سەنات توراعاسى داريعا نازارباەۆانىڭ توراعالىعىمەن پالاتانىڭ جالپى وتىرىسى ءوتتى. وندا دەپۋتاتتار جوعارعى سوت سۋديالارىن سايلاپ, بىرقاتار زاڭ قابىلدادى.
داۋىس بەرۋ ناتيجەسىندە نۇرعازى ابدىقانوۆ, مارعۇلان بەكتۇرعانوۆ جانە شولپان دانياروۆا جوعارعى سوت سۋدياسى قىزمەتىنە تاعايىندالدى. وتىرىسقا قاتىسقان جوعارى سوت كەڭەسىنىڭ توراعاسى تالعات دوناقوۆ «مەملەكەت باسشىسى اتالعان ازاماتتاردى جوعارعى سوت سۋدياسى قىزمەتىنە سايلاۋ تۋرالى ۇسىنىمدى ەنگىزدى. تانىستىرىلعان بۇل ادامداردىڭ كوپ جىلدىق سۋديالىق ەڭبەك ءوتىلى بار», دەدى. سونىمەن قاتار كونستيتۋتسيالىق كەڭەستىڭ مۇشەسى ءۇنزيلا شاپاقتىڭ وكىلەتتىك مەرزىمىنىڭ اياقتالۋىنا بايلانىستى ونى قايتا تاعايىنداۋ ءۇشىن كانديداتۋراسى ۇسىنىلىپ, اتالعان لاۋازىمعا قايتا سايلاندى. جاڭا سايلانعان سۋديالار سەنات وتىرىسىندا سالتاناتتى تۇردە انت بەردى. سونىمەن قاتار سەناتورلار ورتالىق سايلاۋ كوميسسياسى مۇشەسى باقىت مەلدەشەۆتىڭ وكىلەتتىگىن توقتاتۋ جانە قىزمەتىنەن بوساتۋ تۋرالى قاۋلى قابىلدادى.
ءارى قاراي وتىرىستىڭ كۇن تارتىبىنە سايكەس دەپۋتاتتار «قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى «بايقوڭىر» كەشەنىن گازبەن جابدىقتاۋ تۋرالى كەلىسىمدى راتيفيكاتسيالاۋ تۋرالى» زاڭ جوباسىن تالقىلاپ, ونى ءبىر اۋىزدان قابىلدادى. زاڭ جوباسىن ەنەرگەتيكا ءمينيسترى نۇرلان نوعاەۆ تانىستىردى. ءمينيستردىڭ ايتۋىنشا, كەلىسىم «بايقوڭىر» كەشەنىن گازبەن قامتاماسىز ەتۋدىڭ قۇقىقتىق نەگىزدەرىن ايقىنداۋعا باعىتتالعان جانە تۇتىنۋشىلاردى سۇيىتىلعان مۇناي گازىنان تابيعي گازعا كوشىرۋدى كوزدەيدى. «بۇگىندە بايقوڭىر قالاسىندا 328 كوپپاتەرلى تۇرعىن ءۇي, 45 جەكە تۇرعىن ءۇي, 5 مەكتەپ, 3 بالاباقشا جانە كوپسالالى اۋرۋحانا تابيعي گازعا قوسىلعان. سۇيىتىلعان مۇناي گازىنىڭ باعاسى ءبىر كيلوسىنا 343 تەڭگە نەمەسە تەكشە مەترگە شاققاندا 714 تەڭگەنى قۇرايدى. ال بايقوڭىر قالاسى جانە قىزىلوردا وبلىسىنداعى تابيعي گازدىڭ بولشەك باعاسى تۇرعىندار ءۇشىن قوسىمشا قۇن سالىعىن ەسەپتەمەگەندە ءبىر تەكشە مەترگە 18,6 تەڭگە, زاڭدى تۇلعالار جانە بيۋدجەتتىك ۇيىمدار ءۇشىن ءبىر تەكشە مەترى 18,9 تەڭگە. وسى كەلىسىم تۇرعىندار ءۇشىن كوممۋنالدىق قىزمەت شىعىندارىن ازايتۋعا مۇمكىندىك بەرەدى. سەبەبى سۇيىتىلعان گازعا قاراعاندا, تابيعي گازدىڭ قۇنى ايتارلىقتاي ارزان. بۇدان باسقا, بايقوڭىر قالاسىندا گازدى ءبولۋ ينفراقۇرىلىمى سالىستىرمالى تۇردە جاڭا بولىپ ەسەپتەلەدى», دەدى ەنەرگەتيكا ءمينيسترى.
ودان كەيىن قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى زاڭسىز كوشى-قونعا قارسى كۇرەستەگى ىنتىماقتاستىق تۋرالى كەلىسىم راتيفيكاتسيالاندى. قۇجاتتى تانىستىرعان ىشكى ىستەر ءمينيسترى ەرلان تۇرعىمباەۆ بۇل زاڭ قابىلدانعاندا قوس ازاماتتىق جانە زاڭسىز كوشى-قونعا قاتىستى ماسەلەلەردى رەتتەۋگە مۇمكىندىك بەرەتىنىن ايتتى. «ستاتيستيكا بويىنشا 2019 جىلى شەكارا ارقىلى 6 ملن ازامات كىرگەن, ونىڭ ىشىندە 2,5 ميلليونى وزبەكستان ازاماتى. 1,5 ميلليونى ترانزيت ارقىلى باسقا ەلگە كەتسە, 1 ميلليون ازامات ەلىمىزدە تىركەلگەن, ونىڭ ىشىندە 500 مىڭنان استامى ۋاقىتشا جۇمىس ىستەگەن. وسى كەلىسىم ارقىلى قوس ازاماتتىقتى جويىپ, ۇلتتىق قاۋىپسىزدىكتى قامتاماسىز ەتەمىز. نەگىزى, قازاقستان مەن وزبەكستان مەملەكەتتەرىندە زاڭ بويىنشا قوس ازاماتتىق جوق», دەدى ىشكى ىستەر ءمينيسترى ەرلان تۇرعىمباەۆ.
سەناتور ءابدالى نۇراليەۆ ءوز كەزەگىندە سىرتتان كەلەتىن ميگرانتتار اراسىندا قۇقىق قورعاۋ ورگاندارىنىڭ ىزدەۋىندە جۇرگەن ءارى ەلىمىزدىڭ قاۋىپسىزدىگىنە نۇقسان كەلتىرەتىن ازاماتتاردىڭ بولۋى مۇمكىن ەكەنىن ايتىپ, الاڭداۋشىلىق ءبىلدىردى. ال سارسەنباي ەڭسەگەنوۆ ەكى ەل اراسىنداعى كەلىسىمنىڭ ورىس تىلىندە جازىلاتىنىنا قاتىستى ەسكەرتۋ جاسادى.
پالاتا دەپۋتاتتارى «دۇنيەجۇزىلىك پوشتا وداعىنىڭ جارعىسىنا توعىزىنشى قوسىمشا حاتتامانى راتيفيكاتسيالاۋ تۋرالى» زاڭ جوباسىن قارادى. قۇجاتتى تانىستىرعان تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆتىڭ ايتۋىنشا, زاڭ جوباسى پوشتا قىزمەتىنىڭ ءتيىمدى جۇمىس ىستەۋىن جانە ۋاعدالاسۋشى ەلدەر ۇكىمەتتەرىنىڭ وكىلەتتى وكىلدەرىنىڭ مادەني, الەۋمەتتىك جانە ەكونوميكالىق سالالارداعى حالىقارالىق ىنتىماقتاستىق ماقساتتارىنا قول جەتكىزۋگە جاردەمدەسۋ ارقىلى ەلدەر اراسىنداعى بايلانىستىڭ دامۋىن جاقسارتادى, سونداي-اق ساپالى, قولجەتىمدى, امبەباپ پوشتا قىزمەتتەرىن دامىتۋدى ىنتالاندىرۋعا مۇمكىندىك بەرەدى. «قۇجات قارجىلىق, قۇقىقتىق, ەكولوگيالىق ءارى الەۋمەتتىك-ەكونوميكالىق ماسەلەلەرگە اكەلىپ سوقپايدى, پوشتا بايلانىسى سالاسىنداعى حالىقارالىق ىنتىماقتاستىقتى قولداۋ ءۇشىن قولايلى جاعدايلار جاسايدى», دەدى ا.جۇماعاليەۆ.
سەناتور بەكمىرزا ەلامانوۆ زاڭ جوباسىن تالقىلاۋ بارىسىندا اۋىلدىق ەلدى مەكەندەردى پوشتا قىزمەتىمەن قامتاماسىز ەتۋ ماسەلەسىنە نازار اۋداردى. ول پوشتانىڭ اۋىل تۇرعىندارىنا قارجىلىق جانە بانكتىك قىزمەت كورسەتەتىنىن, زەينەتاقى مەن جاردەماقىنى الىپ, كوممۋنالدىق قىزمەت اقىسىن تولەۋ دە پوشتا ارقىلى جۇزەگە اساتىنىن ەسكەرۋ كەرەگىن ەسكە سالدى. سەنات دەپۋتاتى مۇحتار قۇل-مۇحاممەد بۇگىندە گازەتتەردىڭ تيراجى ازايىپ بارا جاتقانىن ايتا كەلە, ونى ساقتاۋ ماقساتىندا قازاق تىلىندەگى باسىلىمداردى اۋىل-ايماققا جەتكىزۋدىڭ باعاسىن تومەندەتۋ كەرەگىن ايتتى. بۇل تۇرعىدا «قازپوشتا» اق باسقارما توراعاسى ساكەن سارسەنوۆ گازەت-جۋرنال تاسىمالىنىڭ تاريف باعاسىن تومەندەتۋ ءۇشىن مەملەكەت تاراپىنان سۋبسيديا قاجەت ەكەنىن جەتكىزدى.
دەپۋتاتتار 2006 جىلعى 6 قاراشاداعى قازاقستان رەسپۋبليكاسىنىڭ ۇكىمەتى مەن ارمەنيا رەسپۋبليكاسىنىڭ ۇكىمەتى اراسىنداعى تابىس پەن م ۇلىككە سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق سالۋدان جالتارۋعا جول بەرمەۋ تۋرالى كونۆەنتسيا جانە وعان حاتتاما شەڭبەرىندە قازاقستان رەسپۋبليكاسىنىڭ جانە ارمەنيا رەسپۋبليكاسىنىڭ ۋاكىلەتتى ورگاندارى بەرگەن رەزيدەنتتىكتى راستايتىن رەسمي قۇجاتتاردى تانۋ ءتارتىبى تۋرالى نوتالار الماسۋ نىسانىنداعى كەلىسىمدى راتيفيكاتسيالادى.
سەنات وتىرىسى بارىسىندا بىرنەشە دەپۋتاتتىق ساۋال جولداندى. ولاردىڭ قاتارىندا قورشاعان ورتانىڭ ەكولوگيالىق قاۋىپسىزدىگى, جەرگىلىكتى پوليتسيا قىزمەتى, ءبىلىم جانە باسقا دا سالالارعا قاتىستى ماسەلەلەر قوزعالدى.