بيىل قىزىلجار وڭىرىنە دە قار ادەتتەگىدەن كوپ ءتۇستى. سولتۇستىكتىڭ التى اي بويى اق كورپەسىن ايقارا جامىلعان قىتىمىر قىسى مەن ساقىلداعان سارى ايازى جەردى ەكى مەترگە دەيىن سىرەستىرىپ قاتىرىپ تاستادى. سونىڭ سالدارىنان وبلىس ورتالىعىندا بىرقاتار سۋ كولونكالارى ىستەن شىقتى. كوكتەمنىڭ العاشقى ايىنان “تۇسكە دەيىن كيىز, تۇستەن كەيىن ءمۇيىز” اۋا رايى قۇبىلىپ تۇر. گيدرومەتەورولوگيا قىزمەتكەرلەرىنىڭ ايدىڭ اياعىنا قاراي 5-10 گرادۋس جىلىلىقتى كورسەتەدى دەگەن بولجامى كەلە قويعان جوق. قاسات قاردىڭ بىرتىندەپ ەرۋىن جاقسىلىققا جورىعان پەتروپاۆل قالاسى تۇرعىندارىنىڭ قاۋىپتەنەتىندەي تۇستارى دا جوق ەمەس. ويتكەنى, كۇن كۇرت جىلىسا, ەسىل وزەنىنە تاقاۋ ورنالاسقان زارەچنىي كەنتى مەن تەرى زاۋىتى شاعىن اۋدانىن سۋدىڭ شايىپ كەتۋى ابدەن ىقتيمال. توتەنشە جاعدايدىڭ الدىن الۋعا كۇنىبۇرىن قام جاسالماسا, ساي-سالانى قۋالاي اققان اعىن سۋدىڭ زاردابىن پەتروپاۆلدىقتار تالاي تارتقان. وسىنى ەسكەرگەن بولۋ كەرەك, سۋ تاسقىنىن بولدىرماۋ, كەزدەسە قالعان جاعدايدا جەدەل قارەكەتكە كىرىسۋ جايى وبلىستىق اكىمدىكتە, سەلەكتورلىق كەڭەستە بىرنەشە رەت قارالىپ, ءتيىستى باسشىلار مەن اۋدان اكىمدەرىنە ناقتى ءمىندەتتەر جۇكتەلدى. ونىڭ ۇستىنە الماتى وبلىسىنا قاراستى قىزىلاعاش اۋىلىنداعى توسىن اپات تا ۇلكەن ساباق بولعان ءتارىزدى.
توتەنشە جاعدايلار جونىندەگى وبلىستىق دەپارتامەنتتىڭ باستىعى الەيتجان ءساتتىباەۆتىڭ بەرگەن دەرەكتەرىنە قاراعاندا كەز كەلگەن وقىس وقيعانى جەدەل زالالسىزداندىرۋعا تەحنيكا دا, ادام كۇشى دە دايىن. ينەرتتى ماتەريالدار مەن جانار-جاعارماي قورى جەتكىلىكتى. كوپىرلەر مەن 12 cۋ قويماسى جان-جاقتى تەكسەرىلىپ, كەزەكشىلىك بەكەتتەرى ۇيىمداستىرىلعان. راديوبايلانىس قۇرالدارىمەن قامتاماسىز ەتىلگەن. قاۋىپتى ايماقتاردا تۇرعان اۋىلدار مەن تۇرعىنداردىڭ ءتىزىمى الىنىپ, تەز ارادا كوشىرۋ جولدارى ويلاستىرىلعان. قاجەتتى ازىق-ت ۇلىك قورلارى دا جاسالعان. اپاتتى جاعدايلاردى جويۋ شارالارى ءۇشىن 28,5 ميلليون تەڭگە قاراستىرىلعان.
باسقارمانىڭ وكىلدەرى كەيبىر ەلدى مەكەندەردى سۋ الىپ كەتۋ قاۋپى بارىن جاسىرمايدى. اسىرەسە, م.جۇماباەۆ, شال اقىن اۋداندارى بويىنشا ساقتىق شارالارى اسا قاجەت. بۇل ايماقتاردا بىرقاتار اۋىل-سەلولار قاۋىپتى جەرلەردە تۇر. ع.مۇسىرەپوۆ اۋدانىندا ورنالاسقان تايسارى, شارىق سۋ قويمالارى شيرەك عاسىردان بەرى جوندەۋ كورمەگەن. قار سۋى كوپ جينالسا, شىداس بەرۋى ەكىتالاي. ءۋاليحانوۆ اۋدانىنداعى سىلەتى سۋ قويماسىنىڭ ارناسىنان لىقسي توگىلگەن سۋ قۋلىكول, قايرات, كوبەنساي اۋىلدارىنىڭ تۇرعىندارىن جىلدا ۇلكەن ابىگەرگە ءتۇسىرىپ ءجۇر. سوندىقتان بۇل ماڭايعا قاجەتتى ماتەريالدار مەن تەحنيكالار شوعىرلاندىرىلىپ, جەرگىلىكتى بيۋدجەتتەن 2,76 ميلليون تەڭگە بولىنگەن.
قاۋىپتى جەرلەردى الدىن-الا بولجاي ءبىلىپ, تابيعات اپاتتارىن مۇمكىندىگىنشە بولدىرماۋ, الدىن الۋ, تەز ارادا جويۋ, تەحنيكا مەن ادام كۇشىن جۇمىلدىرۋ جۇمىستارىن ۇتىمدى ۇيىمداستىرۋ ۇلكەن سىن بولعالى تۇر.
ءومىر ەسقالي, سولتۇستىك قازاقستان وبلىسى.