«البەتتە مۇنداي وقيعا كەزىندەگى باستى قۇرال – رەسمي تۇسىندىرمە بەرۋ. اقپاراتتى بارىنشا شۇعىل بەرۋ كەرەك. بىراق مۇندايدا كەلەسى پروبلەمامەن بەتپە-بەت كەلەمىز: ۋاتساپپەن تارايتىن ارانداتاتۋشى, داۋىسپەن تارايتىن حابارلاما بۇكىل چاتتارعا 20 مينۋتتىڭ ىشىندە تاراپ كەتۋى مۇمكىن. ال بۇل حابارلامانى راستاۋ نەمەسە جوققا شىعارۋ ءۇشىن ودان ۇزاق ۋاقىت كەرەك. اتاپ ايتقاندا ول ءۇشىن وقيعا ورنىنا شىعىپ, اقپاراتتىڭ شىن-وتىرىگىن تەكسەرىپ, سەبەپتەرىن انىقتاۋ كەرەك. البەتتە, بۇل ۋاقىتتا قاجەت ەتەدى», - دەدى داۋرەن اباەۆ.
بۇل قازاقستاندا عانا ەمەس, الەم ەلدەرى ءۇشىن دە وزەكتى تاقىرىپ بولىپ وتىر.
«ونىڭ تىڭ مىسالىن كوروناۆيرۋسقا قاتىستى جالعان اقپاراتتان-اق كورۋگە بولادى. دۇنيەجۇزىلىك دەنساۋلىق ساقتاۋ ۇيىمى جالعان اقپاراتتارعا قارسى تۇرۋ ءۇشىن «Google» كومپانياسىنا جۇگىنۋىنە تۋرا كەلدى. سول سەبەپتى مۇنداي پروۆاكاتسيالىق جايلارمەن كۇرەسۋدىڭ ەڭ ءتيىمدى ءارى ۇزاق مەرزىمدى مەحانيزمى – اقپاراتتى تۇتىنۋ مادەنيەتى. ءبىز سول ءۇشىن ءاردايىم اقپاراتتىق گيگيەنا ماسەلەسىن ءجيى كوتەرەمىز. تۋىسى نەمەسە كورشىسى ءبىر جىبەرگەن اقپاراتقا سەنىپ قالماي, وقيعانىڭ رەسمي تۇسىندىرمەسىن كۇتكەن ادام عانا اقپاراتتىق گيگيەنانى ساقتاي الادى», - دەيدى مينيستر.
ونىڭ ايتۋىنشا, حالىق كەز كەلگەن جاڭالىقتى سەنىمدى اقپارات كوزىنەن باقىلاپ وتىرۋعا ءتيىس. سوندىقتان مەديالىق ساۋاتتىلىقتى ارتتىرۋ بويىنشا اقپارات جانە قوعامدىق دامۋ مينيسترلىگى ءبىلىم جانە عىلىم مينيسترلىگىنە مەكتەپ قابىرعاسىنان باستاپ جۇزەگە اسىرۋعا بولاتىن قانات قاقتى جوبا ۇسىنباق.