استانانىڭ كيەۆتەگى كۇندەرىنە قاتىسىپ, سول تۋىسقان ەكى ەلدىڭ باس قالاسىنىڭ مارتەبەلى دە ۇمىتىلماس مەزەتتەرىنەن سىر تارقاتقان ماقالامىز “ەگەمەن قازاقستان” گازەتىنىڭ 2007 جىلعى 26 قىركۇيەگىندە “دنەپر دىرىلدەپ, ەسىل ەلجىرەگەن كۇن” دەگەن اتپەن ءبىر بەتكە جايىلىپ شىققان ەدى. سونىڭ ءبىر تاقىرىپشاسى “ت. شەۆچەنكو... بىزدەن كىم؟” دەپ اتالعان-تىن. ونداعى كوتەرىلگەن اڭگىمە توركىنى مىنانداي. كيەۆ قالاباسى ل.چەرنوۆەتسكي: ء“بىزدىڭ ۇلتتىق باتىرىمىز تاراس شەۆچەنكو عوي. وسى ۇلتتىق باتىرىمىزعا سىزدەردىڭ استانادا ەسكەرتكىش اشىلسا دەگەن تىلەك بار”,– دەپ ۇسىنىس تاستادى. ودان ءارى قارسى جاقتىڭ ءسوزىن كۇتپەستەن, ىلە جالعاپ: “ال ءبىزدىڭ كيەۆتە سىزدەردەن قانداي ۇلتتىق باتىردىڭ ەسكەرتكىشىن قويۋدى, ارينە, وزدەرىڭىز شەشەسىزدەر عوي”,– دەپ سالماق سالا ءتۇيدى ويىن.
وسى ءبىر سەزىم تەربەگەن تۇس اتالعان ماقالامىزدا بىلاي باياندالىپتى: “...تاعى باتىر مەن اقىن ءسوزىن الماستىرىپ العان شىعار دەپ قوبالجىعانىمىزبەن, وزىمىزشە ىشتەي ۇسىنىس ازىرلەي باستاعان سەكىلدىمىز... اباي, الدە باۋىرجان, الدە جامبىل, قايسەنوۆ... جۇلگەلەنىپ كەتىپ بارادى.... ارينە, مۇنداي تاڭداۋ ءبىزدىڭ قۇقىعىمىزداعى ءىس ەمەس. تۇسىنەمىز. بىراق كىم, بىزدەن كىم لايىقتى, استاناعا ورنىعاتىن تاراس شەۆچەنكو سياقتى كيەۆ تورىندە قازاق اتىنان “تاققا” جايعاساتىن, ءباتىر-اۋ”. سول جولى دەلەگاتسيانى باستاپ بارعان ەلوردانىڭ بۇرىنعى اكىمى ا.مامين “تۇپكى ويىمىزدى” كەيىن مالىمدەيمىز دەگەندەي, ءۇنسىز باس يزەۋمەن قۇتىلعان.
... مىنە, ەندى ۋكراينا استاناسىنان جاقسى حابار الىپ وتىرمىز. باياعى ءوزىمىز كورىپ, ءسوزىن تىڭداعان, ۇسىنىسىنا رازى بولعان قالاباسى لەونيد چەرنوۆەتسكي ارنايى قاۋلىعا قول قويىپ, كيەۆتەگى قازاقستاننىڭ ۋكراينا ەلشىلىگىنىڭ الدىنداعى “نيۆكي” ساياباعىنا جامبىل جاباەۆتىڭ ەسكەرتكىشى قويىلاتىنىن رەسمي جاريا ەتىپتى. سۇيسىنبەسكە امالىڭ جوق. بۇعان تاعى ءبىر قوسارىمىز, 2008 جىلى كيەۆ قالالىق كەڭەسىنىڭ شەشىمىمەن بۇرىنعى كۋزمينسكايا كوشەسى جامبىل كوشەسى بولىپ قايتا اتالعانىنان حاباردار ەدىك. سونداي-اق بىلتىر قازاقتىڭ ۇلى اقىنىنا كيەۆتە ەسكەرتكىش-تاقتا ورناتىلىپ, كوڭىلىمىز ءبىر دەمدەلگەن-ءتىن. ەندىگى جاڭالىق الگىندەي. ەكى جارىم جىلعا سوزىلعان تاڭداۋ ۇلى جامبىلدىڭ ەسكەرتكىشىنە ءتۇسىپتى. دۇرىس تاڭداۋ. قازاقتىڭ جۇرەك-ۇسىنىسىن ءدوپ باسىپ, قۋاتتاپ قولداعان بۇل ۋكرايندىق تاڭداۋدى قوس حالىق قۋانا قۇپتاپ وتىر! ال ت.شەۆچەنكوعا استانادا ەسكەرتكىش ورناتۋعا قاتىستى دەرەك كوزىن جوندەمدەپ قاۋزاي المادىق...
قايسار ءالىم, استانا.