گازەتىمىزدىڭ 3 اقپانداعى سانىندا «ساۋاتسىز پوليتسيا حاتتامانى قالاي تولتىرادى؟» دەگەن ماقالا جارىق كورگەن بولاتىن. وندا شىمكەنت قالاسىنىڭ مامانداندىرىلعان اكىمشىلىك سوتىنىڭ توراعاسى ءابدىمۇتالىپ بەكتۇرعانوۆتىڭ بريفينگتە بەرگەن اقپاراتىنا سۇيەنىپ, شىمكەنتتىك پوليتسيا وكىلدەرىنىڭ حاتتامانى ەلەكتروندى تۇردە دۇرىس تولتىرا الماي, ءتۇرلى قاتەلىكتەرگە بوي الدىرعاندىعىن تىلگە تيەك ەتكەن ەدىك.
تارقاتىپ ايتار بولساق, اكىمشىلىك حاتتامانى جازۋ بارىسىندا ءتارتىپ ساقشىلارى اكىمشىلىك قۇقىق بۇزۋشىلىق تۋرالى زاڭنىڭ باپتارىن جازعانىمەن, ىشكى تارماقتارىن كوبىنە اشىپ جازا بەرمەگەن. وسىلايشا زاڭ تارماقتارىنان شاتاسىپ نەمەسە ادامداردىڭ اتى-ءجونىن دۇرىس كورسەتپەگەن. ءتىپتى ۋچاسكەلىك ينسپەكتور دا, جول-پاترۋلدىك پوليتسيا قىزمەتكەرى دە ەلەكتروندى حاتتامادا ءوز اتى-ءجونىن زورعا جازاتىن كورىنەدى. ءابدىمۇتالىپ ەلىكباي ۇلىنىڭ سوزىنە سۇيەنسەك, بۇل ولقىلىق قۇقىق بۇزۋشىلىقتى زاڭ تۇرعىسىنان دۇرىس باعامداۋعا كەرى اسەرىن تيگىزىپ, سالدارىنان سوت بارىسىندا اكىمشىلىك ءىستى قايتا سارالاۋعا ءماجبۇر ەتۋدە.
جۋىردا ءتىپتى ەلەكتروندى پلانشەتتى دۇرىس پايدالانا الماعان شىمكەنتتىك پوليتسەيلەر وڭاي ولجاعا كەنەلۋدىڭ جولىن ىزدەپ قىزمەتتىك قۇرالدارىن لومباردقا وتكىزىپ جىبەرگەن. بۇل قۇقىق بۇزۋشىلىق تۋرالى مالىمەت شىمكەنت قالالىق ىشكى قاۋىپسىزدىك ديرەكتسياسىنىڭ ەكس-كاپيتانىنا قاتىستى سوت پروتسەسى كەزىندە بەلگىلى بولدى.
ءبىر قىزىعى, قىزمەتتىك گادجەتتەردىڭ جوعالعانى انىقتالىپ, تەرگەۋ جۇرگىزىلگەنىمەن ەشكىم جۇمىستان شىعارىلماعان. قىلمىستىق ءىس قوزعالىپ, كەيىننەن «قىلمىستىق قۇقىق بۇزۋشىلىقتىڭ انىقتالماعانى ءۇشىن» جابىلعان.
بىراق پوليتسيا ءبولىمى لومباردقا ارقايسىسى 185 مىڭ تەڭگە تۇراتىن التى پلانشەتتىڭ وتكىزىلگەنىن راستاپ وتىر. سوندا «بۇل پلانشەتتەر لومباردقا وزدىگىنەن بارعان با؟» دەگەن كۇلكىلى سۇراق تۋىندايدى…
شىمكەنت قالالىق ءىىب جەكە قاۋىپسىزدىك ءبولىمىنىڭ قىزمەتكەرى ف.ءشارىپباي ۇلىنا قاتىستى سوت پروتسەسى كەزىندە لومباردقا وتكىزىلگەن گادجەتتەردىڭ جايى اقىرى اشىلعان. ايىپتالۋشى پارامەن ۇستالعان كەزدە ونداعان پلانشەتتىڭ جوعالىپ كەتۋىنە قاتىستى تەرگەۋ جۇرگىزىلىپ جاتقانىن ايتقان.
ەستەرىڭىزگە سالار بولساق, ف.ءشارىپباي ۇلى ۇلكەن كولەمدە پارا العانى ءۇشىن ۇستالعان بولاتىن.
جالپى, شىمكەنت قالالىق پب قىزمەتتىك پايدالانۋ ءۇشىن 259 ملن 370 مىڭ تەڭگەگە بارلىعى 1402 پلانشەت ساتىپ العان. ال لومباردقا وتكىزۋدى ۇيعارعان پاترۋلدىك پوليتسيا پولكىنە قىزمەتتىك قولدانىسقا 680 پلانشەت بەرىلگەن.
بۇگىندە شىمكەنتتىك پوليتسيا قىزمەتكەرلەرىنىڭ جۇمىسىنا سىن ايتۋشىلاردىڭ قاتارى كوبەيىپ كەلەدى. بۇعان ءبىرىنشى كەزەكتە سالا ماماندارىنىڭ جۇمىسقا نەمقۇرايدىلىعى اسەر ەتسە كەرەك. وسىدان ءبىراز بۇرىن «سامال» شاعىن اۋدانى تۇرعىنىنىڭ ۇيىندە ۇرلىق فاكتىسى ورىن العان. پوليتسياعا حابارلاسقان جابىرلەنۋشىگە: «ارىز جازعانمەن, ءبارىبىر, جوعالعان زاتتارىڭىز تابىلمايدى», دەپ قىسقا قايىرىپتى.
وسىلايشا, پوليتسيا قىزمەتكەرلەرى قوعام ءتارتىبىن ساقتاۋ, تۇرعىنداردىڭ قاۋىپسىزدىگىن قامتاماسىز ەتۋ باستى مىندەتى ەكەندىگىن ەستەن شىعارىپ الىپ جاتقانداي...
شىمكەنت