ەلوردادا كەزەكتى حالىقارالىق مامانداندىرىلعان Agritek-Farmtek اۋىلشارۋاشىلىق تەحنيكالارىنىڭ كورمەسى ءوتتى. ءداستۇرلى ءىس-شارا وسىمەن ون بەسىنشى رەت ۇيىمداستىرىلعانىن ايتا كەتەيىك.
ەلىمىزدە اۋىلشارۋاشىلىق وندىرىسىندەگى ەڭبەك ونىمدىلىگىن كەمىندە 2 جارىم ەسەگە ارتتىرۋ مىندەتى مەجەلەنگەنى ءمالىم. وعان قول جەتكىزۋدىڭ نەگىزگى جولى – اۋىلشارۋاشىلىق تاۋارلارىن وندىرۋشىلەردى زاماناۋي تەحنيكامەن قايتا جاراقتاندىرۋ.
كورمەگە 18 ەلدەن 200-گە جۋىق كاسىپورىن قاتىستى. شەتەلدىك كومپانيالاردىڭ قازاقستانداعى وكىلدەرى, سىرتتان كەلەتىن تراكتورلاردىڭ باعاسى 10 ملن تەڭگەدەن باستالاتىنىن ايتتى. شەتەلدىك كومپانيالاردىڭ ساتىلىم جونىندەگى مەنەدجەرى باۋىرجان شولپان بۇل تەحنيكالاردىڭ ەرەكشەلىكتەرى مەن ارتىقشىلىقتارى جايىندا:
– باستاپقىدا شەتەلدىك تەحنيكالاردىڭ باعاسى قازاقستاندىق فەرمەرلەر ءۇشىن تىم قىمباتقا تۇسەتىن. قازىر ءبىزدىڭ القاپتارعا بەيىمدەلگەن شاعىن اۋىلشارۋاشىلىق تەحنيكالارى كەلىپ جاتىر, ولارعا شاعىن شارۋاشىلىقتار تاراپىنان سۇرانىس بار. ەلىمىزدە اگروسەكتوردى تسيفرلاندىرۋعا اسا ءمان بەرىلۋدە. سوندىقتان القاپتاردى GPS ارقىلى باقىلاۋ, ناقتى قانشا گەكتار بارىن ءبىلۋ, ەگىلگەن ءونىم كولەمىن انىقتاۋ سىندى مالىمەتتەر تراكتورلاردا اۆتوماتتى تۇردە بەرىلەتىن بولادى. سونىمەن قاتار اۋانىڭ ىلعالى مەن تەمپەراتۋراسىن انىقتايتىن جانە توپىراقتىڭ ىلعال مولشەرىن ءدوپ كورسەتەتىن مالىمەتتەر بازاسى فەرمەر ءۇشىن قولجەتىمدى, − دەيدى ول.
جالپى, پايدالانۋ مەن جوندەۋدىڭ تەحنيكالىق شارتتارى بويىنشا تراكتورلار, كومبايندار مەن باسقا دا تەحنيكالار 15 جىلدان كەيىن ەسەپتەن شىعارىلۋى ءتيىس. وكىنىشكە قاراي, قازاقستاندا قولدانىلعان تەحنيكانىڭ 60%-عا جۋىعىنىڭ قولدانىس مەرزىمى وتسە دە, ءالى جۇمىس ىستەيدى. ونىڭ ۇستىنە ەسكىرگەن تەحنيكانىڭ قۋاتى 40 اتتىڭ كۇشىن قۇرايدى. سالىستىرۋ ءۇشىن ايتار بولساق, اقش-تا – 300 ات, گەرمانيادا 500 ات كۇشى بار تەحنيكالار جۇمىس ىستەيدى. مامانداردىڭ ايتۋىنشا, ەلىمىزدەگى توزىعى جەتكەن تەحنيكانىڭ سالدارىنان ءوندىرىس شىعىندارى كولەمى 20%-عا جەتىپ وتىر.
بۇعان دەيىن دە اۋىل شارۋاشىلىعى سالاسىندا ماشينالار مەن جابدىقتار پاركىن ۋاقىتىندا جاڭارتۋ ءۇشىن اگروسەكتورعا ارنالعان ماشينالاردى شىعارۋ ءىسىن جانداندىرۋ قاجەتتىگى تۋرالى ماسەلە سان مارتە كوتەرىلگەن بولاتىن. الايدا اگروونەركاسىپ كەشەنىندە زاماناۋي تەحنيكالاردىڭ ۇلەسى اۋىز تولتىرىپ ايتارلىقتاي دەڭگەيدە ەمەس. Agritek-Farmtek وسى ولقىلىقتاردىڭ ورنىن تولتىرۋعا باعىتتالعان ماڭىزدى شارالاردىڭ ءبىرى سانالادى.
ءۇش كۇنگە جوسپارلانعان كورمەدە اۋىلشارۋاشىلىق تەحنيكالارىن شىعارۋدى جولعا قويعان ەلدەردىڭ وزىق ونىمدەرى ۇسىنىلدى. ولاردىڭ قاتارىندا تىڭايتۋ جانە سۇرىپتاۋ تەحنولوگياسى, تىڭايتقىش تۇرلەرى, مال مەن قۇس شارۋاشىلىعىنا ارنالعان تەحنيكالار بولدى. كورمەگە كەلۋشى شارۋا قوجالىقتارى يەلەرى, اۋىلشارۋاشىلىق سالاسىنىڭ ماماندارى كاسىپكەرلەرمەن كەلىسىمشارتقا وتىرۋعا مۇمكىندىك الدى.
وسىدان 7 جىل بۇرىن حالىقارالىق مامانداندىرىلعان اۋىل شارۋاشىلىعى كورمەسى UFI Approved Event ستاتۋسىن العان بولاتىن. بۇل بەلگى شارانىڭ جوعارى دەڭگەيدە ۇيىمداستىرىلعانىن, بيزنەستىڭ دامۋىنا جانە سالانىڭ قالىپتاسۋىنا وڭ اسەر ەتكەنىن كورسەتەدى.