جۋىردا جامبىل وبلىسىنىڭ مەركى اۋدانىنداعى ەرەكشە قورعالاتىن تاۋلى ايماقتا «قىزىل كىتاپقا» ەنگەن, بۇگىندە قار بارىسى اتالىپ جۇرگەن ءىلبىستىڭ بەينەتاسپاعا ءتۇسىپ قالعانى تۋرالى اقپارات كوپشىلىكتى تاڭداندىرعان بولاتىن.
وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنا قاراستى «مەركى ورماندار جانە جانۋارلار دۇنيەسىن قورعاۋ» مەكەمەسىنىڭ مالىمەتىنشە, قىرعىز الاتاۋىنىڭ جەرگىلىكتى ماڭىزى بار «مەركى» قاۋمالىنا كىرەتىن جەرلەرىندە ارنايى ورناتىلعان فوتوتۇزاققا تۇڭعىش رەت ءبىر قار بارىسى تۇسكەن. تاۋلى ايماقتا اتالعان مەكەمە قىزمەتكەرلەرىنىڭ جابايى اڭدار مەن جانۋارلاردى قورىپ-كۇزەتۋ جۇمىستارىنىڭ بارىسىندا فوتوتۇزاققا تاعى ءۇش بىردەي قار بارىسى ءتۇسىپتى. سونداي-اق بۇگىندە قار بارىسىمەن قاتار, ارنايى قۇرىلعان فوتوتۇزاققا 23 باس ارقاردىڭ تۇسىرىلگەنى دە انىقتالعان.
مەكەمە ديرەكتورى جاسۇزاق ءيبرايموۆتىڭ ايتۋىنشا, بىرىككەن ۇلتتار ۇيىمىنىڭ باعدارلاماسى بويىنشا مەكەمەگە ارنايى فوتوتۇزاق بەرىلگەن ەكەن. بۇل قۇرالدى پايدالانۋدىڭ ناتيجەسىندە قار بارىسىنىڭ مەركى ورمان قورى جەرلەرىندە بار ەكەنىنە كوز جەتكىزدىك. «بۇل دەگەنىمىز – قار بارىسىنىڭ جامبىل وبلىسىنىڭ مەركى اۋدانى تاۋلارىندا بار ەكەنىن دالەلدەيتىن ناقتى دەرەك. وڭىردە قار بارىسىنىڭ پايدا بولۋى تابيعي ورمان قورى جەرلەرىنىڭ جاقسى ساقتالعانىن كورسەتەدى. سونىمەن قاتار جۇرگىزىلگەن جۇمىستاردىڭ ناتيجەسى دە ول جەردە قار بارىسى قورەكتەنەتىن جابايى اڭداردىڭ جەتكىلىكتى ەكەنىن انىقتاپ وتىر», دەيدى ول.
مۇنداي تابيعي بايلىقتى قورعاۋ مىندەت. ەندى بىرىككەن ۇلتتار ۇيىمى باعدارلاماسىنىڭ ودان ارعى جۇمىس ماقساتى – مەركى ايماعىندا ەرەكشە قورعالاتىن تابيعي پارك قۇرۋ. بۇل رەتتە وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسى باسشىسىنىڭ ورىنباسارى ايبار ادىلباقوۆ كۇن تارتىبىندە ارنايى جوبا دايىنداپ, سول ماڭنان پارك اشۋ ماقساتى تۇرعانىن ايتادى. ياعني پارك اۋماعىندا اڭشىلىق جۇرگىزۋگە جانە جەكە شارۋاشىلىقپەن اينالىسۋعا تىيىم سالىنادى. الداعى ۋاقىتتا پارك قۇرىلىپ جاتسا, بۇل دا تابيعات بايلىعىن ساقتاپ قالۋعا سەپتىگىن تيگىزەر ەدى. وتكەن جىلدىڭ وزىندە زاڭسىز اڭ اۋلاۋعا بايلانىستى 12 حاتتاما تولتىرىلعان.
«مەركى ورماندار جانە جانۋارلار دۇنيەسىن قورعاۋ» مەكەمەسىنىڭ مالىمەتىنشە, اتالعان اۋماقتا بۇگىندە 4 قار بارىسى, 120 ارقار, 8 ءۇندى جايراسى جانە 12 تۇركىستان سىلەۋسىنى پايدا بولعان. دەگەنمەن, اڭداردىڭ قاۋىپسىزدىگى ءۇشىن بەينەتاسپاعا تۇسكەن جەرلەردىڭ ناقتى اۋماعى ايتىلمايدى. ال اقپان ايىندا الماتى قالاسىنان زوولوگيا ينستيتۋتىنىڭ ماماندارى وڭىرگە ارنايى كەلىپ, قار بارىسىنىڭ بەينەتاسپاعا جازىلعان جەرلەرىنە زەرتتەۋ جۇمىستارىن جۇرگىزگەن. بەينەتاسپالاردى قاراۋ كەزىندە قار بارىسىنىڭ جانە ءۇندى جايراسىنىڭ بەينەلەرى راستالعان. اتقارىلعان جۇمىستاردىڭ ناتيجەسىندە وبلىس اۋماعىندا قار بارىسىنىڭ جانە وزگە دە «قىزىل كىتاپقا» ەنگەن اڭدار مەن جانۋارلاردىڭ بار ەكەنى انىقتالىپ وتىر.
جامبىل وبلىسى