الەمدە ينفەكتسيا جۇقتىرعاندار سانى كۇن سايىن ارتىپ كەلە جاتقاندىقتان, ەلىمىزدە قىتاي جانە شەكارالاس مەملەكەتتەردەن كەلگەن ازاماتتارعا مونيتورينگ جالعاسۋدا.
بۇگىنگە دەيىن 4650 ادامعا مونيتورينگ جۇرگىزىلدى, ونىڭ ىشىندە 1 «ا» ساناتى بويىنشا – 1217, 1 «ب» ساناتى بويىنشا – 189, 2 سانات بويىنشا 3244 ادام مەديتسينالىق باقىلاۋدا بولدى. 11 ناۋرىزداعى جاعداي بويىنشا بارلىعى 3974 ادام باقىلاۋدا تۇر. كوروناۆيرۋس بويىنشا قازاقستانداعى سوڭعى ەپيدەميولوگيالىق جاعدايدى بايانداعان دەنساۋلىق ساقتاۋ مينيسترلىگى 11 ناۋرىزداعى جاعداي بويىنشا بارلىعى 90 ادام دەنە قىزۋىمەن جانە جرۆي-مەن, ونىڭ ىشىندە 1 «ب» ساناتى بويىنشا – 20 ادام, 2 سانات بويىنشا – 36 ادام, 3 سانات بويىنشا 34 ادام ەمدەۋگە جاتقىزىلعانىن مالىمدەدى. ەمدەۋگە جاتقىزىلعان 90 ادامنىڭ ىشىنەن 52 ادام شىعارىلدى. 38 ادام ستاتسيوناردا جاتىر.
ال دۇنيە ءجۇزى بويىنشا 117 مەملەكەتتە 38140 ادام كوروناۆيرۋس ينفەكتسياسىن جۇقتىرعان. 1135 ناۋقاس كوز جۇمدى. مينيسترلىك بەرگەن مالىمەتتەرگە قاراعاندا الەمدە ينفەكتسيا جۇقتىرعاندار سانى كۇن سايىن 13,7 پايىزعا, ءولىم-ءجىتىم 2,9 پايىزعا ارتىپ وتىر.
وسى اپتادا تۇركيادا دا كوروناۆيرۋستىڭ جاڭا ءتۇرىن جۇقتىرۋ وقيعاسى العاش رەت تىركەلدى. بۇل تۋرالى تۇركيانىڭ دەنساۋلىق ساقتاۋ ءمينيسترى فاحرەتتين قوجا مالىمدەدى. ونىڭ ايتۋىنا قاراعاندا ۆيرۋس جۇقتىرعان ادام تۇركيانىڭ ازاماتى, جاقىندا عانا ەۋروپادان كەلگەن ەكەن. قازىرگى ۋاقىتتا كارانتينگە جابىلعان ناۋقاستىڭ جاعدايى تۇراقتى.
كوروناۆيرۋستىڭ ءورشىپ بارا جاتقانىنا الاڭداعان 3,5 مىڭعا جۋىق تۋريست نيۋ-يوركتەگى بۇۇ شتاب-پاتەرىنە تۋردان باس تارتتى. ەكسكۋرسيالىق بيۋرو باسشىسى ۆينچەنتسو پۋليەزە تۋرلار 31 ناۋرىزعا دەيىن بولمايتىنىن ايتادى. سونداي-اق ەندى تەك بۇۇ تەرريتورياسىنا رۇقسات قاعازى بارلار عانا شتاب-پاتەرگە كىرە الادى.
ال بيىلعى 24 شىلدە مەن 9 تامىز اراسىندا وتەدى دەپ جوسپارلانعان توكيو وليمپياداسى كوروناۆيرۋسقا بايلانىستى ءبىر نەمەسە ەكى جىل كەيىنگە قالدىرىلۋى مۇمكىن. جاپونياداعى ۇيىمداستىرۋ كوميتەتىنىڭ مۇشەسى حارۋيۋكي تاكاحاشي بۇل جونىندە «وليمپيادانى كەلەسى جىلى وتكىزۋ قيىن بولادى, سەبەبى ول كەزگە ماڭىزدى سپورت سايىستارى جوسپارلانىپ قويعان. سوندىقتان جازعى ويىنداردى ەكى جىلدان كەيىن وتكىزگەن دۇرىس» دەيدى.
كيەۆ مەرى ۆيتالي كليچكو كوروناۆيرۋس تاراۋىنىڭ الدىن الۋ ءۇشىن 12 ناۋرىزدان باستاپ ۋكراينا استاناسىندا كارانتين جاريالاناتىنىن مالىمدەدى. قالا باسشىسى ورتا جانە جوعارى ءبىلىم مەكەمەلەرىندە, بالاباقشالاردا, شىعارماشىلىق جانە سپورت مەكتەپتەرىندە وقۋ پروتسەسىنە شەكتەۋ قويىلاتىنىن ايتتى. سونداي-اق قالادا كوپ ادام قاتىساتىن ءىس-شارالار شەكتەلەدى. بۇل كونتسەرتتەر, كونفەرەنتسيالار, كينوسەانستار جانە باسقا دا ءىس-شارالارعا قاتىستى. ويىن-ساۋىق ورتالىقتارى دا جابىلادى.
قازاقستاندا دا WhatsApp مەسسەندجەرى ارقىلى 11-22 ناۋرىز ارالىعىندا كارانتين جاريالانعانى تۋرالى اقپارات تاراعان بولاتىن. الايدا دەنساۋلىق ساقتاۋ مينيسترلىگىنىڭ رەسمي وكىلى دياس احمەتشارىپ بۇل اقپارات شىندىققا جاناسپايتىنىن مالىمدەدى. «بۇل – جالعان. ەلدەگى جۇمىس كۇندەرىن قامتۋدى ۇكىمەت شەشەدى» دەدى, رەسمي وكىل.