قوردايدا ورىن العان وقيعا ەل ازاماتتارىنىڭ جانىنا باتتى.
قايعىلى جاعداي ورىن الدى, تۇرعىندار قۇربان بولدى.
قازاقستان حالقى اسسامبلەياسى قازا تاپقانداردىڭ تۋعان-تۋىستارىنا قايعىرىپ كوڭىل ايتادى, جارالانعانداردىڭ تەزىرەك ساۋىعىپ كەتۋىن تىلەيدى.
مەملەكەت باسشىسى كيكىلجىڭ سالدارىن جويۋعا قاتاڭ تاپسىرمالار بەردى.
ءبىز قازاقستان حالقىنان وسى كەلەڭسىزدىكتىڭ تەز ارادا شەشىلۋىنە بارىنشا قولداۋ ءبىلدىرىپ, كومەك كورسەتۋىن سۇرايمىز.
اتالعان تاپسىرمالارعا سايكەس اسسامبلەيا ەلىمىزدىڭ بارلىق وڭىرلەرىندە ءتۇسىندىرۋ جۇمىستارىن جۇرگىزىپ, ەتنومادەني بىرلەستىكتەرمەن كەزدەسۋلەر ۇيىمداستىردى.
اسسامبلەيا مۇشەلەرى «قىلمىس – ۇلتقا بولىنبەيدى» دەگەن پىكىردى تولىق قولدايدى جانە كىنالىلەر انىقتالىپ, زاڭ بويىنشا جازاعا تارتىلۋى كەرەك دەپ ەسەپتەيدى.
سوندىقتان بۇگىنگى كۇنگى ەڭ باستى ماقسات – ارانداتۋشىلارعا بوي الدىرماۋ, جەكە تۇلعالار جاساعان تارتىپسىزدىك ءۇشىن بۇكىل ۇلتتى ايىپتاۋعا جول بەرمەۋ.
اسسامبلەيا حالىق دانالىعىنا سەنىم ارتا وتىرىپ, ەل تۇرعىندارىنان, ەڭ الدىمەن جاستاردان ەلىمىزدەگى تاتۋلىق پەن كەلىسىمگە سەلكەۋ تۇسىرەتىن, اسىعىستىققا ۇرىندىراتىن قادامدار مەن ءىس-ارەكەتتەردەن ساق بولۋىن سۇرايدى.
قازاقستان حالقى ءبىر-بىرىمەن ءاردايىم باۋىرمالدىق قارىم-قاتىناستىڭ جارقىن ۇلگىسى بولعانىن جانە بولا بەرەتىنىنە سەنىمدىمىز.
بالالارىمىزدىڭ ورتاق بولاشاعى ءۇشىن ۇلتارالىق الاۋىزدىق تۋدىرماۋىمىز قاجەت.
ءبىز ازاماتتاردى جالعان قاۋەسەتتەرگە ەرمەۋگە, قوعامدىق قاۋىپسىزدىك پەن ەل تىنىشتىعىن قامتاماسىز ەتۋدە قۇقىق قورعاۋ ورگاندارىنا جاردەمدەسۋگە, ورتاق ۇيىمىزدەگى تاتۋلىق پەن بەيبىتشىلىكتى ساقتاۋعا شاقىرامىز.