بۇگىن ەلوردالىق «بارىس» قۇرلىقتىق حوككەي ليگاسىندا رەسەيدىڭ تسسكا كومانداسىمەن كەزدەستى.
وسىعان دەيىنگى ويىنداردا رەسەيلىك ارمياشىلار جالپى تۋرنير كەستەسىندە جەكە-دارا كوش باستاپ كەلەدى. ولاردىڭ ەنشىسىندە 56 ويىننان كەيىن 86 ۇپاي بار. ال جەتىنشى ورىنداعى «بارىس» 75 ۇپايدى قانجىعاسىنا بايلاعان بولاتىن.
كوماندانىڭ قارسىلاستارى ادۋىندى كۇش سىناسۋعا دايىندالىپ كەلگەندەي. وسىعان قاراماستان, «بارىس» قارسىلاسىنان قايمىققان جوق. ويىننىڭ العاشقى ساتتەرىنەن باستاپ لايىقتى ويىن كورسەتتى. رەسەيلىك كوماندانىڭ قاقپاسىنا ءجيى شابۋىلداپ, قارسىلاستاردان باسىم تۇسە باستادى.
ەسەپتى ارمياشىلار اشتى. ويىننىڭ 12-مينۋتىندا رەسەيلىك حوككەيشى سەرگەي تولچينسكي كوماندانىڭ قورجىنىنا ۇپاي قوستى. 18-مينۋتتا «بارىس» ساپىنان كوربان نايت ەسەپتى تەڭەستىردى.
ەكىنشى كەزەڭدە قازاقستاندىق كوماندانىڭ باسىمدىعى بايقالىپ تۇردى. گول سوعاتىن ساتتەردە حوككەيشىلەرىمىزدىڭ ءمۇلت كەتكەن جەرلەرى دە بولدى. ال 35-مينۋتتا لينۋس ۆيددەل «بارىس» كومانداسىن العا شىعاردى.
ويىننىڭ ءۇشىنشى كەزەڭىندە تسسكا حوككەيشىلەرى ويىن تىزگىنىن ءوز قولىنا الۋعا تىرىستى. ناتيجەسىندە 48-مينۋتتا كلاس دالبەك «بارىس» قاقپاسىنا گول سالدى. ال 53-مينۋتتا ەلوردالىق داررەن ديتس وزىنە بەرىلگەن مۇمكىندىگىن جىبەرمەي, ەسەپتى العا شىعاردى. «بارىس» تسسكا كومانداسىنان 3:2 ەسەبىمەن باسىم ءتۇستى. ەلوردالىق كلۋب بەس ويىن قاتارىنان جەڭىسكە جەتىپ كەلەدى. وسى جەڭىستەن كەيىن قازاقستاندىق كوماندا جالپى تۋرنير كەستەسىندە التىنشى ورىنعا كوتەرىلدى.
الداعى اپتادا «بارىس» ەلوردادا ءۇش كەزدەسۋ وتكىزەدى دەپ جوسپارلانۋدا. 15 اقپاندا – رەسەيدىڭ «سوچي», 18 اقپاندا – «سيبير» ء(نوۆوسىبىر) جانە 21 اقپاندا – «سالاۆات يۋلاەۆ» (ۋفا) كلۋبتارىمەن كەزدەسەدى.