ەلوردا اكىمى التاي كولگىنوۆ سۋ تاسقىنىنا قارسى ءىس-شارالاردىڭ كەشەندى جوسپارىن بەكىتتى. شتاب قۇرىلدى: ارىق-لوتوكتىق جەلىلەر مەن نوسەرلىك-كاناليزاتسيالىق جۇيەلەردى تازالاۋ جۇمىستارى باستالدى. قالا كوشەلەرىن ەرىگەن سۋدان تازالاۋ جۇمىستارى جۇرگىزىلىپ جاتىر. شتاب توراعاسى بولىپ قالا اكىمىنىڭ ورىنباسارى ەرمەك قيزاتوۆ تاعايىندالدى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.
شتابتىڭ مىندەتى كۇتىلەتىن سۋ تاسقىنى دەڭگەيىن انىقتاۋ جانە سۋ تاسقىنىن بولدىرماۋ بويىنشا شارالار قابىلداۋ. سونىمەن قاتار وزەن ارنالارىن, نوسەرلى كارىزدەردى باقىلاپ, ءتيىستى تۇردە ۇستاۋ. «سۋ تاسقىنى قاۋپىن ازايتۋ ماقساتىندا قوسىمشا كومەك رەتىندە قالانىڭ كوممۋنالدىق قىزمەتتەرى كۇشەيتىلگەن رەجيمدە جۇمىس ىستەيدى. الەۋمەتتىك نىساندار مەن جەكە سەكتوردى قاردان تازارتۋعا ەرەكشە كوڭىل بولىنەدى. دامبالار مەن قۇرىلىستاردىڭ جۇمىسىن باقىلاۋدا ۇستاۋ قاجەت. قىسقى كەزەڭدەگى جاۋىن-شاشىننىڭ مولشەرى رەكوردتىق, 3 بوران بولدى. الدا ۇلكەن جۇمىستار كۇتىپ تۇر. اقپان مەن ناۋرىز ايلارىندا قالانىڭ كوممۋنالدىق قىزمەتتەرى كۇندىز-ءتۇنى جۇمىس اتقارادى», دەدى قالا اكىمى التاي كولگىنوۆ.
«قازگيدرومەت» رمك گيدرومەتورتالىعىنىڭ ديرەكتورى مارينا ءشميدتتىڭ ايتۋىنشا, 9 اقپاندا جاۋىن – شاشىننىڭ ايلىق نورماسى ءتۇستى ء(بىر ايداعى نورماسى 15 مم بولسا, اقپاندا 13 مم بولدى). اقپان ايىنىڭ ءبىرىنشى ون كۇنى 20 مم جاۋىن-شاشىن ءتۇستى. اقپان ايىندا دا جاۋىن-شاشىن بولادى, 9 اقپاندا قاردان سوڭ جاڭبىر جاۋدى.
قىسقى كەزەڭدە 3,5 ملن تەكشە مەترگە جۋىق قار شىعارىلدى (280 مىڭ رەيس), بۇل وتكەن قىستىڭ وسىنداي كەزەڭىنە قاراعاندا 50% - عا ارتىق. كامازدار كۇنىنە 2,5 مىڭ رەيس جاسايدى. كۇن سايىن قالانى قاردان 2 مىڭ بىرلىك تەحنيكا مەن 1,5 مىڭنان استام جول جۇمىسشىلارى تازالايدى. بوران جانە قالىڭ قار جاۋعان كەزدە قوسىمشا ارنايى تەحنيكا قالانى قاردان تازالاۋعا شىعادى.
قىس مەزگىلىنىڭ باسىنان باستاپ قاردى ۋاقىتىلى تازالاماعانى ءۇشىن 100-دەن استام قىزمەت كورسەتەتىن ۇيىمدار (پيك, دك, جشس) 4 ملن 300 مىڭ تەڭگە سوماسىنا, سونداي-اق 260 ەلوردالىق شاعىن جانە ورتا بيزنەس وبەكتىلەرى اكىمشىلىك جاۋاپكەرشىلىككە تارتىلدى. جۇمىستى دۇرىس اتقارماعانى ءۇشىن اكىمدىك 10 مەردىگەر ۇيىممەن جۇمىس جاساۋدى توقتاتتى.