بۇگىن نۇر-سۇلتان قالاسى, نازارباەۆ ۋنيۆەرسيتەتتە Qazaq kuresi اسسوتسياتسياسىنىڭ كونگرەسى ءوتتى. حالىقارالىق Qazaq kuresi فەدەراتسياسى, دۇنيەجۇزىلىك قازاق كۇرەسى فەدەراتسياسى جانە رەسپۋبليكالىق قازاق كۇرەسى فەدەراتسياسىنىڭ بىرلەسكەن كونگرەسىندە سالا ماماندارىنىڭ قولداۋىمەن Qazaq kuresi اسسوتسياتسياسى قۇرىلدى. قاۋىمداستىقتىڭ پرەزيدەنتى قىزمەتىنە كارىم قاجىمحان ۇلى ءماسىموۆ سايلاندى.
- وسىندا جينالعان بارشامىزدىڭ نەگىزگى ماقساتىمىز قازاق كۇرەسىن وليمپيادا ويىندارىنىڭ قاتارىنا كىرگىزۋ. سول سەبەپتى دە بۇگىن كوز الدارىڭىزدا قازاق كۇرەسى اسسوتسياتسياسى قۇرىلدى. اسسوتسياتسيا ءوز كەزەگىندە حالىقارالىق ۇيىمدارمەن تىعىز بايلانىس جاساي وتىرىپ, قازاق كۇرەسىن وليمپيادا باعدارلاماسىنا ەنگىزۋ جولىندا جۇمىس جاسايدى, - دەدى.
سونداي-اق كارىم قاجىمحان ۇلى وسى ۋاقىتقا دەيىن قازاق كۇرەسى سالاسىندا جۇمىس جاساپ كەلگەن ۇيىمداردىڭ ءبىر قاۋىمداستىق اياسىندا بىرىگۋىن ۇلكەن جەتىستىككە بالادى.
كونگرەستە مادەنيەت جانە سپورت ۆيتسە-ءمينيسترى ە.رامازانوۆ, حالىقارالىق Qazaq kuresi فەدەراتسياسىنىڭ پرەزيدەنتى ق.بوزىمباەۆ, دۇنيەجۇزىلىك قازاق كۇرەسى فەدەرەتسياسىنىڭ پرەزيدەنتى ا.شپەكباەۆ, ءۇش دۇركىن «قازاقستان بارىسى» ب.ىستىباەۆ, ەكى دۇركىن «الەم بارىسى» ا.نۇعىماروۆ ءسوز سويلەدى.
قازاق كۇرەسىن الەمدىك ارەنادا دامىتۋ ماقساتىندا اتالعان اسسوتسياتسيا مادەنيەت جانە سپورت مينيسترلىگىمەن, سىرتقى ىستەر مينيسترلىگىمەن, ۇلتتىق وليمپيادا كوميتەتىمەن ىنتىماقتاستىق تۋرالى مەموراندۋمعا قول قويدى.