15 اقپاننان باستاپ قالاداعى كولىك قۇرالدارىنىڭ قوزعالىسىن وڭتايلاندىرۋ ماقساتىندا رامازان جانە اۋباكىر ىسمايىلوۆ كوشەلەرىندە ءبىر جاقتى قوزعالىستى ەنگىزۋ جوسپارلانعان. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.
ەلوردا اكىمدىگىنە تۇرعىندار تاراپىنان اتالمىش كوشەلەردەگى قيىن قوزعالىس تۋرالى كوپتەگەن وتىنىشتەر كەلىپ ءتۇستى.
ناتيجەسىندە, پوليتسيا دەپارتامەنتى اكىمشىلىك پوليتسيا باسقارماسىمەن بىرگە جولدىڭ تەحنيكالىق جاعدايىنا شولۋ جاساپ, ءبىر باعىتتى قوزعالىس ەنگىزۋ تۋرالى شەشىمدى قابىلدادى.
كولىك قوزعالىسىن ساعات تىلىمەن ۇيىمداستىرۋ جوسپارلانعان, اتاپ ايتقاندا ءبىر جاقتى قوزعالىس رامازان كوشەسىنىڭ بويىمەن شىعىس باعىتتا جانە اۋباكىر ىسمايىلوۆ كوشەسىمەن باتىس باعىتقا قاراي ۇيىمداستىرىلادى. ەنگىزىلەتىن وزگەرىستەرگە بايلانىستى قۇزىرەتتى ورگاندار جۇرگىزۋشىلەردەن جول ەرەجەسىن ساقتاپ, ساپاردى الدىن الا جوسپارلاۋدى سۇرايدى.