وبلىستىق ءباسپاسوز كلۋبىندا شىعىس قازاقستان وبلىسىنىڭ بەس-التى اۋدانىندا سۋ تاسقىنىنىڭ ورىن الۋىنا بايلانىستى بىرنەشە باسقارمالار مەن دەپارتامەنت باسشىلارىنىڭ سىن ساتتە كومەك كورسەتىپ جاتقانىنا بايلانىستى اقپارات قۇرالدارى وكىلدەرىمەن كەزدەسۋ بولىپ ءوتتى. ءبىرىنشى بولىپ ءسوزدى وبلىستىق ءبىلىم بەرۋ باسقارماسىنىڭ باستىعى ەرساين نابيەۆ الدى.
– جاعدايدى جەدەل باقىلاۋ جانە سۋ تاسقىنىنان زارداپ شەككەندەرگە ۋاقىتىلى كومەك كورسەتۋ ءۇشىن ءبىلىم بەرۋ باسقارماسى مەن بولىمدەرىندە سۋ تاسقىنىنا قارسى شتابتار قۇرىلىپ, كەزەكشىلىك ۇيىمداستىرىلعان. بالالار, مۇعالىمدەر جانە اتا-انالار اراسىندا كەڭىنەن تۇسىنىك جۇمىستارى جۇرگىزىلۋدە. وسىدان ەكى كۇن بۇرىن ءبىز ءبىر توپ ادام كوكجىرا, جانتىكەي, اقسۋات اۋىلدارىندا بولىپ, اتا-انالار جانە وقۋشىلارمەن كەزدەستىك. جاعداي مۇندا وتە اۋىر. جانتىكەي, كوكجىرا, كوكتۇبەك اۋىلدارىندا ءۇش مەكتەپ قيراعان سوڭ تولىقتاي جابىلىپ, 800-دەي وقۋشى باسقا جەرگە كوشىرىلدى. ولار ەندى وقۋلارىن ەكپىن, اقسۋات, ساتباەۆ اۋىلدارىندا, كوكجىراداعى ەسكى مەكتەپ عيماراتىندا, اقسۋاتتاعى №17 كاسىپتىك ليتسەيدىڭ جاتاقحاناسىندا جالعاستىرماق. بيىلعى قاتال قىستىڭ سالدارىنان وبلىستىڭ بارلىق مەكتەپتەرىندە جارتى ايدان استام ۋاقىت ساباقتىڭ بولماي قالعانى بەلگىلى. دەمەك, ءبىز باعدارلامادان قالماۋىمىز كەرەك. ۇستازدار قاۋىمى جازعى تەستكە ساپالى ازىرلەنۋى كەرەك. سوندىقتان قوسىمشا ساباقتار ءجۇرگىزىلمەك. قازىر وبلىستىڭ كوپتەگەن مەكتەپتەرىندە قىزمەت ەتەتىن ۇستازدار ءبىر كۇندىك تابىستارىن اۋدارىپ, قولما-قول قارجى جيناستىرۋدا. سىن ساتتە سىزدەرمەن بىرگەمىز, – دەدى ەرسايىن احمەتۋالي ۇلى.
وبلىستىق كاسىپكەرلىك جانە ونەركاسىپ باسقارماسىنىڭ قىزمەتكەرلەرى دە اپات بولعان ايماقتارعا كومەكتەرىن جالعاستىرۋدا. سوڭعى ءبىر اپتادا ولار تارباعاتاي, كۇرشىم, زايسان جانە قاتونقاراعاي اۋداندارىنا اي-80 ماركالى 128,5 توننا, اي-92 ماركالى 101 توننا بەنزين جانە 124,5 توننا ديزەل وتىنىن جىبەرگەن. جولدار جابىلىپ قالسا دا جانارماي تاسۋشىلار اراعا بىرنەشە كۇندى سالىپ, امالىن تاۋىپ جەتكىزە بىلگەن. ارماتۋرا زاۋىتى 300 مىڭ تەڭگەنىڭ, “دينا” تولايىم ساۋدا بازارى – 120 مىڭ, “كسەدا” جانە “كەمونت” ساۋدا ۇيلەرى ارقايسىسى 290 جانە 270 مىڭ تەڭگەنىڭ كومەگىن كورسەتكەن. بۇل تۋرالى وبلىستىق كاسىپكەرلىك جانە ونەركاسىپ باسقارماسى باستىعىنىڭ ورىنباسارى ا. تايسارين ايتىپ بەردى.
اپات سالدارىنان بۇگىنگە دەيىن 60 مىڭعا تارتا مالدىڭ ولگەنى, 1 مىڭنان استام ۇيلەردىڭ قيراپ قالعانى, باسقا دا زارداپتاردىڭ ورىن العانى اۋىرتپالىقتار جۇكتەپ تۇر. كەندى التايعا رەسپۋبليكادان 841 ميلليون, ال جەرگىلىكتى بيۋدجەتتەن 180 ميلليون تەڭگەنىڭ بولىنگەنى بەلگىلى. قازىر اۋا رايى سالقىنداپ, قاردىڭ كۇرت ەرۋى ءبىر ساتكە توقتاعانىمەن, پرەمەر-مينيستر ك. ءماسىموۆتىڭ سەلەكتورلىق كەڭەستە وبلىس باسشىلارىنا “بيىل بىزدە كوكتەم بولمايدى, جاز ءبىر-اق شىعادى”, دەگەن ءسوزى كوپ جايدان حابار بەرىپ تۇرعانداي. ەگەر اۋا رايى كۇرت ىسىپ, قار تەز ەرىگەن جاعدايدا اپاتتىڭ اۋىلى الىس بولمايدى.
جيىندا ءولىپ جاتقان مالداردى جيناپ, ادامدارعا ءتۇرلى سىرقاتتاردىڭ جۇقپاۋى ءۇشىن پروفيلاكتيكالىق شارالاردىڭ وتە سىلبىر ءوتىپ جاتقانى دا ءسوز بولدى. ۆەتەرينارلىق قىزمەت تۇرلەرى ءالى قالىڭ ۇيقىدا. زاڭ بويىنشا وبلىستىق سانيتارلىق-ەپيدەميولوگيالىق باقىلاۋ جونىندەگى باسقارما قىزمەتكەرلەرى قالاداعى ساۋدا ورىندارىنا ءتۇسىپ جاتقان ەتتىڭ ساپاسىن تەكسەرە المايدى ەكەن. مۇنىمەن ۆەتەرينارلىق قىزمەت تۇرلەرى پروكۋراتۋرانىڭ رۇقساتىمەن عانا اينالىسا الادى. ولگەن مال ەتىنىڭ بازارلاردا ساۋدالانىپ كەتپەسىنە كىم كەپىلدىك بەرە الادى. سونداي-اق وبلىستىق دەنساۋلىق ساقتاۋ باسقارماسى باستىعىنىڭ ورىنباسارى نۇرلانعازى يبراەۆتىڭ ايتۋىنشا, كوكجىرا, جانتىكە, كوكتۇبەك اۋىلدارىنداعى دارىگەرلەر اۋدان ورتالىعى اقسۋاتقا جەتكىزىلىپ, بۇل جەردە 7 بىردەي دارىگەرلىك پۋنكت اشىلعان. ولارعا 450 مىڭ تەڭگەنىڭ قاجەتتى ءدارى-دارمەكتەرى بەرىلىپتى. قازىر تارباعاتاي اۋدانىنا سانيتارلىق 5 كولىك جانە بىرنەشە جەدەل جاردەم ماشينەلەرى جىبەرىلدى. ءتىپتى 5 بىردەي پسيحولوگ ماماندار دا زارداپ شەككەندەرمەن جۇمىس ىستەۋدە.
وسىدان بىرەر كۇن بۇرىن شىعىس قازاقستان وبلىسىنىڭ اكىمى بەردىبەك ساپارباەۆ اباي اۋدانىنىڭ بىرنەشە اۋىلدارىن ارالاپ, جاعدايمەن تانىستى. مۇنىڭ الدىندا كۇننىڭ قاتتى ىسىپ كەتۋىنەن اۋدان ورتالىعى قاراۋىلدىڭ ءبىر شەتىن تاسقىن سۋدىڭ شايىپ كەتكەنى بەلگىلى. مال ازىعىنىڭ ازايۋىنان ءولىم-جىتىمگە جول بەرىلۋدە. ءوڭىر باسشىسى بەردىبەك ماشبەك ۇلى اۋدان جانە اۋىل اكىمدەرىنىڭ سىن ساتتە سىلبىرلىققا جول بەرىپ, ءتىپتى ءۇي ماڭىنداعى شاتىردان اسىپ كەتكەن قالىڭ قاردى تازالاماي وتىرعانىن سىن تەزىنە الدى. ابايلىقتارعا كومەك كورسەتىلىپ جاتىر. بىراق, ادامدار دا سەرگەك بولىپ, اپاتتىڭ الدىن الۋعا كۇش سالۋلارى ءتيىس دەدى وبلىس اكىمى. كەشە وبلىسقا پرەمەر-مينيستردىڭ ءبىرىنشى ورىنباسارى ومىرزاق شوكەەۆ كەلىپ, سۋ تاسقىنى ورىن العان تارباعاتاي, زايسان, كۇرشىم جانە ءۇرجار اۋداندارىندا اپات زارداپتارىن جويۋ جاعدايىمەن تانىستى. سۋ تاسقىنىنىڭ قانشا زيان كەلتىرەتىنى, قانشا قارجىنىڭ قاجەت ەكەنى سوندا انىقتالماق.
وڭداسىن ەلۋباي, شىعىس قازاقستان وبلىسى.