پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن بريفينگتە قازاقستاننىڭ باس سانيتارلىق دارىگەرى جانداربەك بەكشين كوروناۆيرۋس ەۋروپا ەلدەرىندە تەز تاراپ جاتقانىن ايتىپ, ساقتىق شارالارىنىڭ كۇشەيە تۇسەتىنىن جەتكىزدى.
بۇعان دەيىن قىتاي, يران, وڭتۇستىك كورەيا كوروناۆيرۋس بويىنشا قاۋىپتى ەلدەردىڭ 1 «ا» ساناتىندا بولسا, ەندى ولاردىڭ قاتارىنا يتاليا قوسىلدى. سوندىقتان دا بۇل ەلمەن قارىم-قاتىناس 8 ناۋرىزدان باستاپ شەكتەلگەن. «قىتايدا جاعداي تۇراقتانىپ كەلەدى. بۇل ەلدە اۋرۋدىڭ تارالۋى 0,02 پايىزعا دەيىن تومەندەدى. بىراق ءبىزدى ەۋروپا ەلدەرى قاتتى الاڭداتىپ وتىر. مىسالى, يتاليادا اۋرۋدىڭ كۇندەلىكتى ءوسۋى 20 پايىزدان اسىپ, ءولىم-ءجىتىم بويىنشا ءبىرىنشى ورىنعا شىقتى. سوندىقتان بۇل ەلدى ءبىز ەڭ قاۋىپتى ەلدەردىڭ 1-ساناتىنىڭ «ب» توبىنان شىعارىپ, «ا» توبىنا كىرگىزدىك. بۇدان بولەك فرانتسيا, گەرمانيا, يسپانيا ەلدەرىندە دە اۋرۋ ءورشىپ بارادى. ولار 1 «ب» توبىنا ەنىپ وتىر. ءبىزدىڭ ەۋروپامەن قارىم-قاتىناسىمىز تىعىز. سوندىقتان وتانداستارىمىز بۇل ەلدەرگە ساپارلاۋدى ازىرشە جوسپارلاماعانى ءجون جانە سوندا تۇراتىن دوس-جاران, تانىستارىن شاقىرۋدىڭ قاجەتى جوق», دەدى باس سانيتار.
ج.بەكشين 1-سانات – «ا» توبىنداعى ەلدەردەن كەلگەندەر ەكى اپتا اۋرۋحانادا وقشاۋلاۋدا, ال 1-سانات – «ب» توبىنداعى مەملەكەتتەن كەلگەندەر 14 كۇن ءۇي كارانتينىندە بولاتىنىن ەسكەرتتى. سونداي-اق ول 2-ساناتتاعى ەلدەردىڭ قاتارىنا شۆەيتساريا, ۇلىبريتانيا, نيدەرلاند, ال 3-ساناتقا بەلگيا, شۆەتسيا, نورۆەگيا, ءۇندىستان, يراك, فيليپپين, اقش كىرەتىنىن اتاپ ءوتتى. «1 «ب» جانە 2-ساناتتاعى مەملەكەتتەردەن كەلگەندەر ءۇي كارانتينىندە بولۋى ءتيىس. ءاربىر ادام ءوزىنىڭ جانە ماڭايىنداعى تۋىس-تۋعان, دوس-جاراندارىنىڭ دەنساۋلىعىن ويلاۋى كەرەك. كاسىپورىن, ۇيىمداردىڭ باسشىلارى بۇكىل ۇجىمدى قورعاۋ ءۇشىن 1-2 ساناتتاعى ەلدەردەن كەلگەن قىزمەتكەرلەرىن جۇمىسقا جولاتپاۋى كەرەك. باس سانيتارلىق دارىگەردىڭ قاۋلىسىن قازاقستاندىقتار عانا ەمەس, ەلگە كەلگەن وزگە ەلدىڭ ازاماتتارى ورىنداۋى مىندەتتى» دەگەن ج.بەكشين ءاربىر ادام جەكە گيگيەنا ەرەجەلەرىن قاتاڭ ساقتاۋى ءتيىس ەكەنىن تاعى ءبىر رەت ەسكەرتتى.
باس سانيتار قازىرگى كەزدە 703 ادامنىڭ اۋرۋحانادا, 167 ادامنىڭ ءۇي كارانتينىندە جاتقانىن, ال 2-سانات بويىنشا مەديتسينالىق باقىلاۋدا 3019 ادامنىڭ بار ەكەنىن جەتكىزدى. «جاعداي ءار 2-3 كۇن سايىن وزگەرۋدە. دەنساۋلىق ساقتاۋ مينيسترلىگى 6 قاڭتاردان باستاپ تاۋلىك بويعى جۇمىس تارتىبىنە كوشتى. بۇل بىزگە كۇن سايىنعى جاعدايعا مونيتورينگ جاساپ, باقىلاۋدى كۇشەيتۋ بويىنشا جەدەل شارا قابىلداۋ ءۇشىن كەرەك», دەگەن ج.بەكشين ەلىمىزدە كوروناۆيرۋس تىركەلگەن جاعدايدا بىردەن ارنايى شارالار قولعا الىناتىنىن ايتتى.
«بارلىق ءتيىستى شارانى ىسكە اسىرىپ جاتىرمىز. «شەڭبەر» اياسى تارىلىپ بارا جاتىر. باسىندا قىتاي ەلى عانا ەدى. قازىر يران, وڭتۇستىك كورەياعا جەتىپ, ارتىنشا ەۋروپا ەلدەرىن شارپىدى. ينفەكتسيا تىركەلگەن ەلدەردىڭ ورتاسىندا قالدىق. البەتتە بىزگە ۆيرۋس كىرمەيدى دەپ كەپىلدىك بەرە المايمىز. ۆيرۋس – قاماپ تاستايتىن «مال» ەمەس. ادام مەن جانۋار ارقىلى جۇعا بەرەدى. كۇن ساۋلەسى ونى جەڭە مە, جوق پا دەگەن دە سۇراق قويىلىپ جاتىر. كۇن جارقىراپ تۇرعان يراندى قاراڭىز. ءبىزدىڭ مىندەت – جۇمىلا كىرىسىپ, ساقتىق شارالارىن كۇشەيتە بەرۋ», دەدى ول.