«راحات» اق شىمكەنت قالاسىندا مارمەلاد ءوندىرىسىنىڭ جاڭا جەلىسىن اشتى. ءوندىرىس ورنىنىڭ اشىلۋ سالتاناتىنا قالا اكىمىنىڭ ورىنباسارى ماقسۇت يساحوۆ, قالالىق اۋىل شارۋاشىلىعى باسقارماسىنىڭ باسشىسى اسقار قانىبەكوۆ, باسقارمانىڭ ينۆەستيتسيالىق جوبالاردى قولداۋ ءبولىمىنىڭ باسشىسى ءابۋناسىر جانباتىروۆ جانە فابريكانىڭ وكىلدەرى قاتىستى.
جاڭا فابريكا بىلتىر ءساۋىر ايىندا شىمكەنت قالاسى اكىمدىگى مەن «راحات-شىمكەنت» جشس اراسىنداعى سەرىكتەستىك مەموراندۋمى ناتيجەسىندە ىسكە قوسىلىپ وتىر. جوسپارعا سايكەس شاھارداعى بۇل فابريكا ءبىر ساعات ىشىندە 1 توننا, ءبىر جىلدا 3,5 مىڭ توننا مارمەلاد شىعاراتىن بولادى.
«بۇگىن ءبىز مارمەلاد ءوندىرىسىنىڭ جاڭا جەلىسىنىڭ ىسكە قوسىلۋىنىڭ كۋاسى بولىپ وتىرمىز. جوبا اياسىندا مەملەكەت تاراپىنان قولداۋ تاۋىپ, 90 ميلليون تەڭگە سۋبسيديا تولەندى. قازاقستاندىق برەندتىڭ ءتاتتى ونىمدەرى تمد ەلدەرىنىڭ مادەني استاناسى بولىپ تانىلعان قالامىزعا كەلگەن تۋريستەردىڭ الدىندا ۇلتتىق بەدەلىمىزدى ارتتىرۋعا سەپتىگىن تيگىزەدى دەپ ويلايمىن. سوندىقتان دا «راحات» فابريكاسىن ءارى قاراي ءوندىرىسىن كەڭەيتۋگە, قالاعا ينۆەستيتسيا تارتىپ, جاڭا جۇمىس ورىندارىن اشۋعا شاقىرامىن», دەدى قالا اكىمىنىڭ ورىنباسارى ماقسۇت يساحوۆ.
ايتا كەتەرلىگى, اتالعان جوبا اياسىندا قالاعا 1,8 ملرد تەڭگە ينۆەستيتسيا تارتىلىپ, 80 ادام تۇراقتى جۇمىس ورنىمەن قامتىلعان. جوبا مەملەكەت تاراپىنان قولداۋ تاۋىپ, 90 ملن تەڭگە سۋبسيديا تولەندى.
بۇل تۋرالى «راحات» اق باسقارما توراعاسى كونستانتين فەدورەتس ءۇشىنشى مەگاپوليستە وندىرىلەتىن مارمەلادتىڭ ەرەكشەلىگىن تىلگە تيەك ەتىپ, كومپانيا جوسپارىمەن ءبولىستى.
«مارمەلادتىق ءونىم سەگمەنتىندەگى ساتىپ الۋشىلاردىڭ سۇرانىسى بىزگە ىشكى جانە سىرتقى نارىقتاعى تۇراقتى ءوسىمنىڭ بارىن كورسەتەدى. ول مارمەلاد سەكىلدى قۇرامىندا قانت كولەمى از كونديتەرلىك ونىمدەردى تۇتىنۋدىڭ قازىرگى ۇردىسىمەن بايلانىستى. شىمكەنت قالاسىنداعى وندىرىستىك جەلىنىڭ ىسكە قوسىلۋى «راحات» اق ءۇشىن ستراتەگيالىق قادام بولدى. كومپانيانىڭ كەلەسى جوسپارلارىنىڭ ءبىرى – ءونىم اسسورتيمەنتىن ارتتىرۋ. بۇگىنگى كۇننىڭ وزىندە دە اگاراگار, پەكتين, جەلاتين سەكىلدىڭ تازا شيكىزات نەگىزىندەگى جاڭا مارمەلاد تۇرلەرىن زاماناۋي الدىڭعى تەحنولوگيالار ارقىلى قۇيىپ شىعارۋدى قولعا الىپ وتىرمىز», دەدى ول.
بۇگىندە زاماناۋي قۇرالدارمەن جابدىقتالعان فابريكادا 30 اتالىم بويىنشا 6 ءتۇرى ءونىم وندىرىلەدى. 2019 جىلعى كورسەتكىش بويىنشا ءوندىرىس ورنى 20 مىڭ توننا ءونىم شىعارعان. قازىرگى تاڭدا جىلدىق قۋاتتىلىعى 3,5 مىڭ توننانى قۇرايتىن كاسىپورىننىڭ مارمەلاد جانە باسقا دا كونديتەر ونىمدەرى تمد, ەۋروپا جانە ازيا ەلدەرىنە ەكسپورتتالۋدا.
شىمكەنت