بارلىعىمىز كوپتەن كۇتكەن كوكتەم بيىل بەسىنشى مارتە العىس ايتۋ كۇنىمەن باستالىپ وتىر. بۇل – كەڭ-بايتاق قازاقستاندى مەكەن ەتكەن بارلىق ەتنوستىڭ وسىناۋ ۇلى ولكەگە شىنايى رياسىز سەزىممەن العىس بىلدىرەتىن, تاۋبە ەتىپ, تاعزىم ەتەتىن كۇنى.
مەن – ءومىرىن ۇستازدىققا ارناپ, جان شۋاعىن وسى جولدان تاپقان باقىتتى اداممىن. 40 جىل ۇستازدىق ەتتىم. شاكىرتتەرىمە, بالالارىم مەن نەمەرەلەرىمە قازاق دالاسىنىڭ قيلى تاريحى مەن باي مادەنيەتى, سالت-ءداستۇرى تۋرالى ۇنەمى ايتىپ وتىرامىن. ءبىزدىڭ اتالارىمىز قازاقستانعا ءحىح عاسىردىڭ 80-جىلدارى كەلىپتى. سودان بەرى, مىنە, اۋلەتىمىزدىڭ بەسىنشى ۇرپاعى جالعاسىپ, وسى كيەلى توپىراقتا تەر توگىپ, ەڭبەك ەتىپ, باياندى عۇمىر كەشىپ كەلەمىز. ءوز باسىم جۋسان ءيىسى اڭقىعان بوز دالانىڭ ءبىر شەتىندەگى بۇيىعى تىرشىلىك كەشكەن شاعىن عانا اۋىلدا بوي جەتتىم. كەيىن جوعارى ءبىلىم الىپ, ەڭبەككە ارالاستىم. تۇرمىس قۇرىپ, انا اتانىپ, ايەل باقىتىن سەزىندىم. ەنەم مارقۇم ءۇش مارتە «قۇرمەت بەلگىسى» وردەنىن العان ەڭبەكقور ادام ەدى. اتامنىڭ قازاق دوستارى كوپ بولاتىن. سودان بولار ول كىسى قازاق تىلىنە دە جەتىك بولدى. «اناۋ قازاق كورشىم بولماعاندا, مەن باياعىدا ءولىپ قالاتىن ەدىم. كورشىم قۇتقارىپ قالدى. ول بولماعاندا, بۇل كۇندى كورەر مە ەدىم, كورمەس پە ەدىم» دەپ وتىراتىن ەدى جارىقتىق.
بۇگىنگى شۋاقتى مەرەكەدە مەن قازاق حالقىنا ءوز العىسىمدى بىلدىرگىم كەلەدى. تاۋەلسىزدىك العان 30 جىلعا جۋىق ۋاقىت ىشىندە ءتىلى ءھام ءتۇرى باسقا بولسا دا, تىلەگى ءبىر ارناعا توعىسقان جۇزدەن استام ەتنوس وكىلى كيەلى كوك بايراقتىڭ استىندا تاتۋ-ءتاتتى بەيبىت ءومىر ءسۇرىپ كەلەدى. بۇل, ەڭ الدىمەن, وسى ەلدى ەجەلدەن مەكەن ەتىپ كەلە جاتقان قازاق حالقىنىڭ پاراساتى مەن دارحاندىعىنىڭ ارقاسىندا ورناعان يگىلىك دەپ ويلايمىن.
العىس ايتۋ كۇنى – ەلباسىمىز نۇرسۇلتان نازارباەۆ نەگىزىن قالاعان تاتۋلىق پەن تۇراقتىلىقتىڭ مەرەكەسى, بىرلىك پەن بەرەكەنىڭ بەلگىسى. تۇڭعىش پرەزيدەنتىمىز بۇل مەرەكەنىڭ ءمان-ماڭىزى تۋرالى «وسىناۋ ايتۋلى كۇنى قيىن-قىستاۋ جىلدارى ادامگەرشىلىك پەن يماندىلىق ۇستەمدىگىنىڭ جادىمىزدا بولۋى قازاقستان حالقىن بىرىكتىرەدى. مەيىرىمدىلىك, ءوزارا كومەك جانە ءبىر-بىرىنە دەگەن قۇرمەت قازاقتىڭ كيەلى توپىراعىندا كۇللى قازاقستاندىقتاردى كوزدىڭ قاراشىعىنداي ساقتايتىن ءارى ماقتان تۇتاتىن دوستىق پەن ءوزارا تۇسىنۋشىلىك بىرەگەي اتموسفەراسىن قالىپتاستىرۋعا مۇمكىندىك بەرەدى. ءوز وتانداستارىمىزعا جانە تۋعان ولكەگە دەگەن كىرشىكسىز العىس سەزىمى بۇل مەرەكەگە ەرەكشە تەرەڭ ماعىنا بەرەدى. سوندىقتان العىس ايتۋ كۇنىنىڭ باستى ءمانى – تاريحي جادىنى ساقتاۋ, ۇرپاق ساباقتاستىعى مەن ىرگەسى بەرىك نەگىزدەگى ەل بىرلىگىن نىعايتۋ», دەپ ەدى. ءبىز وسىنى ۇمىتپاۋىمىز كەرەك. ويتكەنى قازاقستاندا تۇراتىن حالىقتى ىرىس-ىنتىماققا ۇندەيتىن بۇل مەرەكە ەلىمىزگە اسا قاجەت. سەبەبى قازاق جەرىنە سۇراپىل سوعىستىڭ الدىندا دا, ودان كەيىن دە قونىس اۋدارعاندار كوپ. قازاقتار ولاردىڭ ەشقايسىسىنىڭ كەۋدەسىنەن يتەرگەن جوق. قيىن كەزەڭدە كيىم بەرىپ, باۋىرىنا تارتىپ, ادال ءدامىن, دوستىق جۇرەگىن ۇسىنعان حالىققا ءبىر كۇن عانا ەمەس, اي سايىن, ءتىپتى, اپتا سالىپ العىس ايتساق تا ارتىق ەمەس.
بۇگىن جۇزدەن استام ەتنوستىڭ التىن بەسىگىنە اينالعان قازاقستان اتتى ۇلى وتانعا تاعزىم ەتىپ, تىزە بۇگىپ كوك تۋدى سۇيەتىن كۇنى. اقىن مۇقاعالي ماقاتاەۆتىڭ «جاقسى اتتاندى دەمەسسىڭ, سۇيەم دەسەم, تابىناتىن ءتاڭىرىم, يەم دە سەن!» دەيتىن ولەڭ جولدارى بار. مەنى جاقسى اتتاندى دەپ ويلاماڭىزدار! مەن قازاقستانىمدى, ونىڭ حالقىن, تاۋى مەن تاسىن, وزەن-سۋىن بايتاق دالاسىن, ساف اۋاسىن شىنايى سۇيگەن اداممىن! جۇرەگىمدى تولقىتىپ تۇراتىن وسى ءبىر ۇلى سۇيىسپەنشىلىك ءۇشىن بارشاڭىزعا العىس ايتامىن!
الەكساندرا سۋسلوۆا,
وبلىستىق قوعامدىق كەلىسىم كەڭەسىنىڭ مۇشەسى
قوستاناي وبلىسى