يوردانيانىڭ باس شاھارى - امماندا بوكستان توكيو وليمپياداسىنا جولداما بەرەتىن ازيا جانە تىنىق مۇحيتى ايماعى ءتۋرنيرىنىڭ فينالى ءوتىپ جاتىر.
81 كەلىدە جۇدىرىقتاسقان وتانداسىمىز, 2019 جىلعى الەم چەمپيونى بەكزات نۇرداۋلەتوۆ فينالدىق ايقاستا اۋستراليالىق بوكسشى پاۋلو اۋكۋسونى ايقىن باسىمدىقپەن جەڭىپ, ىرىكتەۋ جارىسىنىڭ چەمپيونى اتاندى.
العاشقى راۋندتا بەلسەندى قيمىلداعان وتانداسىمىز قارسىلاسىنان باسىم بولدى. سونداي اق, ەكىنشى جانە ءۇشىنشى راۋندتا دا قازاقستاندىق بوكسشى قارسىلاسىن سوققىنىڭ استىنا الىپ, جەڭىس ءۇشىن بارىن سالدى. ءتىپتى, سوڭعى 3 مينۋتتا اۋستراليالىقتى نوكداۋنعا جىبەرگەنىن ايتا كەتەيىك.
وسىلايشا بەكزات نۇرداۋلەتوۆ وليمپياداعا ىرىكتەۋ ءتۋرنيرىنىڭ جولداماسىن جەڭىپ قانا قويماي, ءتۋرنيردىڭ باس جۇلدەسىن يەلەندى.
ايتا كەتەيىك, بۇعان دەيىن زاكىر سافيۋللين (63 كگ) مەن ءابىلحان امانقۇل (75 كگ) كۇمىس جۇلدە يەلەنگەن بولاتىن.