قىزىلاعاشتىقتاردىڭ تاسقىننان كەيىنگى باسىنان وتكەرگەنى جايلى قاۋەسەت, الىپ-قاشپا اڭگىمە تولاستار ەمەس. العاشقى كۇننەن تۇرعىنداردىڭ باسىنا تۇسكەن اۋىرتپالىقتى كوزبەن كورىپ, بۇگىنگى قولعا الىنعان جۇمىستاردى وي ەلەگىنەن ءوتكىزسەك, سابىرعا كەلىپ, كوپشىلىكتىڭ نيەت-پەيىلىنە ريزا بولاسىڭ. مەملەكەت باسشىسىنىڭ تاپسىرماسىمەن تياناعى كەلتىرىلگەن جۇمىستار بىردەن كوزگە تۇسەدى. كەشە اتالعان ەلدى مەكەندەگى العاش قازىعى قاعىلعان ءۇيدىڭ شاتىرى كوتەرىلگەنىنە كۋا بولدىق. ءۇيدى “الماتى قۇرىلىس” ۇيىمى سالسا, مۇنداعى ەڭبەك قاۋىرت قيمىلعا ۇلاسقان.
بۇگىنگى كۇنى جۇرتتىڭ باسىنان كەشىرگەن قيىندىعىنان گورى ەلدى مەكەننىڭ ەرتەڭى, الداعى ءومىرلەرىنىڭ قالاي قالىپتاساتىنى ويلاندىرادى. ول قۇرىلىس جۇمىستارىنىڭ ساپالى ءارى مەرزىمىندە جۇرگىزىلۋى مەن پايدالانۋعا بەرىلۋىنە تىكەلەي بايلانىستى. كۇن سايىن جەدەل جيىندى اۋىلدى تازالاۋ مەن قۇرىلىس جۇمىستارىنىڭ بارىسىمەن تانىسۋدان باستايتىن وبلىس اكىمى سەرىك ۇمبەتوۆ وسى ماسەلەلەردىڭ تيياناعىن كەلتىرۋگە كۇش-مۇمكىندىكتى جۇمىلدىرۋدى تاپسىرىپ كەلەدى. جۇمىس ءبىرشاما جۇيەلەنگەن. “الماتى قۇرىلىس”, “اۋىل قۇرىلىسى” كومپانيالارى بەكىتىلگەن تۇرعىن ۇيلەردىڭ قابىرعالارىن كوتەرسە, جۇمىستىڭ جەدەل جالعاسۋى ءۇشىن بەتون زاۋىتى مەردىگەرلەردىڭ تاپسىرىسىنا سايكەس ەكى ماۋسىمدا ىستەپ, ءار كوشەدەن ۇيلەردىڭ سۇلبالارى كورىنىپ قالدى.
حالىقتىڭ قيىندىقتى ۇمىتۋى ءۇشىن باسپانانى تەز سالىپ, قونىستاندىرۋ. ول ءۇشىن قالتالى ازاماتتاردىڭ كومەگى قاجەت. دۇيسەنبى كۇنى قىزىلاعاشقا ارنايى كەلگەن “بن-ينۆەست” كومپانياسىنىڭ باسشىسى بولات نازارباەۆ اۋىلدىڭ باتىسىنداعى جاڭا كوشەگە ءوز قارجىسىنا 10 ءۇي سالىپ بەرەتىنىن جەتكىزىپ, كوپشىلىكتى تاعى ءبىر قۋانتتى.
– قىزىلاعاشتاعى جاعدايدى ەستىگەندەر كومەكتەرىن اياماۋدا. بۇل ورىندى. حالقىمىز “جاقسىلىق پەن جاماندىق ەگىز” دەگەن. تۇرعىنداردىڭ باسىنداعى اۋىرتپالىقتى كوتەرۋ ماقساتىندا وسى كوشەدەن 10 ءۇيدىڭ قۇرىلىسىن باستاپ, 2,5-3 اي مەرزىمدە پايدالانۋعا بەرەمىز, دەدى بولات ءابىش ۇلى جۋرناليستەرگە بەرگەن سۇحباتىندا. وتباسىلارى ەكىگە ءبولىنىپ, بالالارى قالادا, ازاماتتارى قۇرىلىس جۇمىستارىنا تارتىلعاندارعا بۇل ۇلكەن دەمەۋ دەۋگە بولادى.
ۇكىمەت تاراپىنان دا زارداپ شەككەندەرگە قاجەتتى جان-جاقتى كومەك جاسالۋدا. جالپى ەل بولىپ, حالىقتىڭ قايعىسىن جەڭىلدەتۋگە جۇمىلعان. مەردىگەرلىك ۇيىمدار قارجى تابۋدى عانا ويلاپ, قۇرىلىستىڭ ساپاسىنا ءمان بەرمەگەندەرىنە ەش كەشىرىم بولمايتىنىن وبلىس اكىمى جيىندا شەگەلەپ ايتىپ, ەسكەرتىپ كەلەدى. بەلگىلەنگەن مەرزىمدە قۇرىلىستى سالۋعا قابىلەتسىزدەردىڭ ورنىن مىقتىلارى باساتىنى دا ءتۇسىندىرىلۋدە.
“الماتى قۇرىلىس” اۋىلداعى 32 تۇرعىن ءۇيدى سالۋدى مىندەتتەنسە, مۇنداعى قاجەتتى تەحنيكا مەن كاسىبي ماماندار, ساۋلەتشىلەر قيمىلى شيراق ەكەنى اڭعارىلادى. بۇگىندە قۇرىلىس جۇمىستارىنا 2000 ادام, 289 تەحنيكا تارتىلعانى وسىنىڭ دالەلى. جۇمىستان اۋىل تۇرعىندارى دا شەت قالماي, 250 ادام ەڭبەككە تارتىلىپتى. بەلگىلەنگەن مەرزىمدە ءبۇتىن ءبىر اۋىلدى قايتا تۇرعىزۋ ءۇشىن قۇرىلىسشىلار قاتارىن كوبەيتۋ قاجەتتىگى ورتاعا سالىنسا, قۇرىلىس ماتەريالدارى تولاسسىز تاسىمالدانىپ, جول بويىنداعى اۋىر جۇك كولىكتەرى ءارى اعىلۋدا.
تۇرعىنداردىڭ تاسقىننان امان قالعان ۇيلەرىن بۇزباي, كۇردەلى جوندەۋدەن وتكىزۋ جايلى وتىنىشتەرى دە شەشىمىن تاپقان. وسىلايشا باستاپقىدا 467 ءۇي قايتا سالىنادى دەپ شەشىلسە, بۇگىنگى كۇنى 17 ءۇي زىلزالاعا قارسى كۇشەيتىلىپ, تولىق جوندەۋدەن وتكىزىلەدى دەپ شەشىلدى. وبلىس باسشىسى مەكتەپ ءۇيى مەن بالاباقشانى قالپىنا كەلتىرۋگە جۇمسالاتىن قارجىنىڭ قىمباتتىعىن دا سىنعا الدى. باس پايداسىنان گورى, باردىڭ باعاسىن ءبىلىپ, حالىقتىڭ جاعدايىن جاساۋ قاجەتتىگىن جەتكىزدى.
اۋىلدىڭ شىعىسىنان ورىن الاتىن ساياباقتاعى ەسكەرتكىش جوباسىن جاساۋ, جول مەن كوشەنى قالپىنا كەلتىرۋگە قاتىستى جۇمىستاردى جۇيەلەۋ ءماسەلەلەرىنە دە نازار اۋدارىلدى.
سۋ تاسقىنىنان زارداپ شەككەندەرگە جاردەماقى اۋدارۋ جۇمىسى جالعاسىپ, “قازپوشتا” اكتسيونەرلىك قوعامى ارقىلى بۇعان دەيىن 2625 ەسەپ-شوت اشىلسا, وعان 21 ملن. 443 مىڭ تەڭگە اۋدارىلىپتى. سوڭعى مالىمەت بويىنشا قىزىلاعاشاعى تاسقىننان بولعان جاعدايدى قالپىنا كەلتىرۋ قورىنا 2 ملرد. 466 ملن. تەڭگە قارجىلاي كومەك تۇسكەن. ەلىمىزدىڭ تۇپكىر-ءتۇپكىرىنەن كەلىپ جاتقان قايىرىمدىلىق شارالارى ءالى دە جالعاسۋدا. قارقىن العان قۇرىلىس جۇمىستارىنىڭ ءدالەلىندەي كوشەدەگى ۇيلەردىڭ قابىرعالارى بيىكتەپ, شاڭىراعى كوتەرىلۋدە.
كۇمىسجان بايجان, الماتى وبلىسى.