سارسەنبى كۇنى وڭتۇستىك كورەيانىڭ سەوسان قالاسىنداعى Lotte Chemical Corp زاۋىتىندا بولعان جارىلىس سالدارىنان 56 ادام جاراقات الدى. بۇل تۋرالى Yonhap اگەنتتىگى حابارلادى.
ءورت سوندىرۋشىلەردىڭ ايتۋىنشا, تاڭعى ساعات 2:59-دا سەوسانداعى Daesan مۇناي-حيميالىق كەشەنىندە مۇناي كرەكينگىنىڭ قۇرىلعىسى جارىلىپ, ءورت شىققان. ءتىلسىز جاۋ ساعات 5:12-دە 270 ءورت ءسوندىرۋشى جانە 66 ارنايى تەحنيكانىڭ كۇشىمەن ءسوندىرىلدى. Lotte Chemical زاۋىتىندا جارىلىس مۇنايدىڭ سىعىلۋى سالدارىنان بولدى دەپ بولجانىپ وتىر.
جاراقاتتانعاندار اراسىندا كومپانيانىڭ ءتورت قىزمەتكەرى مەن جەرگىلىكتى تۇرعىندار بار. كومپانيانىڭ بەرگەن اقپاراتىنشا, قاتتى كۇيىك شالعان ەكى ادام اۋرۋحاناعا جەتكىزىلدى. قازا بولعاندار تۋرالى اقپارات كەلىپ تۇسكەن جوق.
Lotte Chemical باسشىسى ليم بيۋنگ-يۋن (Lim Byung-yun) بولعان وقيعاعا بايلانىستى وكىنىشىن ءبىلدىرىپ, كومپانيانىڭ جارىلىس سالدارىن جويۋعا جانە وتەماقى تولەۋگە قاتىستى ءىس-شارالار قولداناتىنىن ايتتى.