تۇركيانىڭ استاناسى – انكارا قالاسىندا قازاقستاننىڭ تۇركياداعى ەلشىلىگى, قر مادەنيەت جانە سپورت مينيسترلىگى, تۇركيا مادەنيەت مينيسترلىگى, ترت اۆاز تەلەارناسى قولداۋى جانە تۇركسوي ۇيىمىنىڭ ۇيىمداستىرۋىمەن اباي قۇنانباي ۇلىنىڭ 175 جىلدىق مەرەيتويىنىڭ تۇركياداعى اشىلۋ سالتاناتى ءوتتى. بۇل تۋرالى قازاقستاننىڭ تۇركياداعى ەلشىلىگىنىڭ ءباسپاسوز قىزمەتى حابارلادى.
القالى جيىنعا قازاقستاننىڭ تۇركياداعى ەلشىسى ابزال ساپاربەك ۇلى, قر مادەنيەت جانە سپورت ۆيتسە-ءمينيسترى ەلدوس رامازانوۆ, تۇركسوي باس حاتشىسى دۇيسەن قاسەيىنوۆ, ترت اۆاز تەلەارناسى ديرەكتورى سەدات ساعىركايا, كەچيورەن مۋنيتسيپاليتەتى باسشىسى تۋرگۋت التىنوك, قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ وكىلەتتى كەڭەس توراعاسى مۇسا يىلدىز, تۇركى كەڭەسىنە مۇشە مەملەكەتتەر ەلشىلەرى, شەتەلدىك ديپلوماتتار, زيالى قاۋىم وكىلدەرى مەن قازاقستاندىق ستۋدەنتتەر قاتىستى.
سالتاناتتى شارانىڭ بەتاشار ءسوزىن سويلەگەن تۇركسوي باس حاتشىسى د.قاسەيىنوۆ ەلباسى نۇرسۇلتان نازارباەۆتىڭ «ابايدى تانۋ - قازاقستاندى, قازاق حالقىن تانۋ» دەگەن قاناتتى سوزىنە نازار اۋدارا وتىرىپ, 2019 جىلعى تۇركى الەمىنىڭ مادەني استاناسى بولعان وش قالاسىنداعى تۇركىتىلدەس مەملەكەتتەر مادەنيەت مينيسترلەرى جيىنىندا 2020 جىلدىڭ اباي جىلى بولىپ جاريالانعاندىعىن ەسكە سالدى.
ەۋرازيا جازۋشىلار وداعىنىڭ توراعاسى ياكۋب ومەروعلۋ زاماناۋي قازاق ادەبيەتىنىڭ نەگىزىن سالعان اباي قۇنانباي ۇلى تۇركىتىلدەس حالىقتاردىڭ رۋحاني قازىناسىنا ولشەۋسىز ۇلەس قوسقان عۇلاما عانا ەمەس, سونىمەن قاتار قازاق حالقىنىڭ ەل بولۋىنا ۇلان-عايىر ەڭبەك ەتكەن داناگەر ەكەندىگىن باسا ايتتى.
كەشتىڭ اشىلۋ سالتاناتىندا حاكىم, ۇلى ويشىل ابايدىڭ 175 جىلدىق مەرەيتويىن تۇركيانىڭ تورىندە بىرگە اتاپ ءوتۋ ۇلكەن مارتەبە ەكەنىن تىلگە ەتكەن ۆيتسە-مينيستر ە.رامازانوۆ, اباي اتامىزدىڭ «ادام ءومىرىنىڭ ماقساتى – كەمەلدەنۋ مەن جەتىلۋ» دەگەن سوزدەرىنە توقتالا وتىرىپ, بىرلەسە تاريحىمىزدى, مادەنيەتىمىزدى ساقتاۋ, دامىتۋ جانە ناسيحاتتاۋدىڭ ماڭىزىنا باسا نازار اۋداردى.
يگى باسقوسۋ بارىسىندا ءسوز العان ەلشى ا.ساپاربەك ۇلى «رۋحانياتىمىزدىڭ تەمىرقازىعى, ۇلتتىق بولمىسىمىزدىڭ ايناسى سانالاتىن ۇلى ويشىل مۇراسىنىڭ باۋىرلاس تۇركيادا ەرەكشە دارىپتەلىپ جاتقانى – ءبىز ءۇشىن ۇلكەن قۋانىش» - دەي وتىرىپ, ەلىمىزدىڭ ساياسي جانە ەكونوميكالىق دامۋمەن تەڭ رۋحانياتتىڭ دامۋىنا دا ۇلكەن ماڭىز بەرەتىنىنە توقتالدى. ۇلى اقىن, ۇلت پوەزياسىنىڭ كەمەڭگەرى اباي قازاق تاريحىندا وشپەس ءىز قالدىرعانىن تىلگە تيەك ەتكەن ەلشى ا.ساپاربەك ۇلى مەملەكەت باسشىسى قاسىم-جومارت توقاەۆتىڭ «اباي جانە ءححى عاسىرداعى قازاقستان» اتتى ماقالاسىنداعى «قازىر ايتىپ جۇرگەن ينتەللەكتۋالدى ۇلت قالىپتاستىرۋ يدەياسى ابايدان باستاۋ الدى دەۋگە بولادى. ۇلى ويشىل ءار سوزىمەن ۇلتتىڭ ورەسىن ءوسىرۋدى كوزدەدى» دەگەن سوزدەرىنە توقتالا وتىرىپ, ۇلى عۇلامانىڭ ونەگەلى مۇراسىن زەردەلەۋدىڭ ماڭىزىنا توقتالدى.
القالى كەشتىڭ جالعاسىندا تۇركيا پرەزيدەنتتىك سيمفونيا وركەسترى سۇيمەلدەۋىمەن قازاقستانننان زارينا التىنباەۆا, تالعات مۇساباەۆ, قىرعىزستاننان تەلەك نايمانباەۆ, شاحيماردان ابيلوۆ, كلارا تۋلەنباەۆا, مولدوۆادان يگور پودگورەانۋ, وزبەكستاننان فەرۋزا يۋسۋپوۆا, تۇركيادان لەۆەنت گۇندۇز, سەركان كودجادەرە جانە ازەربايجاننان ەلەونورا مۋستافاەۆا, يلحام نازاروۆ اباي اتامىزدىڭ مۋزىكالىق مۇراسىن ورىندادى. وسىلايشا تالانتتى ونەرپازدار ۇلى اقىننىڭ «ايتتىم سالەم, قالامقاس», «جەلسىز تۇندە جارىق اي», «كوزىمنىڭ قاراسى» جانە ت.ب. شىعارمالارىمەن جينالعان قاۋىمدى ءتانتى ەتتى.
سونداي-اق ءتۇبى ءبىر تۇركى جۇرتىنىڭ ورتاق «ترت اۆاز» تەلەارناسى سالتاناتتى كونتسەرتتى بەينەگە ءتۇسىرىپ, 350 ميلليوندىق كورەرمەنگە تاماشالاۋ مۇمكىندىگىن بەردى.