الەمدەگى ەڭ ادەمى كيىم – جاڭا تۋعان نارەستەلەرگە ارنالعان كيىم. ساپاسى مەن ءسانى شەتەلدىك برەندتەردەن قالىس قالمايتىن بالالار كيىمى تۇپقاراعان اۋدانىنىڭ اقشۇقىر اۋىلىندا تىگىلۋدە.
«Rakhim baby» سابيلەرگە ارنالعان كيىم تسەحى 2012 جىلدان بەرى جۇمىس ىستەپ تۇر. تسەح يەسى مايرا رزابەكقىزى بۇرىن ماتەماتيكا ءپانىنىڭ مۇعالىمى بولعان. الدىمەن تۇركيادان جاڭادان تۋعان بالالار كيىمىن تاسىپ, ونى اقتاۋدا ساتۋمەن اينالىسادى. كەيىن ءوزى تىگۋدى شەشتى.
– تۇرىكتەر جايالىق شىعارمايدى. «نەگە تۇرىكتەردەن ماتا الىپ شىت جايالىقتار مەن كورپەلەردى ءوزىم تىكپەسكە؟», دەگەن وي كەلدى, – تاۋەكەلگە بەل بۋىپ, نەسيە الىپ, جۇمىستى باستاپ كەتتىم. بۇگىندە تەك ماڭعىستاۋ وبلىسىنا ەمەس, باسقا قالالارعا دا تاپسىرىس جىبەرىپ وتىرمىز, – دەيدى تۇپقاراعان اۋداندىق كاسىپكەرلەر پالاتاسى فيليالى, ىسكەر ايەلدەر كەڭەسىنىڭ مۇشەسى مايرا رزابەكقىزى.
كاسىپورىندا 200-دەن استام تاۋار ءتۇرى تىگىلەدى. ايىنا 4 مىڭ دانا جايالىق, شاقالاققا ارنالعان كيىم توپتاماسى 2 مىڭ دانا, 80 دانا كورپە, 100 دانا بەسىك جاساۋىن تىگىپ كەلەدى. كاسىپكەر جاقىندا ارنايى سەرتيفيكات الىپ, «قازاقستاننىڭ ۇزدىك تاۋارى» بايقاۋىنا قاتىسپاق.
– بۇل – ناعىز برەند. مۇنداي تاماشا جۇمىس كورمەدىم! كەرەمەت اسەر قالدىردى. ادەمى ماتالار, ەڭ الدىمەن وتە ساپالى ءونىم ەكەن. مەن جىپتەردەن, ماتالاردان, ىلگەكتەردەن باستاپ, ءمىنسىز تەحنولوگيانى تالاپ ەتەتىن وسىنداي نازىك ءونىمدى وندىرە الادى دەپ ويلاماعانمىن. بارلىق كيىمدەردىڭ ماتاسى, تىگىسى, ساپاسى ۇنادى, – دەيدى ماڭعىستاۋ وبلىسى كاسىپكەرلەر پالاتاسىنا قاراستى ىسكەر ايەلدەر كەڭەسىنىڭ ءتورايىمى ساۋلە حالەلقىزى. كاسىپكەر بۇگىنگى تاڭدا 20 ايەلدى جۇمىسپەن قامتىپ وتىر. ولاردىڭ اراسىندا زەينەتكەر انالار, جارىمجان ايەلدەر دە بار ەكەن. مۇندا جۇمىسقا كەلگەن انالار سەبەپسىز شىعىپ كەتپەيدى. بارلىق جۇمىسشىلار تۇراقتى جالاقىمەن قامتىلعان. مايرا رزابەكقىزىنىڭ تىگىنشىلەرىنىڭ قولىنان شىققان تاۋارلار ايتۋلى بايقاۋلارعا قاتىسۋعا ىنتالى. تازا ماقتادان تىگىلگەن كيىمدەر كوپشىلىكتىڭ ۇدەسىنەن شىعادى دەگەن سەنىم بار. ءتۇرلى كورمەلەردە ۇنەمى ورىن الىپ, وسى باعىتتاعى بارلىق جاڭاشىلدىقتاردى نازارىنان تىس قالدىرعان ەمەس.
«Rakhim baby» برەندى تۋرالى الەۋمەتتىك جەلىلەردەن بالالار دۇكەندەرىنىڭ كوپتەگەن يەلەرى تانىپ بىلگەن. قازىر ءونىم قازاقستاننىڭ كوپتەگەن قالالارىنا – اتىراۋ, اقتوبە, نۇر-سۇلتان, الماتى, شىمكەنت, قىزىلورداعا, سونداي-اق رەسەيگە جانە تمد-نىڭ باسقا دا ەلدەرىنە جەتكىزىلۋدە. كاسىپكەر الدا كاسىبىن كەڭەيتۋدى جوسپارلاپ وتىر.
ماڭعىستاۋ وبلىسى