جۋىردا الماتىداعى ۇلتتىق كىتاپحانادا قازاقستان جازۋشىلار وداعى باسقارماسىنىڭ مۇرىندىق بولۋىمەن جازۋشىلار وداعىنىڭ 75 جىلدىعى اياسىندا بەلگىلى قارت جازۋشى-پۋبليتسيست ساپابەك ءاسىپ ۇلىنىڭ “قاۋقارسىز قازاق ماسەلەسى” اتتى كىتابىنىڭ تۇساۋكەسەرى بولدى. باسقوسۋ تىزگىنىن العان قازاقستان جازۋشىلار وداعى باسقارما ءتوراعاسىنىڭ ءبىرىنشى ورىنباسارى, حالىقارالىق “الاش” ادەبي سىيلىعىنىڭ لاۋرەاتى, بەلگىلى اقىن عالىم جايلىباي جاسى سەكسەننىڭ سەڭگىرىنە كوتەرىلگەن قارت قالامگەر ساپابەك ءاسىپ ۇلىنىڭ شىعارماشىلىعىنا, قوعام ومىرىندەگى بەلسەندىلىگىنە, اسىرەسە, ۇلت تاعدىرىنا قاتىستى ماسەلەدە ايرىقشا قىزمەت جاساپ جۇرگەنىنە توقتالدى. القالى جيىنداردا جاس ۇرپاقتىڭ كەلەشەگى, جەر, باسقا دا وزەكتى ماسەلەلەر توڭىرەگىندەگى وتكىر دە ويلى پىكىرلەرىن اشىق بىلدىرە الاتىن قايراتكەرلىك قاسيەتىن اتاپ ءوتتى. قارت قالامگەردىڭ يىعىنا كۇللى ارىپتەستەرىنىڭ اتىنان شاپان جاۋىپ, قۇرمەت كورسەتتى.
بەلگىلى اقىن, م.ماقاتاەۆ اتىنداعى سىيلىقتىڭ لاۋرەاتى امانحان ءالىم س.ءاسىپ ۇلىنىڭ شىعارماشىلىعى جونىندە مازمۇندى بايانداما جاسادى. سودان سوڭ جاڭا تۋىندى تۋرالى, سونداي-اق, ساپابەك ءاسىپ ۇلىنىڭ اقساقالدىق, ازاماتتىق, قايراتكەرلىك قاسيەتتەرى تۋرالى كوپتەگەن اقىن-جازۋشىلار, زيالى قاۋىم وكىلدەرى وزەكجاردى وي-پىكىرلەرىن ءبىلدىردى.
تۇساۋكەسەر راسىمىنە قاتىسۋشىلار ۇلتتىق كىتاپحانا ازىرلەگەن ساپابەك ءاسىپ ۇلىنىڭ شىعارماشىلىعىنا ارنالعان كىتاپ كورمەسىن تاماشالادى.
سەرىكجان قاجي, قازاقستان جازۋشىلار وداعىنىڭ اعا رەفەرەنتى. الماتى.