قىزىلاعاشتاعى سۋ تاسقىنىنان ەلدى مەكەننىڭ اياعىنداعى اقتوعان مەن ەگىنسۋ اۋىلىنىڭ حالقى زارداپ شەككەنىمەن ادام شىعىنى بولعان جوق. قازىرگى كەزدە مۇندا دا قيراعان ۇيلەردى قايتا سالۋ مەن زاقىمدانعاندارىن كۇردەلى جوندەۋ باستالدى. ارنايى تەكسەرۋدەن سوڭ ەگىنسۋداعى 26 ءۇي جاڭادان سالىنسا, 47 ۇيگە كۇردەلى جوندەۋ جۇمىستارى جۇرگىزىلەتىن بولدى. ال, اقتوعان اۋىلىندا 65 ءۇي قايتا سالىناتىن بولسا, 37 ءۇي جوندەۋ جۇمىستارىن قاجەت ەتەتىنى انىقتالعان.
اتالعان ەلدى مەكەندەردەگى تۇرعىن ۇيلەر مەن الەۋمەتتىك مادەني نىسانداردى قالپىنا كەلتىرۋدى “الماتى قۇرىلىس”, “وبلتياجستروي” مەكەمەلەرى باستاپ, جۇمىس جانە تەحنيكا كۇشى تارتىلىپ, مۇمكىندىگىنشە قۇرىلىستى قىسقا مەرزىمدە اياقتاۋعا جۇمىلعان.
تاسقىن شايعان 13 شاقىرىم سۋ قۇبىرى جۇيەسىنە ارنايى قوندىرعى ورناتۋ ماقساتىندا 5900 مەتر ور قازىلىپ, جۇيەگە قاجەتتى قۇبىر ورناتىلدى. حالىقتىڭ ازىق-ت ۇلىك قاۋىپسىزدىگى مەن سۋدىڭ ساپاسى وبلىستىق سانيتارلىق-ەپيدەميولوگيالىق قاداعالاۋ باسقارماسىنىڭ ماماندارى قاجەتتى نورماعا سايكەستىگى جايلى قورىتىندى جاساپ وتىر.
بۇگىنگى كۇنى قىزىلاعاشتا تاسقىننان قازا بولعاندار سانى 44 ادامعا جەتتى. ءالى دە ءبىر ادامنىڭ ءىز-ءتۇزسىز جوعالعانى جايلى تۋىستارىنىڭ شاعىمى بويىنشا ىزدەستىرۋ جۇمىستارى جالعاسۋدا. قىزىلاعاش, اقتوعان مەن ەگىنسۋ اۋىلدارىندا 2742 باس مالدىڭ ولەكسەسى انىقتالىپ, كومىلدى.
كەيبىر اقپارات قۇرالدارى قۇربان بولعانداردىڭ قاتارى جۇزدەپ سانالادى دەگەنى شىندىققا جاناسپايتىنىن جەتكىزگەن وبلىس اكىمىنىڭ ورىنباسارى سەرىك مۇقانوۆ قۇقىق قورعاۋ ورگاندارىنا جاقىن تۋىستارىن ىزدەپ, ارىز ايتۋشىلاردىڭ كەلەتىنىن ايتتى. بۇگىنگى كۇنى ءبىر ازاماتقا قاتىستى ىزدەستىرۋ شارالارىنان وزگە ءوتىنىش تىركەلمەگەن. ادام ەمەس, مالى جوعالسا ىزدەۋ سالىناتىنىن ەسكەرسەك, ءجونسىز اقپاراتقا نەگىز جوق دەۋگە بولادى.
رەسپۋبليكالىق شۇعىل قۇتقارۋ وتريادى مەن وبلىستىڭ سۋدان قۇتقارۋ قىزمەتىندەگىلەر وزەن ساعاسىنداعى 15-20 شاقىرىمداعى ىزدەستىرۋ جۇمىستارىن ءالى دە جالعاستىرىپ كەلەدى. سونىمەن قاتار №28237 اسكەري ءبولىمىنىڭ 40-تان استام اسكەريلەرى “مي-171” تىكۇشاعىمەن اشىق الاڭداردى تەكسەرىپ, ءىز-ءتۇزسىز كەتكەن ادامنىڭ دەنەسىن ىزدەستىرۋدە.
تۇرعىنداردىڭ وتىنىشىمەن كوكتەمگى ەگىسكە بايلانىستى جەر بەرۋ ماسەلەسى شەشىلىپ, 45 شارۋا قوجالىعى ناۋقانعا قاجەتتى تۇقىم, جانار-جاعارمايمەن قامتاماسىز ەتىلەتىن بولدى. بەرىلگەن القاپتارعا قانت قىزىلشاسى, كوكونىس ءوسىرۋ جوسپارلانسا, ديقاندار كۇزدىك بيداي سەبۋدى قولعا الاتىن بولدى. ەگىستىكتى سۋارۋ ماقساتىندا قىزىلاعاش سۋ قويماسىن قالپىنا كەلتىرۋدىڭ قۇجاتتارى جاسالىپ, قارجى ءبولىندى. وعان دەيىن وزەن سۋىن پايدالانۋ ارقىلى ەگىستىك سۋارىلىپ, بولاشاق مولشىلىققا بەرىك نەگىز قالاۋ جۇمىسى جالعاسۋدا.
كۇمىسجان بايجان, الماتى وبلىسى.