى. «كوروناۆيرۋستىق ينفەكتسياعا ۇقساس دەرتى بار ناۋقاستاردى جاتقىزۋ, دياگنوزدارىن انىقتاۋ ماقساتىندا 240 توسەك - ورىنعا پروۆيزورلىق ستاتسيونارلار قاراستىرىلعان. بارلىعى - 340 ورىن. ودان بولەك, بارلىق اۋداندار مەن قالالارداعى ينفەكتسيالىق اۋرۋلار بولىمدەرى دايىندىق جاعدايىنا كەلتىرىلگەن. قارىم قاتىناستا بولعانداردى وقشاۋلاۋ ءۇشىن وبلىس اۋماعىنا 505 ورىنعا وبسەرۆاتسيالىق گوسپيتالدار جوسپارلانعان», دەدى سالتانات ابدىقايىمقىزى.
ال جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى اسيا تەمىرباەۆا باسقارماعا باعىنىستى مەكەمەلەردە كارانتيندىك رەجيم جاريالانعانىن ايتتى. وڭىردەگى 13 مەديتسينالىق - الەۋمەتتىك مەكەمەلەردە, ونىڭ ىشىندە مۇگەدەكتەر مەن مۇگەدەك بالالارعا ارناۋلى الەۋمەتتىك كومەك كورسەتەتىن ورتالىقتارى جانە ورالمانداردى بەيىمدەۋ ورتالىعىندا 5068 قىزمەت الۋشى تىركەلگەن. «ولارعا 1 321 قىزمەتكەر قىزمەت كورسەتۋدە. قامقورلىققا الىنعاندار اراسىندا كوروناۆيرۋستىق ينفەكتسياسىنىڭ جاپپاي تارالۋ جاعدايىن بولدىرماۋ ءۇشىن بارلىق مەديتسينالىق-الەۋمەتتىك مەكەمەلەردە كارانتين رەجيمى جاريالاندى», - دەدى ءاسيا قۇرالقىزى.
تۇركىستان وبلىسى